ອີງຕາມສຳນັກຂ່າວ CNN ລາຍງານໃນວັນທີ 5 ພະຈິກ 2024 ຜ່ານມາ ເກີດເຫດການສະຫຼົດໃນວົງການກິລາບານເຕະອີກຄັ້ງ ຫຼັງຈາກເກມການແຂ່ງຂັນທີ່ປະເທດເປຣູ ລະຫວ່າງ ທີມ ຍູເວັນຕຸດ ເບລາວິສຕາ ພົບກັບ ທີມ ເຟມິເລຍ ເມື່ອເກມການແຂ່ງຂັນດຳເນີນມາໄດ້ 23 ນາທີ ເຫດການທີ່ບໍ່ຄາດຄິດກໍເກີດຂຶ້ນ ຟ້າໄດ້ຜ່າລົງມາກາງສະໝາມບານເຕະ ຈົນເຮັດໃຫ້ນັກກິລາເສຍຊີວິດ 1 ຄົນ ແລະ ບາດເຈັບອີກ 7 ຄົນ.
ຕາມການລາຍງານຫຼັງຈາກທີ່ນັກກິລາທີ່ຖືກຟ້າຜ່າເຮັດໃຫ້ລົ້ມລົງທັງໝົດ 8 ຄົນ ແລະ ຜູ້ເສຍຊີວິດຊື່ວ່າ: ຮູໂກ ເດີລາຄູດ ອາຍຸ 39 ປີ ເຊິ່ງຕາມຄລິປວີດີໂອຈະເຫັນວ່າຖືກຟ້າຜ່າຈົນເຮັດໃຫ້ຄວັນອອກຈາກໂຕ ແລະ ນັກເຕະທີ່ໄດ້ຮັບບາດເຈັບຖືກນຳຕົວສົ່ງໂຮງໝໍຢ່າງເລັ່ງດ່ວນ.
ກ່ອນໜ້ານີ້ເມື່ອບໍ່ດົນ ກໍເກີດເຫດການຟ້າຜ່າລົງກາງເດີ່ນບານເຕະທີ່ປະເທດໄທ ເສຍຊີວິດ 1 ຄົນ ເປັນນັກກິລາຈາກສະໂມສອນໃນໄທລີກ 3 ເຊິ່ງຖືກຟ້າຜ່າທີ່ຈັງຫວັດລະຍອງຈົນເປັນເຫດເຮັດໃຫ້ເສຍຊີວິດ.