ອົດໃຈລໍຖ້າ! ການຂະຫຍາຍບ່າທາງໂຄງການກໍ່ສ້າງທາງລົດເມດ່ວນ BRT ມີຄວາມຄືບໜ້າຫຼາຍກວ່າ 58%
ມາຮອດປັດຈຸບັນການຂະຫຍາຍບ່າທາງຈຸດປະຕູໄຊ ຫາ 3 ແຍກຄໍາຮຸ່ງໜ້າມະຫາວິທະຍາໄລແຫ່ງຊາດຂອງໂຄງການກໍ່ສ້າງທາງລົດເມດ່ວນ BRT ມີຄວາມຄືບໜ້າຫຼາຍກວ່າ 58% ສ່ວນລະບົບໄຟອໍານາດທີ່ໃຊ້ການບໍ່ໄດ້ ຍ້ອນຜູ້ຮັບເໝົາກໍ່ສ້າງຂະຫຍາຍເສັ້ນທາງສອງຟາກທາງ ສົ່ງຜົນກະທົບກັບສາຍໄຟເຍືອງທາງ ຊຶ່ງພາກສ່ວນກ່ຽວຂ້ອງໄດ້ເລັ່ງແກ້ໄຂໃຫ້ສາມາດນໍາໃຊ້ເປັນປົກກະຕິແລ້ວ.
ທ່ານ ຄໍາແສນ ສີວົງໄຊ ຜູ້ຈັດການໂຄງການກໍ່ສ້າງທາງລົດເມດ່ວນ BRT ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 12 ມີນານີ້ວ່າ: ການຂະຫຍາຍບ່າທາງຂອງໂຄງການກໍ່ສ້າງທາງລົດເມດ່ວນ BRT ແບ່ງອອກເປັນ 3 ໄລຍະຄື: ໄລຍະທີ 1 ແຕ່ປະຕູໄຊຫາວົງວຽນ 450 ປີ, ໄລຍະທີ 2 ແຕ່ວົງວຽນ 450 ປີຫາໄຟແດງດົງໂດກ ໃນຈຸດດັ່ງກ່າວສາມາດຂະຫຍາຍບ່າທາງສຳເລັດ ແລະ ໂຄງສ້າງ BRT ຖືວ່າມີຈຸດຂຶ້ນ-ລົງຂອງສະຖານີຢູ່ທາງກາງທັງໝົດ 19 ຈຸດ, ກໍ່ສ້າງຮາກຖານສຳເລັດ 15 ຈຸດ ຍັງເຫຼືອ 4 ຈຸດ, ສ່ວນໂຄງສ້າງດ້ານເທິງໄດ້ຕິດຕັ້ງຢູ່ 7 ສະຖານີ, ມີ 1 ສະຖານີໄດ້ສຳເລັດການກໍ່ສ້າງ 100%, ສຳລັບການຂະຫຍາຍບ່າທາງແມ່ນ 50 ຊັງຕີແມັດ ຫາ 3 ແມັດ, ຖ້າຈຸດທີ່ສະຖານີເຮົາຈະເປີດກວ້າງອອກຈຸດນັ້ນເຮົາຈະມີການຂະຫຍາຍບ່າທາງອອກ 3 ແມັດ, ຈຸດທີ່ມີເລນຕອນກາງກວ້າງເຂດນັ້ນເຮົາຈະຫຍາຍ 50 ຊັງຕີແມັດ ຫາ 1 ແມັດ ສຳລັບທາງຍ່າງຍັງມີຄືເກົ່າຢ່າງໜ້ອຍ 1-1,5 ແມັດ ແລະ ໄລຍະທີ 3 ແຕ່ໂພນພະເນົາຫາ 3 ແຍກຄໍາຮຸ່ງ ມະຫາວິທະຍາໄລແຫ່ງຊາດ ຊຶ່ງປັດຈຸບັນໄດ້ສືບຕໍ່ຈັດຕັ້ງປະຕິບັດໃນໄລຍະທີ 3 ສໍາເລັດຫຼາຍກວ່າ 58% ຄວາມຍາວ 9 ກິໂລແມັດກວ່າ ຄາດວ່າຈະໃຫ້ສໍາເລັດພາຍໃນເດືອນກໍລະກົດປີນີ້ ເພື່ອຮັບປະກັນໃຫ້ການສັນຈອນໄປ-ມາຂອງພາຫະນະຕ່າງໆ ມີຄວາມສະດວກສະບາຍທີ່ສຸດ ເຖິງວ່າຈະພົບຄວາມຫຍຸ້ງຍາກຫຼາຍສົມຄວນໃນການຈັດຕັ້ງປະຕິບັດຕົວຈິງ ເປັນຕົ້ນສິ່ງກີດຂວາງຕ່າງໆເຊັ່ນ: ເສົາໄຟຟ້າ, ລະບົບສາຍໄຍແກ້ວຢູ່ພື້ນດິນ ລວມເຖິງການສັນຈອນທີ່ໜາແໜ້ນໃນແຕ່ລະວັນ.
ໂອກາດນີ້, ທ່ານ ຄໍາແສນ ສີວົງໄຊ ຍັງຮຽກຮ້ອງເຖິງສັງຄົມ ກໍຄືຜູ້ຊົມໃຊ້ພາຫະນະໃນນະຄອນຫຼວງວຽງຈັນທີ່ສັນຈອນໄປ-ມາຜ່ານບໍລິເວນຈຸດກໍ່ສ້າງໃຫ້ອົດທົນຮ່ວມກັນມີສະຕິ ແລະ ເພີ່ມຄວາມລະມັດລະວັງໃນການຂັບຂີ່ຍານ ພາຫະນະ ເພື່ອຫຼີກລ່ຽງອຸບັດເຫດທີ່ອາດຈະເກີດຂຶ້ນ. ຖ້າໂຄງການກໍ່ສ້າງທາງລົດເມດ່ວນ BRT ໄດ້ຮັບການຈັດຕັ້ງປະຕິບັດສໍາເລັດຕາມແຜນການ ຈະຊ່ວຍຫຼຸດຜ່ອນຄວາມແອອັດຂອງການສັນຈອນຢູ່ນະຄອນຫຼວງວຽງຈັນດີຂຶ້ນກວ່າເກົ່າ.
ແຫຼ່ງຂ່າວ: ປະຊາຊົນ