ໝຸ່ມອິນເດຍສຸດງົງ ເຜີເຮັດໂທລະສັບຕົກລົງໃນຕູ້ບໍລິຈາກ ແຕ່ວັດບໍ່ຍອມຄືນໃຫ້ ໂດຍອ້າງວ່າເປັນສົມບັດອຸທິດໃຫ້ແກ່ພະເຈົ້າແລ້ວ ເຊິ່ງເປັນໄປຕາມກົດລະບຽບ.
ເວັບໄຊ້ຂ່າວຕ່າງປະເທດ ລາຍງານໃນວັນທີ 24 ທັນວາ 2024 ນີ້ເກີດເຫດການສຸດງົງຂຶ້ນໃນປະເທດອິນເດຍ ເມື່ອຊາຍໜຸ່ມຜູ້ສັດທາລາຍໜຶ່ງບໍລິຈາກເງິນໃສ່ຕູ້ບໍລິຈາກ ແຕ່ເຜີເຮັດໂທລະສັບໄອໂຟນຕົກລົງໄປນຳ ຈຶ່ງໄດ້ແຈ້ງຂໍຄວາມຊ່ວຍເຫຼືອຈາກທາງວັດ ແຕ່ຖືກປະຕິເສດ ເຊິ່ງທາງວັດໄດ້ອ້າງວ່າໂທລະສັບເປັນສົມບັດ ອຸທິດໃຫ້ແກ່ພະເຈົ້າແລ້ວ.
ພາຍຫຼັງເລື່ອງດັ່ງກ່າວໄດ້ຖືກເຜີຍແຜ່ລົງສື່ສັງຄົມອອນລາຍ ທາງດ້ານລັດຖະມົນຕີກະຊວງກິດຈະການສາດສະໜາ ແລະ ການບໍລິຈາກເພື່ອການກຸສົນຂອງກະຊວງຣິນດູ ໄດ້ອອກມາສະໜັບສະໜູນການກະທຳຂອງວັດ ພ້ອມອະທິບາຍວ່າ: ຕາມກົດ “Hundial Rules” ທີ່ປະກາດໃຊ້ໃນປີ 1975 ລະບຸວ່າ: ສິ່ງຂອງໃດ ທີ່ຢູ່ໃນຕູ້ບໍລິຈາກຂອງວັດ ບໍ່ວ່າຈະຕັ້ງໃຈ ຫຼື ບໍ່ຕັ້ງໃຈກໍຕາມ ທັງໝົດຈະເປັນສ່ວນໜຶ່ງຂອງພະເຈົ້າ ດັ່ງນັ້ນຕາມກົດລະບຽບຈຶ່ງບໍ່ອະນຸຍາດໃຫ້ເຈົ້າໜ້າທີ່ທາງວັດຄືຂອງທີ່ທວາຍແກ່ຜູ້ສັດທາ ຫຼື ຜູ້ທີມາບໍລິຈາກໄດ້ ແຕ່ຈະຫາທາງກັບເຈົ້ານ້າທີ່ກ່ຍວຂ້ອງເພື່ອສຶກສາທາງເລືອກໃນການຊົດໃຊ້ທີ່ເປັນໄປໄດ້.
ທັງນີ້ ອິນເດຍກໍເຄີຍເກີດເຫດການລັກສະນະນີ້ຂຶ້ນໃນປີ 2023 ເຊິ່ງມີຜູ້ຍິງຄົນໜຶ່ງເຜີເຮັດສາຍຄໍຄຳໜັກ 2 ບາດຕົກລົງໄປໃນຕູ້ບໍລິຈາກ ແຕ່ທາງວັດກໍບໍ່ໄດ້ຄືສາຍຄໍໃຫ້ ຈົນລາວໄດ້ແຈ້ງກັບທາງວັດວ່າມີບັນຫາການເງິນ ໃນທີ່ສຸດປະທານວັດກໍໄດ້ໃຊ້ເງິນຂອງຕົວເອງເພື່ອຊື້ສາຍຄໍເສັ້ນໃໝ່ໃຫ້ເປັນຄ່າຊົດໃຊ້.