ປກສ ແຂວງຜົ້ງສາລີ ລາຍງານວ່າ: ວັນທີ 24 ຕຸລາ 2024 ຜ່ານມາ ພະແນກສະກັດກັ້ນ ແລະ ຕ້ານຢາເສບຕິດແຂວງ ສົມທົບກັບ ກອງບັນຊາການ ປກສ ເມືອງໃໝ່ ໄດ້ກັກຕົວ ທ້າວ ສາຍ, ອາຍຸ 27ປີ, ສັນຊາດລາວ ຢູ່ບ້ານຈອມແຈ່ວໃໝ່ ເມືອງໃໝ່ ແຂວງຜົ້ງສາລີ ໃນຂໍ້ຫາ ມີຢາເສບຕິດໄວ້ຄອບຄອງ ແລະ ຄ້າ-ຂາຍຢາເສບຕິດ ປະເພດຢາບ້າ, ພາຍຫລັງໄດ້ຮັບແຈ້ງຂໍ້ມູນ ແລະ ມີການຕິດຕາມຢ່າງໃກ້ຊິດ, ຜ່ານການກວດຄົ້ນພົບເຫັນຂອງກາງຢາບ້າຈໍານວນ 30 ແພັກ, ເທົ່າກັບ 180,000 ເມັດ.

ຜ່ານການສືບສວນ-ສອບສວນ ຜູ້ກ່ຽວໃຫ້ການຮັບສາລະພາບວ່າ: ຂອງກາງຢາບ້າຈໍານວນດັ່ງກ່າວເປັນຂອງຕົນແທ້ ໂດຍທີ່ຄົນຮູ້ຈັກກັນມາຫຼິ້ນຢູ່ເຮືອນແລ້ວບອກໃຫ້ຊອກຊື້ຢາບ້າມາໃຫ້ ເພື່ອຈະນໍາໄປຂາຍ. ພາຍຫຼັງໄດ້ຢາບ້າມາແລ້ວຜູ້ກ່ຽວຈະນໍາໄປຂາຍຕໍ່ໃຫ້ຜູ້ຮ່ວມຂະບວນການ ແຕ່ພໍມາຮອດເຮືອນພັກແຫ່ງໜຶ່ງໃນເທສະບານເມືອງໃໝ່ຈຶ່ງຖືກເຈົ້າໜ້າທີ່ກັກຕົວມາດໍາເນີນຄະດີ.

ປັດຈຸບັນຄະດີດັ່ງກ່າວ, ເຈົ້າໜ້າທີ່ພວມດຳເນີນການສືບສວນ-ສອບສວນຂະຫຍາຍຜົນຊອກຫາກຸ່ມແກ້ງຜູ້ຮ່ວມຂະບວນການມາດໍາເນີນຄະດີຕາມລະບຽບຂອງກົດໝາຍຢ່າງເຂັ້ມງວດ.

ແຫຼ່ງຂ່າວ: ປກສ ແຂວງຜົ້ງສາລີ