ໃນວັນທີ 20 ມັງກອນ 2025 ທີ່ຫ້ອງວ່າການແຂວງສະຫວັນນະເຂດ, ໄດ້ມີພິທີປະກາດການຈັດຕັ້ງການນຳຂັ້ນສູງ ຂອງແຂວງສະຫວັນນະເຂດຂຶ້ນ ໂດຍໃນໂອກາດນີ້ ໄດ້ຮັບກຽດເຂົ້າຮ່ວມຂອງທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຈັດຕັ້ງສູນກາງພັກ, ທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ.
ໃນພິທີ, ໄດ້ຜ່ານຄຳສັ່ງວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ສະບັບເລກທີ 01/ນຍ, ລົງວັນທີ 2 ມັງກອນ 2025, ໃນນີ້ນາຍົກລັດຖະມົນຕີໄດ້ອອກຄຳສັ່ງ ຍົກຍ້າຍທ່ານ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ ໄປຮັບໜ້າທີ່ໃໝ່ຢູ່ແຂວງສະຫວັນນະເຂດ.
ຜ່ານມະຕິຕົກລົງວ່າດ້ວຍການບົ່ງຕົວແຕ່ງຕັ້ງ ກຳມະການຄະນະບໍລິຫານພັກ ທັງເປັນກຳມະການປະຈຳພັກແຂວງສະຫວັນນະເຂດ ສະບັບເລກທີ 351/ຄລສພ, ລົງວັນທີ 2 ມັງກອນ 2025, ໃນນີ້ຄະນະເລຂາທິການສູນກາງພັກ ຕົກລົງບົ່ງຕົວແຕ່ງຕັ້ງ ທ່ານ ໂພໄຊ ໄຂຄຳພິທູນ ເປັນກຳມະການຄະນະບໍລິຫານງານ ທັງເປັນກຳມະການປະຈຳພັກແຂວງສະຫວັນນະເຂດ. ພ້ອມນັ້ນ ກໍ່ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງພະນັກງານ ສະບັບເລກທີ 92/ຈຂ, ລົງວັນທີ 17 ມັງກອນ 2025, ໃນນີ້ເຈົ້າແຂວງສະຫວັນນະເຂດ ແຕ່ງຕັ້ງທ່ານ ໂພໄຊ ໄຂຄຳພິທູນ ເປັນຮອງເຈົ້າແຂວງສະຫວັນນະເຂດ.
ແຫຼ່ງຂ່າວ: ສະຫວັນພັດທະນາ