ສະຫະລັດກຽມຂະຫຍາຍມາດຕະການຈຳກັດວີຊາກວມ 41 ປະເທດທົ່ວໂລກ
ອີງຕາມສຳນັກຂ່າວ ຮອຍເຕີ ລາຍງານໃນວັນທີ 16 ມີນາ 2025 ຜ່ານມານີ້ວ່າ: ລັດຖະບານຂອງທ່ານ ໂດນັລ ທຣັມ, ປະທານາທິບໍດີ ຂອງສະຫະລັດອາເມລິກາ ກຳລັງພິຈາລະນາ ການຂະຫຍາຍມາດຕະການຈຳກັດການເດີນທາງ ຂອງພົນລະເມືອງຈາກບັນດາ 41 ປະເທດໃນທົ່ວໂລກ, ໂດຍແບ່ງອອກເປັນ 3 ກຸ່ມຄື:
ກຸ່ມທີ 1 ທີ່ຈະຖືກລະງັບວີຊາ ມີທັງໝົດ 10 ປະເທດລວມເຖິງ: ອັບການິສສະຖານ, ອີຣ່ານ, ຊີເຣຍ, ຄິວບາ ແລະ ເກົາຫຼີເໜືອ.
ກຸ່ມທີ 2 ຈະຖືກລະງັບວີຊາບາງປະເພດ ເຊັ່ນ: ວີຊານັກທ່ອງທ່ຽວ, ວິຊານັກສຶກສາ ແລະ ວີຊາຜູ້ອົບພະຍົບບາງສ່ວນ ແຕ່ຍັງມີຂໍ້ຍົກເວັ້ນບາງກໍລະນີ ເຊິ່ງປະກອບມີ 5 ປະເທດ ຄື: ເອທຣິເຣຍ, ເຮຕິ, ລາວ, ມຽນມາ ແລະ ຊູດານໃຕ້.
ກຸ່ມທີ 3 ຈະຖືກລະງັບການອອກວິຊາສະຫະລັດບາງສ່ວນ ຫາກລັດຖະບານຂອງປະເທດເຫຼົ່ານັ້ນ ບໍ່ດຳເນີນການແກ້ໄຂຂໍ້ບົກຜ່ອງພາຍໃນ 60 ວັນ ເຊິ່ງປະກອບມີ 26 ປະເທດ ລວມມີ: ເບລາຣຸດ, ປາກີສະຖານ ແລະ ເຕີກເມນີສະຖານ.
ເຊິ່ງທທ່ານ ໂດນັລ ທຣັມ ໄດ້ໃຫ້ຄຳໝັ້ນສັນຍາວ່າ ຈະເພີ່ມຄວາມເຂັ້ມງວດໃນການກວດຄົນເຂົ້າເມືອງ. ກ່ອນໜ້ານີ້, ໃນເດືອນຕຸລາ 2023, ກໍເຄີຍໄດ້ປະກາດແຜນການຈຳກັດ ການເດີນທາງຈາກບັນດາປະເທດທີ່ເປັນໄພຕໍ່ຄວາມໝັ້ນຄົງຂອງ ສະຫະລັດອາເມລິກາ. ໃນຂະນະນີ້, ກະຊວງການຕ່າງປະເທດ ຍັງບໍ່ມີຄວາມເຫັນຕໍ່ມາດຕະການໃນຄັ້ງນີ້.