ເຈົ້າໜ້າທີ່ຄະດີອາຍາ-ເສດຖະກິດ ປກສ ເມືອງໄຊບູລີມອບຂອງກາງຄະດີລັກຊັບພົນລະເມືອງຄືນໃຫ້ເຈົ້າຂອງເດີມ ເປັນສາຍຄໍຄ້າຍຄືຄໍາຈໍານວນ 3 ເສັ້ນ ນໍ້າໜັກ 2 ບາດ ແລະ ປະລັກແຂນ ສີຂາວຄ້າຍຄືເງິນ 1 ວົງ
ຕາມການໃຫ້ຂໍ້ມູນໃຫ້ຮູ້ວາ: ໃນວັນທີ 12 ພະຈິກ 2024. ທ້າວ ພູຂົງ ຫຼື ທ້າວເຈັກ ບ້ານກາງ ເມືອງໄຊບູລີ ແຂວງສະຫວັນນະເຂດ. ໄດ້ມາແຈ້ງຄວາມຕໍ່ເຈົ້າໜ້າທີ່ຕໍາຫຼວດຄະດີອາຍາ-ເສດຖະກິດ ເມືອງໄຊບູລີວ່າ: ກະເປົາເງິນຂອງຕົນເສຍຢູ່ພາຍໃນເຮືອນຂອງຕົນເອງໃນວັນທີ 22 ຕຸລາ 2024. ໃນນັ້ນປະກອບມີເງິນກີບຈໍານວນ 18 ລ້ານກີບ. ເງິນບາດໄທ 14 ພັນບາດ. ເງິນໂດລາສະຫະລັດ 300 ໂດລາ. ເງິນຢວນ 50 ຢວນ. ສາຍຄໍຄໍາ 3 ເສັ້ນ ນໍ້າໜັກ 2 ບາດ ແລະ ປະລັກແຂນເງິນ 1 ວົງ.
ຜູ້ເສຍຫາຍຍັງໄດ້ໃຫ້ຂໍ້ມູນເປົ້າ ໝາຍລັກຊັບພົນລະເມືອງຢ່າງຈະແຈ້ງ ຈົນນໍາໄປສູ່ຂະບວນການສືບ-ສວນສອບຂອງເຈົ້າໜ້າທີ່ ແລະ ສາມາດ ກັກຕົວ ທ້າວ ຫວັ່ນ ອາຍຸ 37 ປີ ອາຊີບ ເຮັດນາຢູ່ບ້ານກາງ ເມືອງໄຊບູລີ ເຊິ່ງເປັນ ຜູ້ຕ້ອງຫາມາດໍາເນີນຄະດີໄດ້ຕາມລະບຽບກົດໝາຍ ໃນຄັ້ງວັນທີ 20 ພະຈິກ 2024.
ມາຮອດວັນທີ ວັນທີ 25 ທັນວາ 2024. ຈິ່ງໄດ້ມີການມອບຄືນຂອງກາງຈໍານວນໜຶ່ງທີ່ຢຶດຄືນມາໄດ້ ຈາກຜູ້ຕ້ອງຫາໃນຄະດີດັ່ງກ່າວ ແລະ ມອບຄືນໃຫ້ແກ່ ທ້າວ ພູຂົງ ຫຼື ທ້າວເຈັກ ອາຍຸ 45 ປີ ອາຊີບເຮັດນາຢູ່ບ້ານກາງ ເມືອງໄຊບູລີ ແຂວງ ສະຫວັນນະເຂດ. ປະເພດ ວັດຖຸທີ່ມອບປະກອບມີ ສາຍຄໍຄ້າຍຄືຄໍາຈໍານວນ 3 ເສັ້ນ ນໍ້າໜັກ 2 ບາດ, ປະລັກແຂນສີຂາວຄ້າຍຄືເງິນ 1 ວົງ.
ແຫຼ່ງຂ່າວ: ປສກ ເມືອງໄຊບູລີ