ເຈົ້າໜ້າທີ່ ກສທຊ ປະເທດໄທ ກວດພົບ 2 ສາຍສື່ສານບໍ່ມີເຈົ້າຂອງ
ສຳນັກຂ່າວຕ່າງປະເທດ ລາຍງານໃນວັນທີ 25 ກຸມພາ 2025 ຜ່ານມາ, ເຈົ້າໜ້າທີ່ ສຳນັກງານຄະນະກຳມະການ ກິດຈະການກະຈາຍສຽງ, ກິດຈະການໂທລະພາບ ແລະ ກິດຈະການໂທລະຄົມມະນາຄົມແຫ່ງຊາດ ແຫ່ງປະເທດໄທ ຫຼື (ກສທຊ) ລົງພື້ນທີ່ກວດສອບບໍລິເວນ ຂົວມິດຕະພາບລາວ-ໄທ ແຫ່ງທີ 1 ໃນອຳເພີເມືອງ ຈັງຫວັດໜອງຄາຍ ເພື່ອກວດສອບຈຸດເຊື່ອມຕໍ່ສາຍສື່ສານລະຫວ່າງປະເທດ.
ເຈົ້າໜ້າທີ່ໄດ້ເປີດຜ່າທໍ່ເພື່ອກວດສອບສາຍເຊື່ອມຕໍ່ການສື່ສານ ເນື່ອງຈາກສາຍເປັນລັກສະນະສາຍຍາວລາກຜ່ານທໍ່ໄປຫາ ສປປ ລາວ, ເຊິ່ງບັນດາສາຍຢູ່ບໍລິເວນດັ່ງກ່າວມີຜູ້ໃຫ້ບໍລິການສາຍສື່ສານທີ່ໄດ້ຮັບອະນຸບຍາດທັງໝົດ 8 ເຈົ້າຂອງ, ເຈົ້າໜ້າທີ່ຈຶ່ງໃຫ້ມາລາຍງານໂຕ ເຊິ່ງກໍມາລາຍງານໂຕຈົນຄົບທັງ 8 ເຈົ້າຂອງ, ແຕ່ຍັງພົບອີກ 2 ສາຍ ທີ່ມີບັນຫາຄື: ເສັ້ນທີ 1 ຕິດສັນຍາລັກຂອງ 2 ບໍລິສັດໄທ ເຊິ່ງເຈົ້າໜ້າທີ່ຈະຕ້ອງໄດ້ກວດສອບວ່າເປັນຂອງໃຜ. ສ່ວນເສັ້ນທີ 2 ຍັງບໍ່ມີການມາສະແດງຕົວ ເຊິ່ງທາງເຈົ້າໜ້າທີ່ແຂວງທາງຫຼວງກໍໃຫ້ຂໍ້ມູນວ່າ: ອາດຈະເປັນສາຍເກົ່າທີ່ບໍ່ໄດ້ໃຊ້ງານ. ດັ່ງນັ້ນ, ເຈົ້າໜ້າທີ່ຈຶ່ງເລັ່ງກວດສອບໃຫ້ລະອຽດກ່ອນຈະຕັດສາຍສື່ສານທີ່ບໍ່ມີເຈົ້າຂອງ.
ຕາມການລາຍງານເຈົ້າໜ້າທີ່ ກສທຊ ຈະມີການເຊັນບົດບັນທຶກຄວາມເຂົ້າໃຈ ກັບ ກົມທາງຫຼວງປະເທດໄທ ເຊິ່ງຂົວທີ່ຂ້າມລະຫວ່າງປະເທດທັງໝົດ 17 ແຫ່ງຂົວທົ່ວປະເທດ ຈະມີການກວດສອບໃຫ້ເປັນລະບົບຢ່າງເປັນທາງການ, ທັງນີ້ກໍເພື່ອປ້ອງກັນການລັກລອບນຳສາຍສື່ສານອອກໄປໃຊ້ໃນຊ່ອງທາງອື່ນເດັດຂາດ.