ວັນທີ 13 ມັງກອນ 2025, ຢູ່ຫ້ອງວ່າການແຂວງວຽງຈັນ,ທ່ານ ໂຄອິສຶມິ ສຶໂຕມຶ ເອກອັກຄະຣັດຊະທູດວິສາມັນ ຜູ້ມີອຳນາດເຕັມແຫ່ງປະເທດຍີ່ປຸ່ນ ປະຈຳ ສປປ ລາວ ພ້ອມດ້ວຍຄະນະ ໄດ້ເດີນທາງມາເຮັດວຽກຢູ່ແຂວງວຽງຈັນ ແລະ ເຊັນສັນຍາການຊ່ວຍເຫຼືອລ້າຈາກລັດຖະບານຍີ່ປຸ່ນ (ໂຄງການກໍ່ສ້າງໂຮງຮຽນປະຖົມສົມບູນບ້ານນາຊູ ເມືອງກາສີ ແຂວງວຽງຈັນ) ໃນມູນຄ່າ 57,079 ກ່ວາໂດລາສະຫະລັດ.

ທັງນີ້ລັດຖະບານຍີ່ປຸ່ນຍັງຍົກໃຫ້ເຫັນການພົວພັນຮ່ວມມື ແລະ ການການຊ່ວຍເຫຼືອ ໃນຫຼາຍຂົງເຂດຜ່ານມາ ເປັນການປະກອບສ່ວນເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນໃຫ້ ໄດ້ຮັບການພັດທະນາຍິ່ງໆຂຶ້ນຢ່າງບໍ່ຢຸດຢັ້ງ. ນັບແຕ່ປີ 1995 ເປັນຕົ້ນມາແຂວງວຽງຈັນ ໄດ້ຮັບການຊ່ວຍເຫຼືອເພື່ອພັດທະນາຊັບພະຍາກອນ ມະນຸດ ແລະ ພື້ນຖານໂຄງລ່າງຈາກລັດຖະບານຍີ່ປຸ່ນ ໂດຍຜ່ານສະຖານເອກອັກຄະຣັດຊະທູດຍີ່ປຸ່ນ ປະຈຳ ສປປລາວ ລວມທັງໝົດ 37 ໂຄງການ, ລວມມູນຄ່າການຊ່ວຍເຫຼືອມາຮອດປະຈຸບັນ 2,931,175 ໂດລາສະຫະລັດ.

ແຫຼ່ງຂ່າວ: ແຂວງວຽງຈັນ