ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫຼວງວຽງຈັນ ໃຫ້ຮູ້ໃນໂອກາດລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ຈັດຂຶ້ນໃນລະຫວ່າງວັນທີ 16-24 ທັນວາ 2024 ວ່າ: ປີ 2024 ນີ້, ນະຄອນຫຼວງວຽງຈັນ ໄດ້ສຸມໃສ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບ ດ້ານ ຮັບປະກັນໄດ້ຄວາມສະຫງົບປອດໄພ ທົ່ວສັງຄົມໂດຍພື້ນຖານ, ໂດຍສະເພາະ ແມ່ນໃນໄລຍະກອງປະຊຸມສຸດຍອດອາ ຊຽນ ທີ່ ສປປ ລາວ ເປັນເຈົ້າພາບ ແລະ ກອງປະຊຸມກ່ຽວຂ້ອງ ທີ່ນະ ຄອນຫຼວງວຽງຈັນເປັນເຈົ້າພາບ; ສຸມໃສ່ປະຕິບັດໂຄງການແກ້ໄຂປະກົດການຫຍໍ້ທໍ້ໃນສັງຄົມຕາມແຜນການທີ່ວາງໄວ້, ໂດຍສະເພາະແມ່ນ ການຄວບຄຸມ ແລະ ແກ້ໄຂບັນ ຫາປະກົດການຫຍໍ້ທໍ້ ແລະ ການຖືອາວຸດເສິກ, ສາມາດສ້າງບ້ານປ້ອງກັນຄວາມ ສະຫງົບ ໄດ້ 412 ບ້ານ.
ເຊິ່ງໄດ້ເຮັດໃຫ້ເກີດຄວາມສະຫງົບ ພາຍໃນນະຄອນຫຼວງວຽງຈັນ ໄດ້ເປັນສ່ວນໃຫຍ່, ໄດ້ສຸມໃສ່ຮັກສາຄວາມສະຫງົບ-ຄວາມເປັນລະບຽບຮຽບຮ້ອຍຕາມຊາຍ ແດນ ເພື່ອປ້ອງກັນການລັກລອບຂ້າມ ແລະ ຄ້າ-ຂາຍເຖື່ອນຕາມຊາຍແດນແບບຜິດກົດໝາຍ; ໃນຍາມເກີດໄພພິບັດນໍ້າຖ້ວມ ແລະ ໄຟໄຫມ້ ກອງກໍາລັງ ປກຊ ແລະ ປກສ ໄດ້ສຸມໃສ່ແກ້ໄຂຢ່າງທັນການ.
ທ່ານ ອາດສະພັງທອງ ສີພັນດອນ ຍົກໃຫ້ເຫັນຕື່ມວ່າ: ນອກຈາກນີ້, ນະຄອນຫຼວງວຽງຈັນ ໄດ້ຈັດຕັ້ງປະຕິບັດ 6 ແຜນວຽກຈຸດສຸມ ວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດຢ່າງຕັ້ງຫນ້າ, ໃນນີ້: ແມ່ນໄດ້ລົງເຄື່ອນໄຫວໂຄສະນາ, ສຶກສາອົບຮົມໃນກຸ່ມເປົ້າໝາຍ ເຊັ່ນ: ໂຄສະນາ ເຜີຍແຜ່ກົດໝາຍ ແລະ ຜົນຮ້າຍຂອງຢາເສບຕິດ ຜ່ານສື່ສັງຄົມອອນລາຍ; ໂຄສະນາຢູ່ຫົວໜ່ວຍທຸລະກິດ, ໂຄສະນາຢູ່ຕາມບ້ານ, ຕາມສະຖານທີ່ໂຮງຮຽນ ແລະ ໄດ້ສຶກສາອົບຮົມເປົ້າໝາຍພົວພັນຢາເສບຕິດ ຢູ່ຂັ້ນພື້ນຖານບ້ານ ຈໍານວນ 236 ຄັ້ງ, ມີຜູ້ເຂົ້າຮ່ວມ 959 ຄົນ, ຍິງ 63 ຄົນ; ແກ້ໄຂຄະດີຢາເສບຕິດ ໄດ້ 965 ເລື່ອງ, ກັກຜູ້ຖືກຫາ 1,834 ຄົນ, ຍິງ 207 ຄົນ ພ້ອມທັງຍຶດເຄື່ອງກາງຄະດີປະ ເພດຕ່າງໆ. ນອກຈາກນັ້ນໄດ້ປິ່ນປົວ, ຟື້ນຟູຜູ້ຕິດຢາເສບຕິດ ແລະ ສົ່ງກັບຄືນບ້ານເຮືອນຂອງຕົນ ໄດ້ 455 ກວ່າຄົນ, ປັດຈຸບັນທີ່ສູນສົມສະຫງ່າ ກໍາລັງສຸມໃສ່ປິ່ນປົວ ແລະ ຟື້ນຟູຜູ້ຕິດຢາເສບຕິດ ຈໍານວນ 969 ຄົນ, ຍິງ 53 ຄົນ.
ຂ່າວ: ວສລ