ເຮລິຄອບເຕີແພດຂອງຍີ່ປຸ່ນເກີດເຫດຕົກກາງທະເລ ຂະນະກຳລັງຂົນສົ່ງຜູ້ປ່ວຍໄປໂຮງໝໍ ເຮັດໃຫ້ມີຜູ້ເສຍຊີວິດ 3 ຄົນ.

ສຳນັກຂ່າວຕ່າງປະເທດລາຍງານ ເຫດເຮລິຄອບເຕີແພດຍີ່ປຸ່ນລຳໜຶ່ງຕົກກາງທະເລ ຂະນະກຳລັງຮັບ-ສົ່ງຜູ້ປ່ວຍ 1 ຄົນໄປໂຮງໝໍ ໂດຍເດີນທາງຈາກສະໜາມບິນສຶຊິມະ ໃນຈັງຫວັດນາງາຊາກິ ໄປໂຮງໝໍໃນເມືອງຟຸຄຸໂອກະ ເມື່ອວັນທີ 6 ເມາສາ 2025 ຜ່ານມາ, ເຮັດໃຫ້ມີຄົນເສຍຊີວິດທັງໝົດ 3 ຄົນ ແລະ ສາມາດຊ່ວຍເຫຼືອໄດ້ 3 ຄົນ.

ຕາມການລາຍງານຂອງໜ່ວຍຍາມຝັ່ງລະບຸວ່າ: ໄດ້ສົ່ງເຮືອບິນ 2 ລຳ ແລະ ເຮືອອີກ 3 ລຳ ອອກປະຕິບັດພະລາກິດການຄົ້ນຫາ ແລະ ສາມາດຊ່ວຍເຫຼືອໄດ້ 3 ຄົນ, ເຊິ່ງລອຍຢູ່ກາງທະເລໂດຍເກາະອຸປະກອນເສື້ອຊູຊີບລອຍນ້ຳເອົາໄວ້ ໃກ້ກັບຈຸດເຮລິຄອບເຕີທີ່ຈົມຢູ່ໃຕ້ທະເລ ໂດຍທັງ 3 ຄົນມີອຸນຫະພູມຮ່າງກາຍທີ່ຕ່ຳ ແຕ່ຍັງມີສະຕິ.

ຫຼັງຈາກນັ້ນ ເຈົ້າໜ້າທີ່ຈຶ່ງສາມາດເກັບກູ້ຮ່າງຜູ້ເສຍຊີວິດ 3 ຄົນໄດ້ແກ່: ແພດ 1 ຄົນ, ຜູ້ປ່ວຍ 1 ຄົນ ແລະ ຜູ້ດູແລຜູ້ປ່ວຍ 1 ຄົນ, ໂດຍສາເຫດຂອງເຮລິຄອບເຕີຕົກໃນຄັ້ງນີ້ຍັງຢູ່ລະຫວ່າງການສືບສວນ-ສອບສວນຂອງເຈົ້າໜ້າທີ່.