ແພດໄທເປີດເຜີຍ 3 ນັກຮຽນມີອາການແໜ້ນໜ້າເອິກ ກ່ອນພົບວ່າປອດຖືກທຳລາຍເກືອບໝົດ ຍ້ອນສູບຢາສູບໄຟຟ້າ ແລະ ດື່ມນ້ຳກະທ້ອມມາເປັນເວລາ 2 ປີ.

ສຳນັກຂ່າວໄທລາຍງານວ່າ: ເມື່ອວັນທີ 20 ກຸມພາ 2025 ມີການລາຍງານຈາກໜ່ວຍກູ້ໄພຕຳບົນດອນບົນ ອຳເພີສະຕຶກ ຈັງຫວັດບຸລີລຳ ວ່າ: ອຸທາຫອນແກ່ຜູ້ປົກຄອງ ຫຼັງຈາກມີກໍລະນີເດັກປ່ວຍເຂົ້າຮັບການຮັກສາຢູ່ໂຮງໝໍ ຍ້ອນດື່ມນໍ້າກະທ້ອມ ແລະ ສູບຢາສູບໄຟຟ້າ, ເຊິ່ງເດັກນ້ອຍກຸ່ມດັ່ງກ່າວແມ່ນເດັກນ້ອຍ ປໍ 5 (1 ຄົນ), ມໍ 1 (1 ຄົນ), ມໍ 2 (1 ຄົນ) ໂດຍຖືກນຳສົ່ງຕົວມາດ້ວຍອາການແໜ້ນໜ້າເອິກ ຫາຍໃຈບໍ່ອິ່ມ.

ເມື່ອຜູ້ປົກຄອງຮູ້ຂ່າວຈຶ່ງໄດ້ເດີນທາງໄປໂຮງໝໍ ເພື່ອເບິ່ງອາການ ແລະ ແພດໄດ້ລະບຸວ່າ: ເດັກນ້ອຍໄດ້ສູບຢາສູບໄຟຟ້າມາໄດ້ປະມານ 2 ປີແລ້ວ, ປັດຈຸບັນນີ້ປອດຖືກທຳລາຍເກືອບທັງໝົດ ຕ້ອງໄດ້ໃຊ້ເຄື່ອງຊ່ວຍຫາຍໃຈ.

ຈາກກໍລະນີດັ່ງກ່າວ ຖືໄດ້ວ່າເປັນອຸທາຫອນໃຫ້ແກ່ຜູ້ປົກຄອງ ແລະ ລູກຫຼານທັງຫຼາຍ ໃຫ້ຮູ້ເຖິງຜົນຮ້າຍຂອງນໍ້າກະທ້ອມ ແລະ ຢາສູບໄຟຟ້າ ທີ່ທຳລາຍສຸຂະພາບຂອງເຮົາໄປໂດຍບໍ່ຮູ້ຕົວ ເມື່ອຮູ້ຕົວກໍສາຍເກີນໄປແລ້ວ.