ສຳນັກຂ່າວຕ່າງປະເທດ ລາຍງານໃນວັນທີ 16 ທັນວາຜ່ານມານີ້ວ່າ ເກີດເຫດກຸ່ມຕໍລີບັນ ບຸກໂຈມຕີໂຮງຮຽນແຫ່ງໜຶ່ງ
ໃນເມືອງເປຊະວາ ທາງພາກຕາເວັນຕົກສຽງເໜືອຂອງປະເທດປາກີສະຖານ ເຮັດໃຫ້ມີຜູ້ເສຍຊີວິດຢ່າງໜ້ອຍ 141
ຄົນ ໃນນັ້ນເປັນເດັກນ້ອຍກ່ວາ 132 ຄົນ.
ເຫດການໂຈມຕີດັ່ງກ່າວນີ້ ເກີດຂຶ້ນເມື່ອເວລາປະມານ 10:00 ໂມງ ຕາມເວລາທ້ອງຖິ່ນ ຂອງວັນທີ 16 ທັນວາ ໂດຍຜູ້ທີ່
ເຫັນເຫດການໄດ້ກ່າວວ່າ ຜູ້ກໍ່ເຫດໄດ້ແຕ່ງກາຍຄ້າຍຄືທະຫານ ຈຳນວນ 7 ຄົນ ບຸກເຂົ້າໄປໃນໂຮງຮຽນ ເຊິ່ງເປັນໂຮງຮຽນ
ຂອງກອງທັບປາກີສະຖານ, ຫລັງຈາກນັ້ນກໍໄດ້ມີສຽງປືນ ແລະ ສຽງລະເບີດດັງສະໜັ່ນຂຶ້ນ.
ເຈົ້າໜ້າທີ່ຝ່າຍຄວາມໝັ້ນຄົງ ໄດ້ເຂົ້າຫ້ອມລ້ອມສະຖານທີ່ເກີດເຫດ ແລະ ໄດ້ຊ່ວຍອົບພະຍົບນັກຮຽນ ອອກມາໄດ້ປະ
ມານ 500 ຄົນ, ແນວໃດກໍຕາມ ລາຍງານລ່າສຸດໄດ້ລະບຸຈຳນວນຜູ້ເສຍຊີວິດ ມີທັງໝົດ 141 ຄົນ, ເປັນນັກຮຽນ 132 ຄົນ
ແລະ ອີກ 9 ຄົນ ເປັນພະນັກງານຂອງໂຮງຮຽນ. ນອກຈາກນີ້, ຍັງມີຈຳນວນຜູ້ໄດ້ຮັບບາດເຈັບອີກກ່ວາ 125 ຄົນ ເກືອບ
ທັງໝົດແມ່ນເປັນເດັກນ້ອຍ.
ໂຄສົກຂອງກຸ່ມຕໍລີບັນ ໄດ້ອອກມາຖະແຫລງຫລັງເກີດເຫດວ່າ ການໂຈມຕີດັ່ງກ່າວນີ້ ແມ່ນເປັນຝີມືຂອງກຸ່ມຕໍລີບັນ
ເພື່ອຕອບໂຕ້ປະຕິບັດການຂອງກອງທັບປາກີສະຖານ ທີ່ບຸກໂຈມຕີຖານທີ່ໝັ້ນຂອງກຸ່ມໃນພື້ນທີ່ວາຊີຣິສະຖານເໜືອ
ແລະ ໄຄເບີ.
