ການເສີມວິຕາມິນ ແລະ ແຮ່ທາດ ໃສ່ໃນເຂົ້າ ແມ່ນຊ່ວຍຫຼຸດຜ່ອນພາວະຂາດສານອາຫານໃນ ສປປ ລາວ
ນະຄອນຫຼວງວຽງຈັນ, ວັນທີ 6 ເດືອນມີນາ 2025 – ມື້ນີ້, ລັດຖະບານ ແຫ່ງ ສປປ ລາວ ແລະ ອົງການສະຫະປະຊາຊາດ ໄດ້ລົງນາມໃນໂຄງການເສີມວິຕາມິນ ແລະ ແຮ່ທາດ ໃສ່ໃນເຂົ້າ ເພື່ອແນ່ໃສ່ການສ້າງຄວາມເຂັ້ມແຂງຂະໜາດໃຫຍ່ໃນ ສປປ ລາວ ກ່ຽວກັບການເສີມຈຸນລະສານອາຫານ ໃສ່ໃນເຂົ້າ ໂດຍໄດ້ຮັບການສະໜັບສະໜູນຈາກລັດຖະບານປະເທດອິນເດຍ.
ເຂົ້າເຊີ່ງເປັນອາຫານຫຼັກຂອງ ສປປ ລາວ, ອາດສາມາດກາຍເປັນຕົວຊ່ວຍອັນສໍາຄັນໃນການຕໍ່ສູ້ ກັບພາວະການຂາດສານອາຫານ. ການຂາດຈຸລະສານອາຫານ, ເຊີ່ງເອີ້ນວ່າຄວາມອຶດຫິວທີ່ເຊື່ອງຊ້ອນ, ສາເຫດມາຈາກການຂາດວິຕາມິນ ແລະ ແຮ່ທາດທີ່ຈຳເປັນ, ສົ່ງຜົນໃຫ້ເກີດມີການຖ່ວງດຶງການຈະເລີນເຕີບໂຕ ແລະ ການພັດທະນາໃນ ສປປ ລາວ. ໃນນັ້ນ,ມີປະມານ 44% ຂອງເດັກນ້ອຍອາຍຸຕໍ່າກວ່າ 5 ປີ, 40% ຂອງແມ່ຍິງໄວຈະເລີນພັນ ແມ່ນໄດ້ຮັບຜົນກະທົບຈາກພະຍາດເລືອດຈາງ ເນື່ອງຈາກການຂາດທາດເຫຼັກ, ນໍາໄປສູ່ບັນຫາສຸຂະພາບທີ່ຮ້າຍແຮງ ແລະ ຊໍ້າເຮື້ອ.
ໂຄງການທີ່ໄດ້ຕົກລົງຮ່ວມກັນໃນມື້ນີ້, ຊື່ວ່າ “ການສ້າງຄວາມເຂັ້ມແຂງຂະໜາດໃຫຍ່ໃນສປປລາວ ໃນການເສີມວິຕາມິນ ແລະ ແຮ່ທາດໃສ່ໃນເຂົ້າ: ການລົງທຶນໃນການເສີມວິຕາມິນ ແລະ ແຮ່ທາດ ໃສ່ໃນເຂົ້າ” ຈະຖືກຈັດຕັ້ງປະຕິບັດໃນສອງປີຂ້າງໜ້າ. ໂຄງການນີ້ມີຈຸດປະສົງເພື່ອປັບປຸງຄຸນນະພາບເຂົ້າ ໂດຍການເພີ່ມວິຕາມິນ ແລະ ແຮ່ທາດທີ່ຈໍາເປັນ. ການເພີ່ມສານອາຫານແມ່ນເປັນແນວທາງທີມີປະສິດທິພາບ ແລະ ຄຸ້ມຄ່າທີ່ສຸດ ຕໍ່ດ້ານສາທາລະນະສຸກ ໃນການຫຼຸດຜ່ອນການຂາດສານອາຫານໃນລະດັບໃຫ່ຍ.
ພະນະທ່ານ ອາພອນ ວິຊາເທບ, ຮອງລັດຖະມົນຕີກະຊວງສາທາລະນະສຸກກ່າວວ່າ: ‘’ການເສີມວິຕາມິນ ແລະ ແຮ່ທາດ ບໍ່ແມ່ນວາລະທີ່ໃໝ່ຂອງ ສປປ ລາວ. ນັບຕັ້ງແຕ່ປີ 1995 ເປັນຕົ້ນມາ, ກະຊວງສາທາລະນະສຸກຂອງພວກເຮົາໄດ້ກໍານົດມາດຕະຖານການຜະລິດ ແລະ ການນໍາເຂົ້າຂອງເກືອໄອໂອດີນໃນລາວ ໂດຍກໍານົດໃຫ້ການເສີມໄອໂອດີນໃນເກືອກາຍເປັນຂໍ້ບັງຄັບ. ເຂົ້າໜຽວ ເຊິ່ງເປັນອົງປະກອບທີ່ສຳຄັນທີ່ສຸດຂອງວັດທະນະທຳອາຫານປະຈຳຊາດເຮົາ, ເປັນແຫຼ່ງພະລັງງານທີ່ດີ, ແຕ່ບໍ່ໄດ້ບັນຈຸສານອາຫານທີ່ເປັນປະໂຫຍດເຊັ່ນ: ວິຕາມິນ A, B, ທາດເຫຼັກ ແລະ ສັງກະສີ ເຊິ່ງປະຊາຊົນລາວໂດຍທົ່ວໄປ ແມ່ນຂາດແຄນອາຫານປະເພດນີ້. ການເພີ່ມຈຸລະສານອາຫານ ດັ່ງກ່າວເປັນໂອກາດໃນການຕໍ່ສູ້ກັບພາວະຂາດສານອາຫານຂອງພວກເຮົາ”
ລັດຖະບານປະເທດອິນເດຍ ໄດ້ໃຫ້ການສະໜັບສະໜູນກິດຈະກໍາດັ່ງກ່າວ ເປັນຈໍານວນເງີນປະມານ 1 ລ້ານໂດລາ ສະຫະລັດ ໃນໄລຍະ 2 ປີ ໂດຍຜ່ານກອງທຶນຄູ່ຮ່ວມພັດທະນາກັບລັດຖະບານອິນເດຍ ແລະ ສະຫະປະຊາຊາດ. ພະນະທ່ານ ທ່ານ ໂຍເກສວາ ສັງວານ, ເອກອັກຄະລັດຖະທູດອິນເດຍ ປະຈຳ ສປປ ລາວ ກ່າວວ່າ: “ການລົງທຶນດ້ານການເສີມຈຸນລະສານອານຫານຂອງປະເທດອິນເດຍ ໄດ້ຮັບຜົນສຳເລັດລະດັບຊາດ ໂດຍ 400 ລ້ານຄົນໃນອິນເດຍ ສາມາດເຂົ້າເຖີງເຂົ້າທີ່ມີການເສີມຈຸນລະສານອາຫານ ເພື່ອແກ້ໄຂການຂາດສານອາຫານ. ອິນເດຍມີຄວາມພູມໃຈທີ່ຈະໄດ້ແບ່ງປັນຄວາມຮູ້ ແລະ ປະສົບການດ້ານການເສີມວິຕາມິນ ແລະ ແຮ່ທາດໃສ່ເຂົ້າ ໃຫ້ກັບ ສປປ ລາວ. ການຮ່ວມມືນີ້ສະແດງໃຫ້ເຫັນເຖິງການສ້າງສາຍສໍາພັນທີ່ເຂັ້ມແຂງຂອງສອງຝ່າຍ ແລະ ຄວາມມຸ່ງໝັ້ນຂອງພວກເຮົາໃນການສະໜັບສະໜູນການພັດທະນາແບບຍືນຍົງໃນພາກພື້ນ.”
ທ່ານ ບັກໂຮເດຍ ເບີຄະນອ໋ຟ, ຜູ້ປະສານງານອົງການສະຫະປະຊາຊາດປະຈໍາ ສປປ ລາວ ກ່າວວ່າ: “ ອົງການສະຫະປະຊາຊາດ ມີບົດບາດສຳຄັນໃນການເປັນພັນທະມິດກັບລັດຖະບານໃນທົ່ວໂລກໃນການຫັນປ່ຽນລະບົບສະບຽງອາຫານ ດ້ວຍວິທີການທີ່ມີ
ປະສິດທິພາບ ແລະ ອີງໃສ່ຫຼັກຖານໃນການແກ້ໄຂບັນຫາ. ການເສີມວິຕາມີນ ແລະ ແຮ່ທາດໃສ່ອາຫານຫຼັກ ແມ່ນວີທີການທີ່ມີປະສິດທິພາບ ແລະ ຄຸ້ມຄ່າໃນການລົງທືນ ເປັນການນໍາເອົາຈຸນລະສານອາຫານໃສ່ໃນເຂົ້າ ເພື່ອໃຫ້ຄົນລາວທຸກຄົນໄດ້ບໍລິໂພກ ແລະ ຈະບໍ່ປະຖິ້ມໃຜໄວ້ຂ້າງຫຼັງ. ເປັນວີທີການເລັ່ງດ່ວນໃນການຫຼຸດຜ່ອນພາວະຂາດສານອາຫານ ແລະ ການບັນລຸເປົ້າໝາຍການພັດທະນາແບບຍືນຍົງ. ພວກເຮົາຂໍຂອບໃຈສໍາລັບການຮ່ວມມືກັບອິນເດຍ ໃນການດຳເນີນການລິເລີ່ມທີ່ສໍາຄັນດັ່ງກ່າວ, ເຊິ່ງເປັນຕົວຢ່າງອັນສໍາຄັນຂອງການຮ່ວມມືທັງສອງຝ່າຍ ”
ນັບແຕ່ປີ 2013 ເປັນຕົ້ນມາ, ອົງການອາຫານໂລກ ແຫ່ງ ສະຫະປະຊາຊາດ ໄດ້ເປັນຄູ່ຮ່ວມມືແຖວໜ້າຂອງລັດຖະບານກ່ຽວກັບການເສີມວິຕາມິນ ແລະ ແຮ່ທາດໃສ່ເຂົ້າ. ທ່ານ ມາກ-ອານເດຣ ໂປຣສ, ຜູ້ຕາງໜ້າອົງການອາຫານໂລກ ປະຈໍາ ສປປ ລາວ ກ່າວວ່າ: “ອົງການອາຫານໂລກ ແມ່ນມີຄວາມຊ່ຽວຊານດ້ານເສີມວິຕາມິນ ແລະ ແຮ່ທາດໃສ່ໃນເຂົ້າໃນທົ່ວໂລກ ມາເປັນເວລາ 30 ປີ. ການລົງນາມຮ່ວມກັນໃນມື້ນີ້ ແມ່ນແນ່ໃສ່ການປະຕິບັດບັນດາບາດກ້າວທີ່ໄດ້ວາງໄວ້ໃນແຜນປະຕິບັດງານຍຸດທະສາດ ການເສີມສານອາຫານໃນ ສປປ ລາວ. ຄວາມມຸ້ງໜັ້ນທາງດ້ານການເມືອງທີ່ເຂັ້ມແຂງສົມທົບກັບຄວາມຊ່ຽວຊານຂອງສາທາລະນະລັດອິນເດຍ ແລະ ອົງການອາຫານໂລກ ຈະເປັນການເປີດໂອກາດໃຫ້ພາກລັດ ແລະ ເອກະຊົນ ໄດ້ເສີມສ້າງຂິດຄວາມສາມາດແຫ່ງຊາດ ເພື່ອສ້າງຄວາມເຂັ້ມແຂງໃນການເສີມສານອາຫານ ແລະ ປັບປຸງໂພຊະນາການຂອງປະຊາຊົນຫຼາຍລ້ານຄົນໃນປະເທດລາວ”
ກ່ຽວກັບ: ອົງການອາຫານໂລກຂອງສະຫະປະຊາຊາດແມ່ນອົງການມະນຸດສະທໍາທີ່ໃຫຍ່ທີ່ສຸດໃນໂລກ ເຊີ່ງຊ່ວຍຊີວິດຄົນໃນພາວະສຸກເສີນ ແລະ ໃຫ້ການຊ່ວຍເຫຼືອດ້ານສະບຽງອາຫານ ເພື່ອສ້າງເສັ້ນທາງໄປສູ່ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງສໍາລັບປະຊາຊົນທີ່ຟື້ນຕົວຈາກຄວາມຂັດແຍ້ງ, ໄພພິບັດ ແລະ ຜົນກະທົບຂອງການປ່ຽນແປງດິນຟ້າອາກາດ.