ທ່ານ ຄໍາພັນ ພົມມະທັດ, ປະທານອົງການກວດກາແຫ່ງລັດ ໄດ້ຂຶ້ນລາຍງານຜົນການກວດກາຕາມມະຕິສະພາ ສະບັບເລກທີ 113/ສພຊ, ລົງວັນທີ 21 ພະຈິກ 2023 ຕໍ່ກອງປະຊຸມສະໄໝສາມັນ ເທື່ອທີ 8 ສະພາແຫ່ງຊາດ ຊຸດທີ IX ໃນວັນທີ 27 ພະ ຈິກ 2024.
ຜ່ານການປະຕິບັດວຽກງານຕົວຈິງໄດ້ຮັບຜົນສໍາເລັດຫລາຍດ້ານໃນນີ້ ສະເພາະການ ສະກັດກັ້ນ ແລະ ຕ້ານການສໍ້ລາດບັງ ຫຼວງ ໄດ້ຈັດຕັ້ງປະຕິບັດ ແລະ ໄດ້ຮັບຜົນສໍາເລັດ ດັ່ງນີ້:
– ດໍາເນີນການສືບສວນ-ສວບສວນຄະດີສໍ້ລາດບັງຫຼວງສຳເລັດ 04 ເລື່ອງ ມີຄວາມເສຍຫາຍທັງໝົດເປັນເງິນກີບ 115,08 ຕື້ກີບ, ເປັນເງິນບາດ 3,2 ລ້ານບາດ, ເປັນເງິນໂດລາ 25,61 ລ້ານໂດລາສະຫະລັດ, ເປັນເງິນຢວນ 7,8ລ້ານຢວນ; ພົວພັນກັບເປົ້າໝາຍ 208 ຄົນ, ດຳເນີນຄະດີ 40 ຄົນ ມີຕ່າງປະເທດ 02 ຄົນ, ກັກຕົວ 39 ຄົນ, ແກ້ໄຂທາງລະບຽບບໍລິຫານ 158 ຄົນ; ໃນນີ້ ເກັບກູ້ໄດ້ແລ້ວເປັນເງິນກີບ 63,62 ຕື້ກີບ, ເປັນເງິນບາດ 200.000 ບາດ, ເປັນເງິນໂດລາ 4.700 ໂດລາສະຫະລັດ, ເປັນເງິນຢວນ 5,19 ລ້ານຢວນ; ຍັງເກັບກູ້ບໍ່ໄດ້ ເງິນ ກີບ 51,46 ຕື້ກີບ, ເງິນບາດ 3,0 ລ້ານບາດ, ເງິນໂດລາ 25,60 ລ້ານໂດລາສະຫະລັດ ແລະ ເງິນຢວນ 2,63 ລ້ານຢວນ, ກຳລັງດຳເນີນການສືບສວນ-ສອບສວນ ມີ 02 ເລື່ອງ, ມີຄວາມເສຍຫາຍ ເປັນເງິນກີບ 300 ລ້ານກວ່າກີບ, ເປັນເງິນໂດລາ 10 ລ້ານກວ່າໂດລາສະຫະລັດ, ມີເປົ້າໝາຍພົວພັນ 04 ຄົນ, ດຳເນີນຄະດີ 04 ຄົນ, ກັກຕົວ 03 ຄົນ, ຍັງບໍ່ໄດ້ກັກຕົວ 01 ຄົນ; ໃນນີ້ ເກັບກູ້ໄດ້ 10 ລ້ານກວ່າໂດລາສະຫະລັດ ກັບ 100 ລ້ານກວ່າກີບ.
ຂ່າວ: ວສລ