ບັນລຸຄາດໝາຍ ກະຊວງ ຮສສ ຈັດຫາແຮງງານ 369,345 ຄົນ ເຂົ້າສູ່ຕໍາແໜ່ງງານພາຍໃນ ແລະ ຕ່າງປະເທດ
ທ່ານ ພົງໄຊສັກ ອິນຖາລາດ ກຳມະການຄະນະພັກກະຊວງ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ໃນໂອກາດໃຫ້ສໍາພາດຕໍ່ສື່ມວນຊົນ ໃນວັນທີ 21 ມີນາ 2025 ວ່າ: 5 ປີຜ່ານມາ ສາມາດຈັດຫາແຮງງານເຂົ້າສູ່ຕໍາແໜ່ງງານພາຍໃນ ແລະ ຕ່າງປະເທດ ໄດ້ທັງໝົດ 369.345 ຄົນ, ຍິງ 186.648 ຄົນ ເຮັດໃຫ້ສາມາດຮັກສາໄດ້ອັດຕາການວ່າງງານໃຫ້ຢູ່ໃນລະດັບບໍ່ເກີນ 2% ໃນແຕ່ລະປີ.
ໃນໄລຍະ 5 ປີຜ່ານມາ ກະຊວງແຮງງານ ແລະ ສະຫວັດດີການສັງຄົມ ສາມາດບັນລຸຄື: ມີສະຖາບັນພັດທະນາສີມືແຮງງານທັງໝົດໃນທົ່ວປະເທດ 19 ແຫ່ງ; ສ້າງມາດຕະຖານສີມືແຮງງານແຫ່ງຊາດ ໃນ 7 ຂະແໜງການ ໄດ້ 44 ສາຂາອາຊີບ, ສ້າງ ແລະ ປັບປຸງຫຼັກສູດເຝິກສີມືແຮງງານໄດ້ 20 ຫຼັກສູດ; ເຊັນບົດບັນທຶກຮ່ວມມືດ້ານພັດທະນາສີມືແຮງງານ ກັບພາກທຸລະກິດໄດ້ 24 ພາກສ່ວນ, ສາມາດພັດທະນາສີມືແຮງງານໄດ້ທັງໝົດ 76.331 ຄົນ, ລື່ນແຜນການ 5 ປີ 90.83%.
ສ່ວນດ້ານການສົ່ງເສີມການມີວຽກເຮັດງານທຳ ຫຼື ການຈັດຫາງານ: ມີຈຸດບໍລິ ການຈັດຫາງານໄດ້ສ້າງຕັ້ງຂຶ້ນຢູ່ທຸກແຂວງ, ນະຄອນຫຼວງວຽງຈັນ ແລະ ຂະຫຍາຍໄປສູ່ເມືອງໄດ້ 41 ເມືອງ, ມີວິສາຫະກິດບໍລິການຈັດຫາງານທັງໝົດ 48 ບໍລິສັດ.
ແຫຼ່ງຂ່າວ: ວິທະຍຸກະຈາຍສຽງແຫ່ງຊາດລາວ