ຜູ້ບັງຄັງບັນຊາຕຳຫຼວດພູທອນໜອງຄາຍ ພ້ອມກັບໜ່ວຍງານທີ່ກ່ຽວຂ້ອງ ເດີນທາງມາຮັບມອບ 2 ຜູ້ຖືກຫາຄົນໄທຄະດີສຳຄັນ 2 ຄະດີ ທີ່ຫຼົບໜີຂ້າມມາທີ່ປະເທດລາວ ຈາກກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ ຖືເປັນຄວາມຮ່ວມມືອັນດີລະຫວ່າງກັນ ພາຍໃຕ້ຍຸດທະການໄລ່ລ່າແກັງຄ້າຢາຂ້າມປະເທດ.
ເມື່ອເວລາ 10:20 ໂມງ ຂອງວັນທີ 8 ມັງກອນ 2025 ຜູ້ບັງຄັບການຕຳຫຼວດພູທອນຈັງຫວັດໜອງຄາຍ ພ້ອມດ້ວຍຄະນະ ແລະເຈົ້າໜ້າທີ່ໜ່ວຍງານທີ່ກ່ຽວຂ້ອງ, ໄດ້ເດີນທາງຂ້າມມາຮັບມອບຜູ້ຖືກຫາໝາຍຈັບຄະດີສຳຄັນ 2 ຄະດີ. ຜູ້ຖືກຫາທັງສອງຄົນ ເຮັດຄວາມຜິດແລ້ວ ໄດ້ຫຼົບໜີຂ້າມມາຍັງປະເທດລາວ, ໂດຍມີ ພ.ອ. ກົງ ຄະນະສຸກ ຮອງຫົວໜ້າກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ ພ້ອມຄະນະເປັນຜູ້ສົ່ງມອບ ນະຫ້ອງປະຊຸມຊັ້ນ 2 ດ່ານສາກົນຂົວມິດຕະພາບລາວ-ໄທ ຝັ່ງປະເທດລາວ. ຖືເປັນຄວາມຮ່ວມມືອັນດີລະຫວ່າງຕຳຫຼວດພູທອນຈັງຫວັດໜອງຄາຍ ກັບກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ ທີ່ນັບມື້ຈະມີຄວາມແໜ້ນແຟ້ນເພີ່ມຫຼາຍຂຶ້ນ.
ຈາກນັ້ນໄດ້ນຳຕົວຜູ້ຖືກຫາທັງ 2 ຄົບກັບໄປຍັງດ່ານພົມແດນຂົວມິດຕະພາບໄທ-ລາວ ແຫ່ງທີ 1 ຈັງຫວັດໜອງຄາຍ ໂດຍ ພລ.ຕ.ຕ. ພິໄຣ ອຸດົມພິສຸດທິຄຸນ ຜູ້ບັງຄັບການຕຳຫຼວດພູທອນຈັງຫວັດໜອງຄາຍ ໄດ້ດຳເນີນການສອບຖາມເບື້ອງຕົ້ນຜູ້ຖືກຫາທັງສອງຄົນ.
ສຳລັບຜູ້ຖືກຫາທັງ 2 ຄົນທີ່ມີການສົ່ງມອບໃນຄັ້ງນີ້ ຜູ້ທີ 1 ພິວັດ ຫຼື ເໜ່ງ ຕັນຈະເລີນ, ອາຍຸ 35 ປີ ໂດຍກວ່າຫາວ່າ ຮ່ວມກັນມີຢາເສບຕິດໃຫ້ໂທດປະເພດທີ 1 (ເມທແອມເຟຕາມີນ) ເພື່ອຈຳໜ່າຍ ອັນເປັນການກະທຳເພື່ອການຄ້າ, ໃຊ້ກຳລັງປະສົງຮ້າຍ ຫຼື ຂູ່ເຂັນວ່າຈະໃຊ້ກຳລັງປະສົງຮ້າຍ ໂດຍມີອາວຸດ ຫຼື ໃຊ້ອາວຸດ ແລະກະທຳໃຫ້ເກີດຜົນກະທົບຕໍ່ຄວາມໝັ້ນຄົງຂອງລັດ ຫຼື ຄວາມປອດໄພຂອງປະຊາຊົນທົ່ວໄປ, ພະຍາຍາມຂ້າເຈົ້າພະນັກງານ, ຕໍ່ສູ້ ຫຼື ຂັດຂວງການປະຕິບັດໜ້າທີ່ຂອງເຈົ້າພະນັກງານ ໂດຍໃຊ້ກຳລັງປະສົງຮ້າຍ.ເຊິ່ງລາຍລະອຽດກ່ຽວກັບຄະດີນີ້ ຄືເມື່ອວັນທີ 22 ຕຸລາ 2024 ເວລາປະມານ 22:35 ໂມງ, ເຈົ້າໜ້າທີ່ຕຳຫຼວດ ໄດ້ເຂົ້າຈັບກຸມແກັງຄ້າຢາເສບຕິດໃນພື້ນທີ່ສາຍໄໝ ແລະສາມາດຈັບຜູ້ຖືກຫາໄດ້ 2 ຄົນ, ສ່ວນທ້າວ ເໜ່ງ ຕັນຈະເລີນ ໄດ້ໃຊ້ອາວຸດປືນຍິງເຈົ້າໜ້າທີ່ຕຳຫຼວດເພື່ອເປີດທາງຫຼົບໜີ ແລະສາມາດຫຼົບໜີອອກຈາກທີ່ເກີດເຫດໄປໄດ້.
ເຈົ້າໜ້າທີ່ຕຳຫຼວດຈຶ່ງໄດ້ດຳເນີນການສືບສວນສວບສວນ ຈົນໄດ້ຮູ້ວ່າທ້າຍ ເໜ່ງ ຕັນຈະເລີນ ໄດ້ຫຼົບໜີຂ້າມມາຍັງປະເທດລາວ ຈຶ່ງໄດ້ປະສານຂໍຄວາມຮ່ວມມືໃນການຈັບກຸມມາໄວ້ທີ່ກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ ເປັນທີ່ມາຂອງຍຸດທະການໄລ່ລ່າແກັງຄ້າຢາຂ້າມປະເທດ.ອີກຄົນແມ່ນຊື່ວ່າ ທ້າວ ສັດຈະຍາ ຫຼື ໂບດ ເພັງນວນ, ໂດຍຖືກກ່າວຫາວ່າ ສະໜັບສະໜຸນ ຜູ້ກະທຳຄວາມຜິດ, ສົມຄົບຄິດຕົກລົງກັນຕັ້ງແຕ່ 2 ຄົນຂຶ້ນໄປ ແລະຮ່ວມກັນຈຳໜ່າຍຢາເສບຕິດໃຫ້ໂທດປະເພດທີ 1 (ເມທແອມຕາມິນ) ຕາມໝາຍຈັບສານອາຍາ ລົງວັນທີ 25 ສິງຫາ 2024.ເຫດເກີດເມື່ອວັນທີ 22 ມິຖຸນາ 2024, ເວລາປະມານ 12:00 ໂມງ, ເຈົ້າໜ້າທີ່ຮ່ວມກັນຈັບກຸມຜູ້ຖືກຫາຈຳນວນ 3 ຄົນ ພ້ອມຂອງກາງຢາບ້າ 184,800 ເມັດ ແລະ ຢາບ້າປຽກນ້ຳ ນ້ຳໜັກລວມ 3,958 ກຣາມ, ອາວຸດປືນພົກສັ້ນ .38 ຍີ່ຫໍ້ Glock 1 ກະບອກ ບໍ່ມີເຄື່ອງໝາຍເລກທະບຽນ ພ້ອມເຄື່ອງລູກປືນຈຳນວນ 47 ນັດ.
ຈາກນັ້ນເຈົ້າໜ້າທີ່ຮ່ວມສອບສວນຂະຫຍາຍຜົນເພື່ອຂໍອະນຸມັດຈັບກຸມບຸກຄົນຜູ້ສັ່ງການ ແລະຮ່ວມກັນກະທຳຄວາມຜິດໃນຄະດີນີ້ ເຊິ່ງຕໍ່ມາຮູ້ວ່າໄດ້ຫຼົບໜີມາທີ່ປະເທດລາວ. ຜູ້ບັງຄັບການຕຳຫຼວດພູທອນຈັງຫວັດໜອງຄາຍ ຈຶ່ງໄດ້ປະສານຂໍຄວາມຮ່ວມມືມາຍັງ ກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ ເພື່ອຕິດຕາມຈັບກຸມຜູ້ຖືກຫາ ນຳຕົວມາດຳເນີນຄະດີຕາມກົດໝາຍປະເທດໄທ.ຕໍ່ມາທາງປະເທດລາວ ໄດ້ຄວບຄຸມຕົວຜູ້ຖືກຫາຕາມໝາຍຈັບທັງ 2 ລາຍໄດ້ແລ້ວ ຈຶ່ງໄດ້ນຳຕົວມາສົ່ງມອບໃຫ້ທາງການໄທ ເພື່ອດຳເນີນຄະດີຕາມກົດໝາຍຕໍ່ໄປ.
ທ້າວ ອະພິວັດ ຫຼື ເໜ່ງ ຕັນຈະເລີນ ໜຶ່ງໃນຜູ້ຖືກຫາ ໄດ້ກ່າວຂໍໂທດເຈົ້າໜ້າທີ່ຕຳຫຼວດທີ່ຕົນຍິງ ເພື່ອເປີດທາງຫຼົບໜີ ວ່າບໍ່ໄດ້ຕັ້ງໃຈ ບໍ່ມີເຈດຕະນາທີ່ຈະຍິງ ເກີດອາລົມຊົ່ວວູບ ແລະສະຖານນະການບັງຄັບ.
ຫຼັງຈາກດຳເນີນການຕາມຂັ້ນຕອນຕ່າງໆ ທີ່ຈັງຫວັດໜອງຄາຍແລ້ວ ກໍໄດ້ສົ່ງມອບຕົວຜູ້ຖືກຫາທັງ 2 ຄົນໃຫ້ກັບເຈົ້າໜ້າທີ່ປະຈຳທີ່ເກີດເຫດ ເພື່ອນຳໄປດຳເນີນຄະດີຕາມຂັ້ນຕອນຂອງກົດໝາຍຕໍ່ໄປ.
ທີ່ມາ: Nongkhai News Online