ພິທີ ມອບ-ຮັບໜ້າທີ່ ຫົວໜ້າກົມໃຫຍ່ເສນາທິການກອງທັບ ລະຫວ່າງ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນວັນທີ 30 ມັງກອນ 2025 ນີ້, ໂດຍການເປັນປະທານ ຂອງສະຫາຍ ພົນໂທ ຄໍາລຽງ ອຸທະໄກສອນ ກຳມະການສູນກາງພັກ, ລັດຖະມົນຕີກະຊວງປ້ອງກັນປະເທດ, ມີຄະນະນຳກົມໃຫຍ່ເສນາທິການກອງທັບ, ຄະນະພັກ-ຄະນະບັນຊາບັນດາກົມ, ຫ້ອງການ, ກົມກອງຮາກຖານ ແລະ ພະນັກງານ-ຫຼັກແຫຼ່ງ ເຂົ້າຮ່ວມ.
ສະຫາຍ ພັນເອກ ສຸລິໄຊ ພິຈິດ ຫົວໜ້າຫ້ອງການ ກົມໃຫຍ່ເສນາທິການກອງທັບ ໄດ້ຕາງໜ້າໃຫ້ຫົວໜ້າກົມໃຫຍ່ເສນາທິການກອງທັບ ຜ່ານບົດລາຍງານການນໍາພາ-ຊີ້ນໍາຈັດຕັ້ງປະຕິບັດບັນດາໜ້າວຽກ ຕາມພາລະບົດບາດ, ສິດ ແລະ ໜ້າທີ່ຄວາມຮັບຜິດຊອບ ຂອງກົມໃຫຍ່ເສນາທິການກອງທັບ ໄລຍະຜ່ານມາ, ເຊິ່ງໄດ້ເປັນເຈົ້າການເຮັດວຽກງານສຶກສາອົບຮົມການເມືອງ-ນຳພາແນວຄິດ ໃຫ້ພະນັກງານ-ນັກຮົບ ສອດຫ້ອຍເຂົ້າໃນທຸກຂົງເຂດວຽກງານ ດ້ວຍຫຼາຍຮູບການ, ຫຼາຍລະດັບແຕກຕ່າງກັນ, ຖືກຕ້ອງຕາມແຕ່ລະເປົ້າໝາຍ, ຊີ້ນໍາກົມກອງກໍາລັງຫຼວງ-ກໍາລັງທ້ອງຖິ່ນທົ່ວປະເທດ ເຄື່ອນໄຫວເຮັດໃຫ້ສະພາບມີຄວາມສະຫງົບ, ປະສານສົມທົບກັບບັນດາອົງການທີ່ກ່ຽວຂ້ອງ, ຈັດຕັ້ງພະນັກງານຫຼັກແຫຼ່ງລົງກໍ່ສ້າງຮາກຖານການເມືອງ ຢູ່ບັນດາຈຸດສຸມເຂດຫ່າງໄກສອກຫຼີກ ໃນທົ່ວປະເທດ ໂດຍສະເພາະ ຢູ່ບັນດາແຂວງພາກເໜືອ ແລະ ເຂດໃຈກາງ, ເອົາໃຈໃສ່ຕິດຕາມກຳແໜ້ນ ສະພາບການເຄື່ອນໄຫວຂອງກຸ່ມຄົນບໍ່ດີ ຢູ່ພາຍໃນ ແລະ ນອກຊາຍແດນ, ຈັດຕັ້ງເຄື່ອນໄຫວກວດກາວຽກງານກຽມພ້ອມສູ້ຮົບ ຂອງບັນດາກົມກອງທົ່ວກອງທັບ ພົ້ນເດັ່ນແມ່ນ ເຄື່ອນໄຫວເຜີຍແຜ່ຄຳສັ່ງ ຂອງກະຊວງປ້ອງກັນປະເທດ ແລະ ຄໍາສັ່ງແນະນໍາຂອງກົມໃຫຍ່ເສນາທິການກອງທັບ ວ່າດ້ວຍການເພີ່ມທະວີ ການນໍາພາປັບປຸງວຽກງານກຽມພ້ອມສູ້ຮົບຂອງກອງທັບ ພ້ອມນີ້, ຍັງໄດ້ຊີ້ນໍາການຈັດຕັ້ງກໍາລັງປ້ອງກັນເປົ້າໝາຍຍຸດທະສາດ, ສະຖານທີ່ສາງຄັງ, ສະໜາມບິນ, ບັນດາເສັ້ນທາງ, ການນໍາພັກ-ລັດ, ແຂກພາຍໃນ ແລະ ຕ່າງປະເທດ, ກອງປະຊຸມສໍາຄັນຕ່າງໆ, ປ້ອງກັນເສັ້ນທາງລົດໄຟ ລາວ-ຈີນ, ໂຄງການກວດກູ້ລະເບີດ ລາວ-ຣັດເຊຍ, ປ້ອງກັນກອງປະຊຸມສຸດຍອດ ອາຊຽນ ຄັ້ງທີ 44-45 ທີ່ ສປປ ລາວ ໄດ້ຮັບກຽດເປັນເຈົ້າພາບ ມີຄວາມສະຫງົບປອດໄພ 100%, ຊີ້ນຳກຳລັງຍົກສູງສະຕິລະວັງຕົວໃນການກຽມພ້ອມສູ້ຮົບ, ຈັດຕັ້ງກຽມພ້ອມທາງດ້ານກໍາລັງ, ພາຫະນະສູ້ຮົບ ແລະ ຮັບປະກັນສູ້ຮົບຂອງກອງທັບ, ເປັນກຳລັງຫຼັກແຫຼ່ງໃນການຊ່ວຍເຫຼືອ ແລະ ກອບກູ້ໄພພິບັດທາງທໍາມະຊາດ ໄດ້ຢ່າງທັນການ. ຈາກນັ້ນ, ໄດ້ລົງນາມບົດບັນທຶກ ມອບ-ຮັບໜ້າທີ່ ຢ່າງເປັນທາງການ ລະຫວ່າງ ສະຫາຍ ພົນໂທ ຄໍາລຽງ ອຸທະໄກສອນ ຫົວໜ້າກົມໃຫຍ່ເສນາທິການກອງທັບ (ຜູ້ເກົ່າ) ແລະ ສະຫາຍ ພົນຕີ ສາຍໃຈ ກົມມະສິດ ຫົວໜ້າກົມໃຫຍ່ເສນາທິການກອງທັບ (ຜູ້ໃໝ່).
ແຫຼ່ງຂ່າວ: Lao people’s Army News