ຄວາມກົດດັນສູງຂອງອາກາດເຢັນທີ່ປະເທດຈີນ ໄດ້ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ດ້ວຍກໍາລັງອ່ອນ ຫາ ປານກາງ, ສົມທົບກັບກະແສລົມ ຕາເວັນອອກ-ຕາເວັນອອກສ່ຽງເໜືອພັດປົກຄຸມ. ເຊິ່ງຈະເຮັດໃຫ້ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມໃນຕອນເຊົ້າຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ, ພ້ອມຈະມີຝົນຕົກ, ຟ້າຮ້ອງ, ຟ້າເຫຼື້ອມໃນລະດັບຄ່ອຍ ແລະ ຈະມີລົມພັດແຮງຢູ່ບາງທ້ອງຖິ່ນໃນແຕ່ລະພາກ. ສໍາລັບພາຍຸທຣາມີ (TRAMI) ຫົວທີ 20 ປັດຈຸບັນເຄື່ອນທີ່ຢູ່ມະຫາສະມຸດປາຊີຟິກໃກ້ກັບພາກເໜືອຂອງຟີລິບປິນ ຄາດວ່າ ພາຍຸຫົວນີ້ຈະເຄື່ອນທີ່ຂຶ້ນຝັ່ງໃນຕອນຄໍ່າມື້ນີ້ຂອງປະເທດຟີລິບປິນ ແລະຈະສືບຕໍ່ເຄື່ອນທີ່ໄປທາງທະເລຈີນໃຕ້ຕອນກາງ ໃນໄລຍະວັນທີ 24 ຫາ 25 ຕຸລານີ້ ແຕ່ຍັງບໍ່ທັນມີຜົນກະທົບຕໍ່ກັບປະເທດລາວ.