ອັບເດດຄວາມຄືບໜ້າ, ສາເຫດຂອງການເສຍຊີວິດຂອງ ຜິງ ຊະຢາດາ ບໍ່ແມ່ນຈາກການນວດ ແຕ່ພົບແມ່ນການຕິດເຊື້ອໃນກະແສເລືອດ ສຳລັບສາເຫດການເສຍຊີວິດ.
ອີງຕາມການລາຍກງານຜ່ານສຳນັກຂ່າວ Thairath ຈາກກໍລະນີ ຜິງ ຊະຢາດາ ອາຍຸ 20 ປີ ນັກຮ້ອງລູກທົ່ງໝໍລຳລົດແຫ່ຈາກປະເທດໄທ ໄດ້ເສຍຊີວິດເມື່ອວັນທີ 8 ທັນວາ 2024 ທີ່ຜ່ານມາ ຫຼັງຈາກທີ່ໄປນວດຢູ່ຮ້ານນວດແຫ່ງໜຶ່ງໃນເທດສະບານນະຄອນອຸດອນທານີ ເມື່ອປະມານ 3 ເດືອນກ່ອນ ເນື່ອງຈາກຜູ້ກ່ຽວມີອາການປວດບໍລິເວນຄໍ ແລະ ບ່າ ໂດຍໄດ້ລະບຸວ່າ ມີການຫັກຄໍ ຫຼື ບິດຄໍ ຫຼັງຈາກນັ້ນກໍໄດ້ມີອາການປວດຊາຕາມຕົນໂຕ. ເມື່ອໄປຫາໝໍຜົນເອັກສະເລເຫັນວ່າກະດູກຄໍເຄື່ອນທັບເສັ້ນປະສາດ ກ່ອນທີ່ອາການຈະຮຸ່ນແຮງຂຶ້ນຈົນຕ້ອງໄປຮັກສາໃນຫ້ອງ ICU ເປັນເວລາ 10 ມື້ ກ່ອນຈະເສຍຊີວິດ ທີ່ໂຮງໝໍເທດສະບານນະຄອນອຸດອນທານີ.
ຄວາມຄືບໜ້າຫຼ້າສຸດ, ຄະນະສຳນັກງານສາທາລະນະສຸກຈັງຫວັດອຸດອນທານີ ໄດ້ຈັດຖະແຫຼງການ ເພື່ອອັບເດດສາເຫດການເສຍຊີວິດຂອງ ຜິງ ຊະຢະດາ ໃນເວລາ 09:00 ໂມງ ຂອງວັນທີ 9 ທັນວາ 2024, ຜົນກວດໄດ້ພົບວ່າ ສາເຫດຂອງການເສຍຊີວິດ ແມ່ນເກີດມາຈາກອາການຕິດເຊື້ອໃນກະແສເລືອດ ແລະຍັງກວດພົບການຕິດເຊື້ອຣາ. ເຊິ່ງສາເຫດຂອງການຕິດເຊື້ອໃນຄັ້ງນີ້ ແມ່ນຍັງບໍ່ສາມາດລະບຸໄດ້ຢ່າງຊັດເຈນວ່າເກີດຂຶ້ນມາຈາກໃສໄດ້ແດ່, ອາດຈະຕິດມາກ່ອນ ການໄປໃຊ້ບໍລິການຮ້ານນວດ ຫຼື ຕິດເຊື້ອໃນຊ່ວງທີ່ມີອາການເຈັບປ່ວຍແລ້ວນອນຕິດຕຽງ ໂດຍອີງໃສ່ກັບຫຼັກຖານທາງວິທະຍາສາດປະກອບເຂົ້ານຳການກວດຫາສາເຫດ. ທັງນີ້ກໍຂຶ້ນກັບຍາດພີ່ນ້ອງຂອງຜູ້ເສຍຊີວິດໃນການໃຊ້ສິດຮ້ອງທຸກເພື່ອຫາສາເຫດຕໍ່ໄປ.
ຢ່າງໃດກໍຕາມ, ຈາກການລົງກວດຮ້ານນວດດັ່ງກ່າວ ໂດຍສຳນັກງານສາທາລະນະສຸກຈັງຫວັດອຸດອນທານີ ຮ່ວມກັບສູນບໍລິການສຸຂະພາບທີ 8 ເຫັນວ່າ ຮ້ານນວດໄດ້ຮັບອະນຸຍາດຢ່າງຖືກຕ້ອງຕາມກົດໝາຍ, ມີພະນັກງານນວດ 7 ຄົນ, ສາມາດສະແດງໃບຮັບຮອງການເຝິກອົບຮົມແບບການນວດເພື່ອສຸຂະພາບ 150 ຊົ່ວໂມງໄດ້ 6 ຄົນ, ອີກ 1 ຄົນແມ່ນກວດສອບຜ່ານລະບົບອິເລັກໂທນິກ ລະບຸວ່າຜ່ານການເຝິກອົບຮົມ 150 ຊົ່ວໂມງເຊັ່ນດຽວກັນ.
ສຳລັບພະນັກງານນວດທີ່ນວດໃຫ້ກັບຜູ້ເສຍຊີວິດທັງ 2 ເທື່ອແມ່ນຍັງບໍ່ສາມາດໃຫ້ຄຳຕອບໄດ້ເທື່ອ ເຊິ່ງຍັງຢູ່ໃນຂັ້ນຕອນຂອງການໄລ່ເຫດການຄືນ ເນື່ອງຈາກຜູ້ເສຍຊີວິດໄດ້ເຂົ້າມາໃຊ້ບໍລິການທີ່ຮ້ານນວດດັ່ງກ່າວດົນແລ້ວ.