ສຳນັກຂ່າວຕ່າງປະເທດລາຍງານວ່າ ປະທານາທິບໍດີ ໂດໂນ ທຣຳ ປະກາດເມື່ອວັນທີ 12 ກຸມພາ 2025 ວ່າ ລາວຕ້ອງການໃຫ້ມີການປິດກະຊວງສຶກສາທິການອາເມລິກາທັນທີ.
ກ່ອນໜ້ານີ້ ທຣຳເຄີຍລະບຸວ່າລາວຕ້ອງການປິດກະຊວງດັ່ງກ່າວ ໂດຍໃຊ້ອຳນາດຄຳສັ່ງຝ່າຍບໍລິຫານ ແຕ່ຍອມຮັບວ່າການດຳເນີນການໃຫ້ເປັນໄປຕາມແຜນການຫາສຽງຂອງລາວ ຈະຕ້ອງໄດ້ຮັບການສະໜັບສະໜຸນຈາກສະພາຄອງເກສ ແລະສະຫະພາບຄຣູ.
ຫາກມີການປິດກະຊວງສຶກສາທິການໃນທັນທີ ອາດຈະສົ່ງຜົນກະທົບຕໍ່ເງິນອຸດໜຸນຈຳນວນຫຼາຍໝື່ນລ້ານໂດລາ ທີ່ຈັດສັນໃຫ້ກັບໂຮງຮຽນລະດັບ K-12 ແລະໂຄງການຊ່ວຍເຫຼືອຄ່າຮ່ຳຮຽນຂອງນັກສຶກສາ ໃນລະດັບອຸດົມສຶກສາ.
ທຣຳໃຊ້ເວລາຫຼາຍອາທິດໃນຊ່ວງທຳອິດຂອງການດຳລົງຕຳແໜ່ງ ຊຸກຍູ້ການປ່ຽນແປງຄັ້ງໃຫຍ່ໃນລັດຖະບານ ອາເມລິກາ ບໍ່ວ່າຈະເປັນການຮຽກຮ້ອງໃຫ້ພະນັກງານຂອງລັດ ກັບມາເຮັດວຽກທີ່ສຳນັກງານ ຫຼື ອອກຈາກຕຳແໜ່ງ, ການຫຼຸດຄ່າໃຊ້ຈ່າຍແລະຈຳນວນພະນັກງານ ລວມເຖິງການພະຍາຍາມປິດໜ່ວຍງານຕ່າງໆ ເຊັ່ນ: ອົງການເພື່ອການພັດທະນາລະຫວ່າງປະເທດ ແຫ່ງອາເມລິກາ ຫຼື USAID ແລະກະຊວງສຶກສາທິການ ເປັນໜຶ່ງໃນເປົ້າໝາຍທີ່ທຣຳຕ້ອງການປິດຕົວລົງ.
ທ່ານ ໂດໂນ ທຣຳ ກ່າວກັບຜູ້ສື່ຂ່າວໃນວັນພຸດທີ່ຜ່ານມາວ່າ “ຂ້ອຍຢາກໃຫ້ມັນຖືກປິດທັນທີ, ກະຊວງສຶກສາທິການເປັນເລື່ອງລວງໂລກຄັ້ງໃຫຍ່”
ກ່ອນໜ້ານີ້ ທ່ານ ໂດໂນ ທຣຳ ເຄີຍສະເໜີໃຫ້ມີການປິດກະຊວງສຶກສາທິການມາແລ້ວ ໃນວາລະທຳອິດຂອງລາວ (2017-2021) ແຕ່ບໍ່ໄດ້ຮັບການສະໜັບສະໜຸນຈາກສະພາຄອງເກສ.
ປັດຈຸບັນ ກະຊວງສຶກສາທິການມີພະນັກງານ 4,245 ຄົນ ແລະໃຊ້ງົບປະມານ 251 ພັນລ້ານໂດລາ ໃນປີງົບປະມານຫຼ້າສຸດ.
ທັງນີ້, ກຸ່ມນັກຄິດອະນຸລັກນິຍົມ ທີ່ສະໜັບສະໜຸນການຍົກເລີກກະຊວງສຶກສາທິການ ໄດ້ສະເໜີວ່າ ໜ່ວຍງານອື່ນສາມາດເຂົ້າມາຮັບໜ້າທີ່ຈັດການ ໂຄງການເງິນອຸດໜຸນ ແລະກຳກັບດູແລດ້ານການສຶກສາແທນໄດ້.
ທີ່ມາ: Reuters