ໂດໂນ ທຣຳ ສາບານຕົນຮັບຕຳແໜ່ງປະທານາທິບໍດີຄົນທີ 47 ຂອງສະຫະລັດຢ່າງເປັນທາງການແລ້ວໃນວັນທີ 20 ມັງກອນ 2025 ຜ່ານມາ ພ້ອມກ່າວຄຳປາໄສປະກາດວ່າ ຍຸກທອງຂອງອາເມຣິກາເລີ່ມຂຶ້ນແລ້ວ.

ຫຼັງຈາກພິທີສາບານຕົນເຂົ້າຮັບຕຳແໜ່ງ ໂດໂນ ທຣຳ ກໍໄດ້ລົງນາມເຊັນເອກະສານຕ່າງໆໄປຫຼາຍສະບັບ ເຊິ່ງໃນນັ້ນກໍມີ 8 ຫົວຂໍ້ສຳຄັນຄື:

1. 1. ອອກຈາກອົງການອະນາໄມໂລກ (WHO) : ໂດໂນ ທຣຳ ໄດ້ວິຈານການເຮັດວຽກຂອງ WHO ແລະ ເຄີຍປະກາດຖອນຕໂຕມາແລ້ວຈາກການລະບາດຂອງພະຍາດໂຄວິດ-19 ທີ່ຍັງແຜ່ກະຈາຍຢູ່ ຈຶ່ງເຫັນວ່າອົງການອະນາໄມໂລກມີການຈັດການທີ່ຫຼົ້ມເຫຼວ ນອກຈາກນັ້ນຍັງຮຽກຮ້ອງເງິນຊົດເຊີຍຕໍ່ WHO ອີກດ້ວຍ.
   2. ອອກຈາກຂໍ້ຕົກລົງຂອງປາຮີ: ນີ້ບໍ່ແມ່ນຄັ້ງທຳອິດທີ່ ໂດໂນ ທຣຳ ອອກຈາກຂໍ້ຕົກລົງປາຮີວ່າດ້ວຍການປ່ຽນແປງສະພາບອາກາດ ເພາະເຄີຍຕັດສິນໃຈອອກມາແລ້ວໃນສະໄໝທຳອິດ ແລ້ວ ໂຈ ໄບເດັນ ກໍກັບເຂົ້າມາ, ແລ້ວ ໂດໂນ ທຣຳ ກໍຈະເອົາອອກອີກ ໂດຍຂໍ້ຕົກລົງນີ້ ວ່າດ້ວຍການຫຼຸດຜ່ອນການປ່ອຍກ້າດເຮືອນແກ້ວ ແລະ ການໃຫ້ຄຳໝັ້ນເລື່ອງການຄວບຄຸມອຸນຫະພູມໂລກ.
   3. ອະໄພຍະໂທດ 1,500 ຄົນ ທີ່ໂຈມຕີອາຄານລັດທະສະພາ ໃນປີ 2021: ຈາກເຫດການໃນວັນທີ 6 ມັງກອນ 2021 ທີ່ມີຜູ້ຊຸມນຸມກໍ່ເຫດບຸກອາຄານລັດຖະສະພາ ເຊິ່ງໄອຍະການຕັ້ງຂໍ້ສົງໃສກວ່າ 1,850 ຄົນ ແລະ ຕັດສິນຄະດີແລ້ວ 1,270 ຄົນ.
   4. ຢຸດຈ້າງງານໃນລັດຖະບານກາງ: ໂດໂນ ທຣຳ ໄດ້ມີຄຳສັ່ງຢຸດຈ້າງງານຕຳແໜ່ງຕ່າງໆ ໃນລັດຖະບານກາງ ຍົກເວັ້ນແຕ່ຝ່າຍກ່ຽວຂ້ອງກັບການບັງຄັບໃຊ້ກົດໝາຍກວດກາຄົນເຂົ້າເມືອງ ຄວາມໝັ້ນຄົງ ແລະ ຄວາມປອດໄພສາທາລະນະ.
   5. ເລື່ອນການແບນຕິກຕ໋ອກ: ຫຼັງຈາກຕິກຕ໋ອກໄດ້ມີການປິດໃຊ້ງານໃນວັນທີ 19 ມັງກອນ 2025 ໃນຂະນະທີ່ ໂດໂນ ທຣຳ ຂຶ້ນເປັນປະທານາທິບໍດີ, ຕິກຕ໋ອກ ກໍກັບມາໃຊ້ໄດ້ເປັນປົກກະຕິຕາມຄຳສັ່ງຂອງ ທຣຳ ທີ່ຂະຫຍາຍເວລາໃຫ້ບໍລິສັດແມ່ ຕິກຕ໋ອກ ໃຫ້ຫາເຈົ້າຂອງໃໝ່ໃນສະຫະລັດໃຫ້ໄດ້ພາຍໃນ 75 ມື້ ຖ້າບໍ່ໄດ້ກໍຈະຖືກແບນແບບເກົ່າ.
   6. ດຳເນີນການເນລະເທດຜູ້ອົບພະຍົບ: ທຣຳ ໄດ້ປະກາດພາວະສຸກເສີນບໍລິເວນພົມແດນສະຫະລັດ-ແມັກຊິໂກ ນອກຈາກນັ້ນ ຍັງມີການລົງນາມຍົກເລີກການໃຫ້ສັນຊາດ ອາເມຣິກາໂດຍອັດຕະໂນມັດ ກັບລູກຜູ້ອົບພະຍົບແບບຜິດກົດໝາຍ ທີ່ເກີດໃນສະຫະລັດ.
   7. ຍົກເລີກການລະບຸເພດອື່ນໆ ນອກຈາກຊາຍ ແລະ ຍິງ: ທຣຳ ລົງນາມໃນຄຳສັ່ງທີ່ໃຫ້ໜ່ວຍງານຂອງລັດຖະບານກາງ ຢຸດສົ່ງເສີມເລື່ອງອຸດົມການທາງເພດ ແລະ ກຳນົດໃຫ້ບາງໜ່ວຍງານ ເຮັດວຽກໂດຍຍອມຮັບສະເພາະເພດ ຊາຍ ແລະ ຍິງ ເທົ່ານັ້ນ.
   8. ປ່ຽນຊື່ອ່າວແມັກຊິໂກ ເປັນ ອ່າວອາເມຣິກາ: ນີ້ຍັງເປັນອີກໜຶ່ງຄວາມພະຍາຍາມທີ່ສະທ້ອນໃຫ້ເຫັນວ່າ ທຣຳ ຈະເອົາອາເມຣິກາ ເປັນສູນກາງໂດຍແທ້ ນອກຈາກນີ້ຍັງໄດ້ປ່ຽນຊື່ຍອດພູເຂົາ ເດນາລີ ໃນລັດອະລາສະກາ ເຊິ່ງເປັນຍອດເຂົາທີ່ສູງສຸດໃນປະເທດ ກັບມາເປັນຊື່ຍອດພູເຂົາ ແມັກຄີນລີ ເພື່ອໃຫ້ຄົນລຸ້ນຕໍ່ໆໄປ ສະເຫຼີມສະຫຼອງມໍລະດົກຂອງວິລະບູລຸດອາເມຣິກາ.

ນີ້ຍັງເປັນສ່ວນໜຶ່ງທີ່ໄດ້ລົງນາມເຊັນສັນຍາເທົ່ານັ້ນ, ຈຶ່ງເປັນທີ່ໜ້າຕິດຕາມວ່າຫຼັງຈາກນີ້ ອາເມຣິກາ ທີ່ຢູ່ໃນອຳນາດຂອງ ທຣຳ ຈະໄປໃນທິດທາງໃດ ແລ້ວຈະມີຜົນກັບເຮົາໜ້ອຍຫຼາຍປານໃດຫຼັງຈາກນີ້.