ກຽມພ້ອມວຽກງານປ້ອງກັນ ແລະ ສະກັດກັ້ນອຸບປະຕິເຫດຈະລາຈອນທາງບົກ
ໃນໄລຍະການສະເຫຼີມ ສະຫຼອງສົ່ງທ້າຍປີເກົ່າ – ຕ້ອນຮັບປີໃໝ່ສາກົນ ປະຈໍາປີ 2025
ເພື່ອເຮັດໃຫ້ການສະເຫຼີມສະຫຼອງ ສົ່ງທ້າຍປີເກົ່າ – ຕ້ອນຮັບປີໃໝ່ ສາກົນ 2025 ໃຫ້ມີຄວາມເບີກບານມ່ວນຊື່ນ ແລະ ຫຼີກເວັ້ນຜົນເສຍຫາຍທາງດ້ານຊີວິດ, ສຸຂະພາບ ແລະ ຊັບສິນ ທີ່ເກີດຈາກອຸປະຕິເຫດຈະລາຈອນທາງບົກ
ເພື່ອສະກັດກັ້ນການລະເມີດລະບຽບການ, ດໍາລັດວ່າດ້ວຍກົດຈະລາຈອນທາງບົກ ແລະ ອື່ນໆ, ເພື່ອຫຼຸດຜ່ອນການເກີດອຸບປະຕິເຫດ ກົມຕຳຫຼວດຈະລາຈອນ ໄດ້ອອກຄຳແນະນຳ ເຖິງພະແນກຕຳຫຼວດຈະລາອຈນ ປກສ ແຂວງ, ນະຄອນຫຼວງ ແລະ ເຂດເສດຖະກິດພິເສດສາມຫຼ່ຽມຄຳ ໃຫ້ເອົາໃຈໃສ່ຊີ້ນຳກຳລັງຂອງຕົນ ປະຕິບັດໜ້າທີ່ ອຳນວຍຄວາມສະດວກໃຫ້ຜູ້ໃຊ້ລົດໃຊ້ຖະໜົນ ແລະ ການກວດກາ ບັງຄັບໃຊ້ກົດໝາຍຕໍ່ຜູ້ທີ່ລະເມີດກົດຈະລາຈອນ, ເພືີ່ອເປັນການປ້ອງກັນສະກັດກັ້ນບໍ່ໃຫ້ການເກີດອຸບປະຕິເຫດ ໃນໄລຍະການສົ່ງທ້າຍປີເກົ່າ 2024 ແລະ ຕ້ອນຮັບປີໝ່ ປີ 2025 ຢ່າງເຂັ້ມງວດ.

ກົມຕໍາຫຼວດຈະລາຈອນ ຈຶ່ງໄດ້ອອກແຈ້ງການນີ້ເຖິງ: ພໍ່ແມ່ປະຊາຊົນ, ພະນັກງານ, ທະຫານ, ຕໍາຫຼວດ ແລະ ຜູ້ໃຊ້ລົດ -ໃຊ້ຖະໜົນ ໃຫ້ເຄົາລົບກົດຈະລາຈອນ ແລະ ໃຫ້ຄວາມຮ່ວມມືຕໍ່ການປະຕິບັດໜ້າທີ່ຂອງເຈົ້າໜ້າທີ່ ໂດຍສະເພາະຕໍ່ບັນຫາ ດັ່ງນີ້:

1. ຜູ້ຂັບຂີ່ລົດຕ້ອງກຽມຄວາມພ້ອມ ດ້ານສຸຂະພາບຮ່າງກາຍ, ເອກະສານຂອງຜູ້ຂັບຂີ່ ແລະ ພາຫະນະ ໃຫ້ຄົບຊຸດຕາມລະບຽບການ ເຊັ່ນ: ໃບຂັບຂີ່, ໃບທະບຽນ, ໃບກວດກາເຕັກນິກ, ໃບຢັ້ງຢືນເສຍຄ່າຄຳນຽມທາງ, ປະກັນໄພ, ແລະ ໃບອະນຸຍາດດໍາເນີນທຸລະກິດ ສໍາລັບລົດຂົນສົ່ງສີນຄ້າ ແລະ ລົດໂດຍສານ.
2. ຜູ້ຂັບຂີ່ລົດຈັກ ຕ້ອງໃສ່ໝວກກັນກະທົບ ທັງຜູ້ຂັບ ແລະ ຜູ້ຊ້ອນທ້າຍ ເພື່ອຄວາມປອດໄພຂອງທ່ານ.
3. ຜູ້ຂັບຂີ່ລົດໃຫຍ່ ຕ້ອງຮັດສາຍແອວນິລະໄພ ເພື່ອຮັບປະກັນຄວາມປອດໄພໃຫ້ແກ່ຜູ້ຂັບຂີ່ ແລະ ຜູ້ໂດຍສານ.
4. ກ່ອນຈະນຳໃຊ້ພາຫະນະຕ້ອງກວດສະພາບເຕັກນິກ ແລະ ຄວາມພ້ອມຂອງພາຫະນະໃຫ້ມີຄວາມຮັບປະກັນເປັນຢ່າງດີ.
5. ລົດຂົນສົ່ງໂດຍສານທາງໄກ ຕ້ອງມີໂຊເຟີສຳຮອງ ທຸກຄັ້ງໃນເວລາເດີນທາງ.
6. ສະເພາະເສັ້ນທາງດ່ວນ , ການໃຊ້ຄວາມໄວສູງສຸດບໍ່ໃຫ້ເກີນ 120 km/ ຊົ່ວໂມງ ແລະ ຄວາມໄວຕໍ່າສຸດບໍ່ໃຫ້ຫຼຸດ 80 km/ຊົ່ວໂມງ.
7. ຜູ້ຂັບຂີ່ພາຫະນະຕ້ອງເຄົາລົບ ແລະ ປະຕິບັດຕາມກົດລະບຽບຈະລາຈອນ ຢ່າງເຂັ້ມງວດ, ກໍລະນີລະເມີດ ທາງເຈົ້າໜ້າທີ່ຈະນຳໃຊ້ມາດຕະການສຶກສາອົບຮົມ, ລະເມີດຫຼາຍມາດຕາແມ່ນຈະຂຽນໃບສັ່ງກັກເອກະສານທີ່ກ່ຽວຂ້ອງໄວ້ ( ຖ້າຫາກລະເມີດຮ້າຍແຮງມີຄວາມສ່ຽງທີ່ຈະພາໃຫ້ເກີດອຸບປະຕິເຫດ ເຈົ້າໜ້າທີ່ຈະໄດ້ກັກພາຫະນະໄວ້ຊົ່ວຄາວ ).

ຂໍ້ຫ້າມສໍາລັບຜູ້ຂັບຂີ່ພາຫະນະ.
1. ຫ້າມຜູ້ຂັບຂີ່ພາຫະນະ ນໍາໃຊ້ໂທລະສັບ ໃນເວລາຂັບຂີ່ ຢ່າງເດັດຂາດ.
2. ຫ້າມຜູ້ຂັບຂີ່ດື່ມສີ່ງມືນເມົາ ( ເມົາຫ້າມຂັບຂີ່ລົດ ) ຢ່າງເດັດຂາດ ຖ້າຫາກກວດກາພົບເຫັນ ເຈົ້າໜ້າທີ່ຕຳຫຼວດຈະລາຈອນຈະໄດ້ກັກໄວ້, ຊ່ວງເມົາແລ້ວຈື່ງອະນຸຍາດໃຫ້ໄປ ຫຼື ໃຫ້ຍາດພີ່ນ້ອງໝູ່ຄູ່ມາຮັບເອົາ ເພື່ອຮັບປະກັນຄວາມປອດໄພ.
3. ຫ້າມຂັບຂີ່ລົດໄວເກີນກົດໝາຍກຳນົດ ( ສຳລັບລົດຂົນສົ່ງໂດຍສານ ຫ້າມແລ່ນໄວເກີນ 80 Km/h ຕາມເສັ້ນທາງຫຼວງ ສະເພາະຢູ່ເຂດນອກເມືອງ )
4. ຫ້າມຜູ້ຂັບຂີ່ດັດແປງສະພາບເຕັກນິກຍານພາຫະນະໂດຍການຕິດຕັ້ງອຸປະກອນປະເພດໄຟສະປອດໄລ້ທີ່ມີຄວາມສະຫວ່າງສູງ (ສົ່ງຜົນກະທົບຕໍ່ຜູ້ຂັບຂີ່ທີ່ສັນຈອນຕາມເສັ້ນທາງໃນຍາມກາງຄືນ).
5. ຫ້າມຂັບຂີ່ພາຫະນະ ເປັນພືງເປັນແພ, ຊ່ວງຊີງກັນຕາມເສັ້ນທາງ ຢ່າງເດັດຂາດ.
6. ຫ້າມນຳໃຊ້ລົດກະບະ ບັນທຸກຄົນໂດຍສານໃສ່ກະບະ ຢ່າງເດັດຂາດ.
7. ຫ້າມນຳໃຊ້ລົດຂົນສົ່ງໂດຍສານ ບັນທຸກສີນຄ້າ ແລະ ບັນທຸກຜູ້ໂດຍສານເກີນກຳນົດ ແລະ ຊ່ວງຊີງເອົາຜູ້ໂດຍສານຢ່າງເດັດຂາດ.
8. ຫ້າມຜູ້ປົກຄອງປະປ່ອຍໃຫ້ເດັກນ້ອຍ ທີ່ອາຍຸບໍ່ເຖິງກະສຽນ ຂັບຂີ່ພາຫະນະຢ່າງເດັດຂາດ.
9. ຫ້າມຈອດລົດຕາມເສັ້ນທາງດ່ວນຢ່າງເດັດຂາດ ( ຍົກເວັ້ນກໍລະນີພາຫະນະເປ່ເພ ).
10. ທາງເຈົ້າໜ້າທີ່ຈະໄດ້ເພີ່ມມາດຕະການກວດກາ ຖ້າບຸກຄົນໃດລະເມີດ ຈະຖືກສຶກສາອົບຮົມ ແລະ ປັບໃໝຕາມລະບຽບກົດໝາຍ ຢ່າງເຂັ້ມງວດ.
11. ສ່ວນການສະເຫຼີມສະຫຼອງປີໃໝ່ ແມ່ນໃຫ້ຈັດຕັ້ງປະຕິບັດຕາມແຈ້ງການ ຂອງອໍານາດການປົກຄອງທ້ອງຖີ່ນ ຂອງຕົນໄດ້ກໍານົດໄວ້.
ຖ້າບຸກຄົນໃດທີ່ລະເມີດຕໍ່ດໍາລັດວ່າດ້ວຍກົດຈະລາຈອນທາງບົກ ຈະຖືກສຶກສາອົບຮົມ ແລະ ປັບໃໝຕາມລະບຽບກົດໝາຍ ຢ່າງເຂັ້ມງວດ.