ທ່ານ ສອນໄຊ ສີພັນດອນ, ນາຍົກ ລັດຖະມົນຕີ ແຫ່ງ ສປປ ລາວ ໄດ້ຂຶ້ນຊີ້ແຈງຫລາຍບັນຫາສໍາຄັນທີ່ເປັນຄໍາຊັກຖາມຂອງສະມາຊິກສະພາແຫ່ງຊາດຢູ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ທີ່ຫໍສະພາແຫ່ງຊາດ, ໃນນີ້ລວມທັງການປັບປຸງຄຸນນະພາບການສຶກສາຂອງລາວ. ທ່ານໃຫ້ຮູ້ວ່າເພື່ອເຮັດໃຫ້ຄຸນນະພາບການສຶກສາຂອງລາວໃຫ້ນັບມື້ດີຂຶ້ນໃນຕໍ່ໜ້າ ລັດຖະບານຈະສຸມໃສ່ຈັດຕັ້ງປະຕິບັດຫລາຍມາດຕະການສໍາຄັນດັ່ງນີ້:

1. ຫຼຸດຜ່ອນການສິດສອນຫ້ອງຄວບ, ສະໜອງຄູສອນໃຫ້ພຽງພໍຕາມມະຕິ09/ລບ ດ້ວຍການນໍາໃຊ້ໂຄຕາທີໄດ້ຮັບໃນປີ 2025 ແລະ ໂຄຕາທະຫານພັນທະ 2.000 ຄົນ ໃຫ້ຄູອາສາສະ ໝັກຢູ່ເຂດຊົນນະບົດຈາກກະຊວງປ້ອງກັນປະ ເທດ, (ປະຈຸບັນມີຄູອາສາສະໝັກ 4.460 ຄົນ) ແລະ ສະເໜີໃຫ້ຄູບໍລິຫານ ແລະ ຄູສອນທີຄົບອາຍຸເຂົ້າພັກຜ່ອນບຳນານທີ່ຍັງແຂງແຮງ, ມີຄວາມ ສາມາດສືບຕໍ່ສິດສອນ ຈົນຮອດ 65 ປີ ຫຼືຫຼາຍກ່ວານັ້ນ. ພ້ອມນັ້ນກໍ່ເປີດຫຼັກສູດບໍາລຸງຄູ, ໃຫ້ມີຄວາມສາມາດ ແລະ ມີວິທີສິດສອນແບບໃໝ່ໃຫ້ທັນຍຸກທັນສະໄໝ.

2. ສືບຕໍ່ປຸກລະດົມຄູໃຫ້ເອົາໃຈໃສ່ສິດສອນຢ່າງມີຄວາມຮັບ ຜິດຊອບ, ມີຈັນຍາບັນ, ຈັນຍາທໍາສົມເປັນແມ່ພິມຂອງຊາດ; ເອົາ ໃຈໃສ່ດູແລຊີວິດການເປັນຢູ່ຂອງຄູໃຫ້ດີຂຶ້ນໂດຍສົມທົບການປະ ຕິບັດນະໂຍບາຍອຸດໜູນຈາກລັດຖະບານ ແລະ ການປະກອບສ່ວນຂອງອົງການປົກຄອງທ້ອງຖິ່ນ ແລະ ຜູ້ປົກຄອງຂອງນັກ ຮຽນ. (ໃນປີ 2024 ລັດຖະບານໄດ້ຈັດສັນງົບປະມານອຸດໜູນຄູອາສາສະໝັກ ຈໍານວນ 90 ຕື້ກີບ. ໃນນັ້ນ ງົບຈາກລັດຖະບານ 76 ຕື້ກີບ, ທະນາຄານພັດ ທະນາລາວ 14 ຕື້ກີບ).

3. ສືບຕໍ່ສ້າງຄວາມເຂັ້ມແຂງໃຫ້ແກ່ຜູ້ບໍລິຫານການສຶກສາທຸກຂັ້ນທາງດ້ານວິຊາການ, ການບໍລິຫານ, ສະໜອງວັດຖຸອຸ ປະ ກອນ ແລະ ງົບປະມານທີ່ຈຳເປັນໃຫ້ພຽງພໍ.

4. ສືບຕໍ່ປັບປຸງຫຼັກສູດການຮຽນ-ການສອນ ແລະ ວິທີການສິດສອນຂອງຄູ, ວິທີຮັບເອົາຄວາມຮູ້ ຂອງນັກຮຽນໃຫ້ສອດ ຄ່ອງກັບເປົ້າໝາຍ ແລະ ຈຸດພິເສດຂອງແຕ່ລະທ້ອງຖິ່ນ.

5. ສືບຕໍ່ປັບປຸງ ແລະ ຂະຫຍາຍພື້ນຖານໂຄງລ່າງສະຖານການສຶກສາ, ສະໜອງອຸປະກອນການ ຮຽນ-ການສອນໃຫ້ພຽງພໍຂັ້ນພື້ນຖານ, ສໍາລັບນັກຮຽນຢູ່ຊົນນະບົດອາດນໍາໃຊ້ເຄື່ອນຸ່ງທີ່ມີເປັນຕົ້ນ ເຄື່ອນຸ່ງຈາກຜ້າແພຫັດຖະກຳພື້ນເມືອງ ບໍຈໍາເປັນຕ້ອງມີເສື້ອຂາວ, ສົ່ງ/ສິ້ນສີຟ້າ, ສູ້ຊົນສ້າງໂຮງຮຽນ ກິນນອນຢູ່ໂຮງ ຮຽນໝວດປະ ຖົມ ແລະ ມັດຖະຍົມສົມບູນຢູ່ຊົນນະບົດ.

6. ສືບຕໍ່ດໍາເນີນມາດຕະການຈຳກັດສິ່ງແວດລ້ອມຕ່າງໆທີມີຜົນກະທົບທາງລົບ ແລະ ລົບກວນຕໍ່ ການສຶກສາເປັນຕົ້ນໃນເວ ລາຮຽນ ເຊັ່ນ: ເຄື່ອງມືສື່ສານ, ສະຖານບໍລິການ ຮ້ານເກມ, ກິນດື່ມ, ບັນເທິງ ແລະ ອື່ນໆ. ພ້ອມນັ້ນກໍ່ອອກແຮງສ້າງຄ່ານິຍົມ ແລະ ປັດໃຈຕ່າງໆເພື່ອໃຫ້ ພົນລະເມືອງລາວທຸກຄົນ ຮັກ ແລະ ມັກຮຽນຮູ້, ມັກອ່ານ, ມັກຄົ້ນຄ້ວາ, ສ້າງໃຫ້ມີຕົວເມືອງ, ຊຸມຊົນສັງຄົມແຫ່ງການຮຽນຮູ້ (Leaning Society) ໃຫ້ແກ່ໄວໜຸ່ມທີ່ຈະເປັນອານາຄົດ ແລະ ໜໍ່ແໜງຂອງປະ ເທດຊາດ;

7. ສືບຕໍ່ປະຕິບັດຕາມກົດໝາຍ ແລະ ລະບຽບການໃຊ້ຈ່າຍງົບປະມານທີ່ກຳນົດໄວ້ໃຫ້ເຄັ່ງຄັດ ແລະ ຊຸກຍູ້ການຊ່ວຍເຫຼືອຈາກຄູ່ຮ່ວມພັດທະນາ ເພື່ອໃຫ້ມີຈຸດສຸມຕາມເປົ້າໝາຍຂອງການພັດ ທະນາການສຶກສາ 5 ປີ ໃນແຕ່ລະໄລຍະ.

ຂ່າວ: ວສລ