ພະແນກຕຳຫຼວດ ກອງບັນຊາການ ປກສ ເມືອງໂພນໂຮງ ຈັບຕົວຜູ້ຄ້າ-ຂາຍ ໃບກະທ້ອມ ພ້ອມພວກດ້ວຍກຸ່ມມົ້ວສຸມດື່ມນໍ້າກະທ້ອມ ໄດ້ 5 ຄົນ
ໃນວັນທີ 18 ກຸມພາ 2025 ຜ່ານມານີ້, ພະແນກຕຳຫຼວດ ປກສ ເມືອງໂພນໂຮງ ຈັບຕົວຜູ້ຄ້າ-ຂາຍ ໃບກະທ້ອມ ພ້ອມດ້ວຍກຸ່ມມົ້ວສຸມດື່ມນ້ຳກະທ້ອມ ມາສຶກສາອົບຮົມ ໂດຍການເປັນປະທານຂອງ ພັທ ວິໄລທອງ ຫຼວງອາໄພ ຮອງຫົວໜ້າກອງບັນຊາການ ປກສ ໂພນໂຮງ ມີກຸ່ມມົ້ວສຸມດື່ມນໍ້າກະທ່ອມ ແລະ ຜູ້ຂາຍ ພ້ອມດ້ວຍຜູ້ປົກຄອງເຂົ້າຮ່ວມ.
ພັທ ວິໄລທອງ ຫຼວງອາໄພ ຮອງຫົວໜ້າກອງບັນຊາການ ປກສ ໂພນໂຮງ ໃຫ້ຮູ້ວ່າ ໃນວັນທີ 13 ກຸມພາ 2025 ຜ່ານມາ ເຈົ້າໜ້າທີ່ໜ່ວຍງານ ສະກັດກັ້ນ-ຕ້ານຢາເສບຕິດ ປກສ ເມືອງໂພນໂຮງ ໄດ້ລົງມ້າງຈຸດມົ້ວສຸມກະທ້ອມຢູ່ບ້ານ ນາເລົາ ເມືອງ ໂພນໂຮງ ແຂວງວຽງຈັນ ສາມາດກັກຕົວຜູ້ຖືກຫາໄດ້ນວນ 05 ຄົນຄື: ທ້າວ ຕົ້ນທອງ ອາຍຸ 24 ປີ ພ້ອມຂອງກາງໃບກະທ້ອມ ຈຳນວນ 107 ກິໂລກຼາມ, ກັນຊາ ຈຳນວນ 200 ກຼາມ; ທ້າວ ຊ້າງນ້ອຍ ອາຍຸ 21 ປີ, ທ້າວ ສາລີ ອາຍຸ 20 ປີ, ທ້າວປັນຈາ ອາຍຸ 20 ປີ ແລະ ທ້າວ ເຈມ ອາຍຸ 17 ປີ ຈາກນັ້ນເຈົ້າໜ້າທີ່ຈິ່ງໄດ້ນຳຕົວພວກກ່ຽວມາສຶກສາອົບຮົມ ແລ້ວນຳຕົວທ້າວ ຕົ້ນທອງ (ຜູ້ຂາຍ) ມາທຳການສືບສວນ-ສອບສວນ.
ຜ່ານການສືບສວນ-ສອບສວນ ທ້າວ ຕົ້ນທອງ ຮັບສາລະພາບວ່າ: ໃບກະທ້ອມຈຳນວນ 107 ກິໂລກຼາມ ແລະ ກັນຊາ ຈຳນວນ 200 ກຼາມ ແມ່ນເປັນຂອງຜູ້ກ່ຽວແທ້ ໂດຍໄດ້ສັ່ງຊື້ໃບກະທ້ອມນໍ້າທ້າວ ແສງອາຄົມ ຢູ່ນະຄອນຫຼວງວຽງຈັນ ແລະ ຊື້ກັນຊາ 200 ກຼາມ, ມາໄວ້ສູບເອງ.
ຜ່ານການສັງລວມຂໍ້ມູນທັງໝົດເຫັນວ່າ ທ້າວ ຕົ້ນທອງ ຜູ້ກ່ຽວມີຢາເສບຕິດປະເພດ (ກັນຊາ) ແລະ ໃບກະທ້ອມໄວ້ໃນຄອບຄອງຢ່າງແທ້ຈິງ ເຊິ່ງຜິດຕໍ່ກົດໝາຍມາດຕາ 315 ແລະ ມາດຕາ 275 ຂອງປະມວນກົດໝາຍອາຍາສະບັບປັງປຸງ ປີ 2017.
ແຫຼ່ງຂ່າວ: Viengchan Police news