ມາຮອດປັດຈຸບັນ, ໂຄງການສ້ອມແປງທາງສຸກເສີນປູເບຕົງເຂດພູ 9 ຫຼັກ ກາສີ-ເມືອງນານ ສໍາເລັດແລ້ວ 58,58% ພາຍຫຼັງເລີ່ມລົງມືສ້ອມແປງຢ່າງເປັນທາງການແຕ່ວັນທີ 10 ພຶດສະພາ 2022 ເປັນຕົ້ນມາ.
ທ່ານ ສົມໃຈ ຊາພັກດີ, ຫົວໜ້າໂຄງການສ້ອມແປງທາງສຸກເສີນປູເບຕົງເຂດ ພູ 9 ຫລັກ ກາສີ-ເມືອງນານ ໃຫ້ສໍາພາດຕໍ່ລາຍການຮອບບ້ານຜ່ານເມືອງຂອງວິທະຍຸ ກະຈາຍສຽງແຫ່ງ ຊາດລາວໃນວັນທີ 25 ຕຸລາ 2024 ນີ້ ວ່າ: ໂຄງການນີ້ ເປັນໂຄງການປູເບຕົ່ງບາງຈຸດ ຢູ່ບ່ອນທາງໂຄ້ງຄ້ອຍຊັນ ແລະ ປູຢາງບາງຈຸດບ່ອນທີ່ເປ່ເພເສຍຫາຍ. ວຽກທີ່ຈັດຕັ້ງປະຕິບັດຜ່ານມາ ລວມມີ: ການອະນາໄມຫ້ອງລະບາຍນໍ້າ, ແກ້ໄຂການສັນຈອນດ້ວຍການຖົມຂຸມ, ແກ້ໄຂດິນເຈື່ອນ, ວຽກໂຄງສ້າງທາງ ເຊັ່ນ: ລົງດິນຊັ້ນຮອງພື້ນທາງ, ປູຢາງໜ້າທາງສອງຊັ້ນ, ປູເບຕົງ, ຮາວປ້ອງກັນເສັ້ນທາງ, ຂີດແບ່ງເສັ້ນທາງ ແລະ ອື່ນໆ. ປັດຈຸບັນ, ວຽກທີ່ຍັງຄ້າງຄາ ແລະ ພວມສືບຕໍ່ຈັດຕັ້ງປະຕິບັດ ລວມມີ: ການປູຢາງ, ປູເບຕົງ, ກໍ່ສ້າງຫ້ອງລະບາຍນໍ້າ, ກັນເຈື່ອນ ແລະ ວຽກອື່ນໆ ຈໍານວນໜຶ່ງ.
ການສ້ອມແປງທາງພູ 9 ຫຼັກ ກາສີ-ເມືອງນານ ຕາມສັນຍາຈະໃຫ້ສໍາເລັດພາຍໃນເດືອນກັນຍາ 2025. ສ່ວນການສັນຈອນຜ່ານເສັ້ນທາງດັ່ງກ່າວໃນປັດຈຸບັນ ແມ່ນເປີດນໍາໃຊ້ປົກກະຕິ ແລະ ມີການຄຸມນໍ້າໜັກຂອງລົດບັນທຸກເພື່ອຮັບປະກັນບໍ່ໃຫ້ເສັ້ນທາງເປ່ເພ. ສະນັ້ນ ຜູ້ໃຊ້ລົດໃຊ້ຖະໜົນທີ່ຜ່ານເສັ້ນທາງດັ່ງກ່າວ ໃນໄລຍະທີ່ພວມສ້ອມແປງນີ້ ຕ້ອງເພີ່ມສະຕິລະມັດລ ວັງໃຫ້ຫຼາຍຂຶ້ນກວ່າເກົ່າ, ປະຕິບັດຕາມຄໍາແນະນໍາຂອງເຈົ້າໜ້າທີ່ກ່ຽວຂ້ອງຢ່າງເຂັ້ມງວດ ແລະ ບໍ່ປະໝາດໃນການຂັບຂີ່ ເພື່ອບໍ່ໃຫ້ມີອຸບັດຕິເຫດເກີດຂຶ້ນຄືໄລຍະຜ່ານມາ.
ຂ່າວ: ວສລ