ຄ່ຳຄືນແຫ່ງການສະເຫຼີມສະຫຼອງ Burns Night 2025 ຈັດຂຶ້ນເມື່ອວັນທີ 1 ກຸມພາ ທີ່ຜ່ານມາ, ໃນໂຮງແຮງ Holiday Inn and Suites, ນະຄອນຫຼວງວຽງຈັນ ໂດຍກຸ່ມ British Business Group in Laos (BBGL) ຈັດຂຶ້ນເພື່ອລະນຶກເຖິງຊີວິດ ແລະ ຜົນງານຂອງ ໂຣເບີດ ເບີນ(Robert Burns) ນັກກະວີເອກແຫ່ງສະກັອດແລນ.
ພາຍໃນງານເຕັມໄປດ້ວຍກິ່ນອາຍຂອງວັດທະນະທຳສະກັອດແທ້ໆ, ບໍ່ວ່າຈະເປັນເມນູອາຫານແບບດັ້ງເດີມ ເຊັ່ນ: Haggis, ການບັນຍາຍບົດກະວີຂອງ ໂຣເບີດ ເບີນ, ການຂັບຮ້ອງເພງສະກອດ, ການສະແດງເຄື່ອງດົນຕີເປົ່າປີ່ສະກັອດ ແລະ ການເຕັ້ນລຳສຸດຄຶກຄື້ນ.
ທ່ານ ລີ ເຊີຣິແດນ ປະທານ BBGL ໄດ້ກ່າວວ່າ: “ມັນເປັນຄ່ຳຄືນທີ່ພິເສດ ໃນການສະເຫຼີມສະຫຼອງວັດທະນະທຳສະກັອດແລນ ແລະ ໄດ້ແບ່ງປັນສິ່ງເຫຼົ່ານີ້ໃຫ້ກັບຜູ້ຄົນຫຼາກຫຼາຍເຊື້ອຊາດ”
ໜຶ່ງໃນສິ່ງທີ່ສຳຄັນຂອງຄ່ຳຄືນນີ້ ຄືການສະແດງເຕັ້ນສະກັອດສຸດມ່ວນຊື່ນ ໂດຍທີມນັກເຕັ້ນຈາກ Fanglao Dance Studio ເຊິ່ງ ເຊີຣິແດນ ຍັງໄດ້ກ່າວຕື່ມອີກວ່າ: ນີ້ເປັນຊ່ວງເວລາທີ່ລາວມັກເປັນພິເສດ.
ງານ Burns Night 2025 ບໍ່ພຽງແຕ່ມອບຄວາມບັນເທີງເທົ່ານັ້ນ ແຕ່ຍັງນຳພາຜູ້ເຂົ້າແຂ່ງຮ່ວມສຳພັດບັນຍາກາດທີ່ມີສະເນ່ ຂອງມໍລະດົກທາງວັດທະນະທຳສະກັອດແລນ ແລະລະນຶກເຖິງຜົນງານອັນຊົງຄຸນຄ່າຂອງ ໂຣເບີດ ເບີນ ຢ່າງເຕັມອີ່ມ.
ທີ່ມາ: Lao Tian Times