ກຽມຮັບມືອາກາດໜາວເຢັນສະພາບອາກາດເຢັນລະຫວ່າງວັນທີ 8-11 ກຸມພາ 2025 ຄວາມກົດດັນສູງອາກາດຫນາວເຢັນທີ່ປະເທດຈີນໄດ້ມີກໍາລັງແຮງຈະແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກໍາລັງປານກາງ ຫາ ແຮງ, ສົມທົບກັບລົມມໍລະສຸມຕາເວັນອອກສ່ຽງເຫນືອພັດປົກຄຸມເປັນສ່ວນ ໃຫຍ່, ຊຶ່ງຈະເຮັດໃຫ້ອຸນຫະພູມອາກາດເຢັນລົງ 2 ຫາ 4 ອົງສາ ແລະ ຈະເຮັດໃຫ້ມີຝົນຕົກໃນລະດັບຄ່ອຍ, ສະພາບ ອາກາດຈະຫນາວເຢັນຫຼາຍຢູ່ແຂວງພາກເຫນືອ, ພາກກາງ ແລະ ເຂດພູພຽງບໍລະເວນ ພ້ອມຫມອກຫນາປົກຫຸ້ມຢູ່ເຂດພູ ດອຍ ແລະ ພູສູງ, ຈະມີລົມພັດແຮງຢູ່ບາງທ້ອງຖິ່ນ ໃນໄລຍະວັນທີ 08 ຫາ 11 ກຸມພາ 2025 ນີ້.

ພາກເຫນືອ ອາກາດຈະຫນາວເຢັນ ຫາ ຫນາວເຢັນຫຼາຍ ພ້ອມມີຫມອກບາງ ປົກຫຸ້ມຢູ່ທົ່ວໄປ ຢູ່ ແຂວງ ຜົ້ງສາລີ, ຫົວພັນ, ຊຽງຂວາງ, ອຸດົມໄຊ, ບໍ່ແກ້ວ, ຫຼວງນໍ້າທາ, ຫຼວງພະບາງ, ໄຊຍະບູລີ ແລະ ຈະມີຝົນຕົກໃນລະດັບ ຄ່ອຍຢູ່ບາງທ້ອງຖີ່ນ. ອຸນຫະພູມຕ່ໍາສຸດ 05 ຫາ 13 ອົງສາ.
ພາກກາງ ອາກາດເຢັນ ຫາ ຫນາວເຢັນ ພ້ອມມີລົມພັດແຮງ ໂດຍສະເພາະຢູ່ ແຂວງ ໄຊສົມບູນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ. ອຸນຫະພູມຕໍ່າສຸດ 13 ຫາ 18 ອົງສາ.
ນະຄອນຫຼວງວຽງຈັນ ອາກາດເຢັນ ຫາ ຫນາວເຢັນ ພ້ອມຈະມີລົມພັດແຮງຢູ່ບາງບໍລິເວນ. ອຸນຫະພູມຕໍ່າສຸດ 14 ຫາ 17 ອົງສາ.
ພາກໃຕ້ ອາກາດເຢັນ ຫາ ຫນາວເຢັນ ພ້ອມມີຫມອກບາງປົກຫຸ້ມຢູ່ທົ່ວໄປໃນຕອນເຊົ້າ ແລະ ຈະມີລົມພັດແຮງ ຢູ່ບາງທ້ອງຖີ່ນ ແຂວງ ຈໍາປາສັກ, ອັດຕະປື ແລະ ເຊກອງ. ອຸນຫະພູມຕໍ່າສຸດ 14 ຫາ 18 ອົງສາ.
ເຂດພູພຽງບໍລະເວນ ອາກາດຈະຫນາວເຢັນ ຫາ ຫນາວເຢັນຫຼາຍ ພ້ອມມີຫມອກຫນາປົກຫຸ້ມຢູ່ບາງບໍລິເວນ. ອຸນຫະພູມຕໍ່າສຸດ 05 ຫາ 13 ອົງສາ.