ສຳນັກຂ່າວຕ່າງປະເທດລາຍງານໃນວັນທີ 30 ຕຸລາ 2024 ຜ່ານມາ, ສານໃນແຂວງ ບິນເຊືອງ ທາງຕອນໃຕ້ປະເທດຫວຽດນາມ ຕັດສິນຈຳຄຸກເຈົ້າຂອງຮ້ານຄາລາໂອເກະ, ຜູ້ຮັບເໝົາດ້ານລະບົບປ້ອງກັນໄຟໄໝ້ ແລະ ເຈົ້າໜ້າທີ່ຕຳຫຼວດອີກ 4 ຄົນ ໃນຂໍ້ຫາ ລະເມີດມາດຕະຖານການປ້ອງກັນອັກຄີໄພ ແລະ ປ່ອຍປະລະເລີຍ ຈົນເຮັດໃຫ້ເກີດເຫດໄຟໄໝ້ຮ້ານ ຄາລາໂອເກະ ມີຜູ້ເສຍຊີວິດ 32 ຄົນ ໃນປີ 2022.

ຕາມການລາຍງານໄດ້ລະບຸວ່າ: ທ້າວ ເລ ອັນ ຊວນ ເຈົ້າຂອງຮ້ານຄາລາໂອເກະຮ້ານດັ່ງກ່າວຖືກສານຕັດສິນຈຳຄຸກເປັນເວລາ 8 ປີ ຂະນະທີ່ຜູ້ຮັບເໝົາຖືກຕັດສິນຈຳຄຸກ 5 ປີ ສ່ວນຕຳຫຼວດອີກ 4 ຄົນ ຖືກຈັບໃນຖານມີສ່ວນກ່ຽວຂ້ອງກັບການອອກແບບ ແລະ ອະນຸມັດລະບົບປ້ອງກັນໄຟໄໝ້ຂອງຮ້ານຄາລາໂອເກະແຫ່ງນີ້ ເຊິ່ງບໍໄດ້ມາດຕະຖານ ຖືກຕັດສິນຈຳຄຸກລະຫວ່າງ 4 ປີ ຫາ 7 ປີເຄິ່ງ.

ໂດຍເຫດການໄຟໄໝ້ໃນຄັ້ງນັ້ນສ້າງຄວາມສະເທືອນໃຈໄປທົ່ວຫວຽດນາມ ແລະ ຂະນະນັ້ນກໍນຳໄປສູ່ການປິດຄາລາໂອເກະອີກຫຼາຍພັນແຫ່ງທົ່ວປະເທດຫວຽດນາມ ເນື່ອງຈາກບໍ່ຜ່ານມາດຕະຖານການປ້ອງກັນອັກຄີໄພ.