ຈາກກໍລະນີຊາຍກໍ່ເຫດ ລັກສາຍໄຟ ທີ່ບ້ານຫັດສະດີ ເມືອງຈັນທະບູລີ ນະຄອນຫຼວງວຽງຈັນ ໃນຕອນເຊົ້າເວລາປະມານ 9:00 ນາທີ ຂອງວັນທີ 30 ມັງກອນ 2025, ພາຍໃນ 1 ຊົ່ວໂມງຂອງວັນດຽວກັນ ເຈົ້າໜ້າທີ່ກໍສາມາດຈັບຕົວມາສືບສວນ-ສອບສວນໄດ້.
ພັທ ພອນມະນີ ສຸລິນນະພອນ ຮອງຫົວໜ້າກອງບັນຊາການ ປກສ ເມືອງຈັນທະບູລີ ລາຍງານວ່າ: ວັນທີ 30 ມັງກອນ 2025 ໄດ້ຮັບແຈ້ງເຫດຈາກພົນລະເມືອງດີວ່າ ມີຄົນຮ້າຍລັກຕັດສາຍໄຟຢູ່ ບ້ານຫັດສະດີ ເມືອງຈັນທະບູລີ ເຂດໂຮງຮຽນ ມສ ວຽງຈັນ, ຫຼັງຈາກນັ້ນເຈົ້າໜ້າທີ່ຈຶ່ງໄດ້ ສົມທົບກັບອໍານາດການປົກຄອງບ້ານ ປກສ ກຸ່ມ ກວດກາຕົວຈິງ ເຫັນວ່າເຫດການດັ່ງກ່າວແມ່ນຄວາມຈິງແທ້, ຈາກນັ້ນຈຶ່ງໄດ້ສືບຄົ້ນຫາຜູ້ກໍ່ເຫດໄດ້ປະມານ 1 ຊົ່ວໂມງ ກໍ່ສາມາດຈັບຕົວຜູ້ກໍ່ເຫດມາໄດ້ ຄື: ທ້າວຄຳລ້ານ, ອາຍຸ 41 ປີ, ບ້ານເກີດ ບ້ານເຊໃຫຍ່, ເມືອງສາມັກຕີໄຊ, ແຂວງອັດຕະປື.
ຜ່ານການສືບສວນຜູ້ກ່ຽວຮັບສາລະພາບວ່າ: ຜູ້ກ່ຽວໄດ້ລົງມືກໍ່ເຫດແທ້, ດ້ວຍວິທີການເອົາຫີນທຸບເອົາສາຍໄຟ ເພື່ອເອົາໄປຂາຍ, ສ່ວນສາເຫດທີ່ກໍ່ເຫດ ແມ່ນຜູ້ກ່ຽວຢາກໄດ້ເງິນໄປຊື້ຢາເສບຕິດມາເສບ, ຫຼັງຈາກນັ້ນໄດ້ນຳຕົວຜູ້ກ່ຽວມາດຳເນີນຄະດີຕາມກົດໝາຍ.
ແຫຼ່ງຂ່າວ: ຄວາມສະຫງົບນະຄອນຫຼວງ