ອຸບັດເຫດລົດເມໂດຍສານ ວຽງຈັນ–ປາກເຊ ເສຍຫຼັກລົງຂ້າງທາງແລ້ວຕໍາຕົ້ນໄມ້ໃຫຍ່ ຢູ່ບ້ານພູດາວແຈ້ງໃຫຍ່ ເມືອງລະຄອນເພັງ ແຂວງສາລະວັນ ໃນເວລາປະມານ 5 ໂມງເຊົ້າຂອງ ວັນທີ 26 ມັງກອນ 2025 ຜ່ານມາ, ເຮັດໃຫ້ມີຜູ້ໄດ້ຮັບບາດເຈັບ ທັງຄົນລາວ-ຕ່າງປະເທດ ລວມທັງໝົດ 43 ຄົນ.
ຕາມການລາຍງານຂອງເຈົ້າໜ້າທີ່ລະບຸວ່າ: ແອັດລົດເສຍຊີວິດຄາທີ່ ແລະ ມີຜູ້ບາດເຈັບທັງໝົດ 43 ຄົນ (ຍິງ 13 ຄົນ), ໃນນັ້ນ ຄົນລາວ 14 ຄົນ (ຍິງ 1 ຄົນ) ແລະ ຕ່າງປະເທດ 29 ຄົນ (ຍິງ 12 ຄົນ) ໂດຍມີຜູ້ບາດເຈັບສາຫັດ 14 ຄົນ.
ສ່ວນສາເຫດໃນການເກີດອຸບັດເຫດຄັ້ງນີ້ ຍັງຢູ່ໃນຂັ້ນຕອນການສືບສວນ-ສອບສວນ ຖ້າມີລາຍລະອຽດຄວາມຄືບໜ້າຕ່າງໆຈະລາຍງານໃຫ້ຊາບຕື່ມພາຍຫຼັງ.
ຂໍສະແດງຄວາມເສຍໃຈຕໍ່ຄອບຄົວຜູ້ເສຍຊີວິດດ້ວຍ.