ທີມຊາດລາວສາມາດຕີສະເໝີ 1-1 ທີມຊາດໄທສຳເລັດ ໃນເກມການແຂ່ງຂັນນັດອຸ່ນເຄື່ອງ (FIFA TIER 1 INTERNATIONAL FRIENDLY MATCH)  ໃນວັນອາທິດ 17 ພະຈິກ 2024 ຜ່ານມາ ທີ່ສະໜາມກິລາທຳມະສາດ ປະເທດໄທ.

ສຳລັບລາຍຊື່ 11 ຜູ້ຫຼິ້ນຕົວຈິງຂອງທີມຊາດລາວປະກອບມີ: 18.ໄຊສະຫວາດ ສຸວັນນະໂຊກ (ຜູ້ຮັກສາປະຕູ), 3.ພຸດທະວົງ ສັງວິໄລ, 4.ອານັນຕາຊາ ສີພົງພັນ, 5.ເພັດດາວັນ ສົມສະນິດ, 20.ແສງດາວວີ ຫັນທະວົງ, 14.ໂຈນີ້ ແຫວນປະເສີດ, 17.ບຸນພະຈັນ ບຸນກອງ (ຫົວໜ້າທີມ), 9.ກີ້ດາວອນ ສຸວັນນີ, 11.ສຸກພະຈັນ ເລື່ອນທະລາ, 18.ພຸດທະໄຊ ໂຄຈະເລີນ, 16.ດາໝົດ ທອງຄຳສະຫວັດ.

ບັນຍາກາດການແຂ່ງຂັນທັງສອງທີມສູ້ກັນໄດ້ຢ່າງສູສີໂດຍທັບນັກກິລາທີມຊາດໄທບຸກໜັກເພື່ອຫວັງປະຕູ ແຕ່ທີມຊາດລາວກໍສ້າງເກມຮັບໄດ້ຢ່າງໜຽວແໜ້ນຈົນຈົບເວລາເຄິ່ງທຳອິດໂດຍສະເໝີກັນໄປ 0-0 ປະຕູ, ເຄິ່ງເວລາທີ 2 ທີມຊາດໄທບຸນໜັກຕໍ່ເນື່ອງຈຶ່ງສາມາດອອກນຳທີມຊາດລາວໄດ້ສຳເລັດ ໂດຍການຍິງປະຕູຂອງໝາຍເລກ 16 ເສກສັນ ລາຕີ ໃນນາທີທີ່ 60 ຈາກ ນັ້ນເກມໄດ້ດຳເນີນໄປຢ່າງດຸເດືອດ ແລະ ແລກກັນ ຈົນລາວໄດ້ຈັງຫວະມາຕີສະເໝີຢ່າງສວຍງາມໂດຍການຍິງປະຕູຂອງໝາຍເລກ 17 ບຸນພະຈັນ ບຸນກອງ ຫົວໜ້າທີມຊາດລາວ ໃນນາທີທີ່ 69 ຫຼັງຈາກນັ້ນໄທກໍບຸກໃນຫຼາຍຈັງຫວະ ແຕ່ລາວກໍມີເກມຮັບທີ່ດີ ແລະ ຊ່ວຍກັນຍັນສະເໝີຈົນໝົດເວລາໄດ້ 1-1 ປະຕູ.

ສຳລັບຜົນງານທີມຊາດລາວໃນເກມການແຂ່ງຂັນອຸ່ນເຄື່ອງ 2 ນັດຜ່ານມາພາຍໃຕ້ການຄຸມທີມຂອງ ທ່ານ ຮາ ຮອກ ຈູນ (HA HYEOKJUN) ຄູຝຶກ ທີມຊາດລາວ ສັນຊາດ ສ.ເກົາຫລີ ອຸ່ນເຄື່ອງນັດທຳອິດ ລາວ1-3 ມາເລເຊຍ ໃນວັນທີ 14 ພະຈິກ 2024, ອຸ່ນເຄື່ອງນັດທີ 2 ລາວ 1-1 ໄທ ໃນວັນທີ 17 ພະຈິກ 2024.