ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 19 ຕຸລາ 2024 ຢູ່ນະຄອນຫລວງວຽງຈັນ ສປປ ລາວ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ, ທັງເປັນປະທານໄອປາ ຄັ້ງທີ 45, ເປັນກຽດເຂົ້າຮ່ວມ ແລະ ກ່າວສູນທອນພົດໂດຍ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ, ມີປະທານສະພາ, ປະທານລັດຖະສະພາ ຈາກບັນດາປະເທດສະມາຊິກໄອປາ ແລະ ປະເທດສັງເກດການ ເຂົ້າຮ່ວມ.
ໃນໂອກາດນີ້, ທ່ານ ໄຊສົມພອນ ພົມວິຫານ ໄດ້ກ່າວເປີດກອງປະຊຸມວ່າ: ກອງປະຊຸມສະມັດຊາໃຫຍ່ໄອປາ ແມ່ນເວທີໜຶ່ງທີ່ມີຄວາມໝາຍຄວາມສຳຄັນ ເຊິ່ງສະມາຊິກລັດຖະສະພາ ຈາກບັນດາປະເທດອາຊຽນ ຈະໄດ້ຮ່ວມກັນຄົ້ນຄວ້າ ປຶກສາຫາລື ແລະ ກຳນົດທິດທາງການດຳເນີນງານ ເພື່ອບັນລຸຈຸດປະສົງ ແລະ ຄາດໝາຍລວມຂອງ ໄອປາ ກໍຄື ອາຊຽນ. ກອງປະຊຸມສະມັດຊາໃຫຍ່ໄອປາ ຄັ້ງທີ 45 ນີ້, ໄດ້ຈັດຂຶ້ນໃນທ່າມກາງບັນຍາກາດ ທີ່ສະພາບການພາກພື້ນ ແລະ ສາກົນ ມີການຜັນແປໄປຢ່າງໄວວາສັບສົນ ແລະ ສະຫລັບສັບຊ້ອນ ຄາດຄະເນໄດ້ຍາກ, ມີທັງກາລະໂອກາດ ແລະ ສິ່ງທ້າທາຍຫລາຍດ້ານ ເປັນຕົ້ນ ຄວາມຂັດແຍ່ງໃນຫລາຍພາກພື້ນຂອງໂລກ ບັນຫາໄພພິບັດທາງທຳມະຊາດ, ການປ່ຽນແປງສະພາບດິນຟ້າອາກາດ, ວິກິດການທາງດ້ານເສດຖະກິດ-ການເງິນ ແລະ ອື່ນໆ ລ້ວນແຕ່ເປັນສິ່ງທ້າທາຍຕໍ່ພາກພື້ນ ແລະ ວົງຄະນະຍາດສາກົນໃນປັດຈຸບັນ.
ເຖິງຢ່າງໃດກໍຕາມ, ການຮ່ວມມືເພື່ອການພັດທະນາ, ການປົກປັກຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງ ຍັງເປັນທ່າອ່ຽງລວມ ຂອງປະຊາຊາດ ເຫັນໄດ້ຈາກສະພາບເສດຖະກິດ-ການເງິນ ໃນຫລາຍປະເທດ ແລະ ພາກພື້ນ ພວມໄດ້ຮັບການແກ້ໄຂ, ມີທ່ວງທ່າໝັ້ນທ່ຽງດີຂຶ້ນ, ໂດຍສະເພາະແມ່ນປະຊາຄົມອາຊຽນ ມີຄວາມຄືບໜ້າ ແລະ ປະສົບຜົນສໍາເລັດຕາມຄາດໝາຍ ໃນການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດ ພາຍໃຕ້ 3 ເສົາຄໍ້າປະຊາຄົມອາຊຽນ ກໍຄື ແຜນແມ່ບົດວ່າດ້ວຍ ການເຊື່ອມຈອດ 2025 ແລະ ແຜນປະຕິບັດງານຂໍ້ລິເລີ່ມເພື່ອການເຊື່ອມໂຍງອາຊຽນ.
ໄອປາ ໃນນາມທີ່ເປັນອົງການນິຕິບັນຍັດ ແລະ ເປັນຕົວແທນແຫ່ງລັດ ຂອງປະຊາຊົນປະເທດສະມາຊິກອາຊຽນ ມີຈຸດປະສົງເພື່ອຊຸກຍູ້ພາລະກິດລວມຂອງອາຊຽນ ໃຫ້ບັນລຸຜົນປະໂຫຍດຕາມເປົ້າໝາຍທີ່ວາງໄວ້. ກອງປະຊຸມສະມັດຊາໃຫຍ່ໄອປາຄັ້ງທີ 45 ນີ້ ໄດ້ກໍານົດ ຄຳຂວັນ: “ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ແມ່ນສອດຄ່ອງກັບ ຄຳຂວັນປະທານອາຊຽນຂອງ ສປປ ລາວ ຄື: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ໂດຍສຸມໃສ່ການຈັດຕັ້ງປະຕິບັດວິໄສທັດປະຊາຄົມອາຊຽນ ໃນປີ 2025.
ເພື່ອເຮັດໃຫ້ພາກພື້ນມີການເຊື່ອມຈອດ ແລະ ເຂັ້ມແຂງ, ທັງເປັນການຊຸກຍູ້ສົ່ງ ເສີມຄວາມພະຍາຍາມ ຂອງບັນດາປະເທດສະມາຊິກອາຊຽນ ໃນການບັນລຸເປົ້າໝາຍ ດ້ານການພັດທະນາພື້ນຖານໂຄງລ່າງ ແລະ ລະບຽບການຕ່າງໆທີ່ມີການເຊື່ອມຈອດ ທາງດ້ານການຂົນສົ່ງ, ໂທລະຄົມມະນາຄົມ, ພະລັງງານ ແລະ ອື່ນໆ. ເພື່ອອໍານວຍຄວາມສະດວກໃຫ້ແກ່ການຄ້າ, ການລົງທຶນ, ການຜະລິດ, ການບໍລິການ, ການທ່ອງທ່ຽວ ແລະ ການໄປມາຫາສູ່ກັນຂອງປະຊາຊົນອາຊຽນໃຫ້ຫລາຍຂຶ້ນ, ການເຊື່ອມໂຍງທາງດ້ານເສດຖະກິດ, ການຮັດແຄບ ຄວາມແຕກໂຕນທາງດ້ານການພັດທະນາ, ສ້າງເສດຖະກິດອາຊຽນມີຄວາມເຂັ້ມແຂງ, ເປີດກວ້າງ, ປະຊາຄົມມີຄວາມສາມັກຄີປອງດອງ, ມີການພັດທະນາທີ່ເທົ່າທຽມກັນ ແລະ ການເສີມຂະຫຍາຍການພົວພັນຮ່ວມມືອາຊຽນ ກັບຄູ່ຮ່ວມມືພາຍນອກ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ແລະ ພ້ອມກັນກ້າວໄປຂ້າງໜ້າ.
ໃນໄລຍະດໍາເນີນກອງປະຊຸມສະມັດຊາໃຫຍ່ໄອປາ ຈະມີກອງປະຊຸມບັນດາກຳມາທິການປະຈຳຕ່າງໆ ທີ່ຈະໄດ້ລົງເລິກຄົ້ນຄວ້າ, ປຶກສາຫາລື ບັນດາເນື້ອໃນ ແລະ ຮ່າງມະຕິ ໃນຂົງເຂດການເມືອງ, ເສດຖະກິດ, ສັງຄົມ, ແມ່ຍິງ, ຊາວໜຸ່ມ ແລະ ວຽກງານພາຍໃນ ຂອງໄອປາ. ນອກຈາກນີ້, ຍັງຈະມີກອງປະຊຸມລະຫວ່າງ ໄອປາ ກັບ ລັດຖະສະພາປະເທດສັງເກດການ ເພື່ອຊອກຫາຊ່ອງທາງໃນການຮ່ວມມືກັນ ແລະ ວິທີແກ້ໄຂບັນຫາ ແລະ ສິ່ງທ້າທາຍຕ່າງໆຮ່ວມກັນ, ສະໜັບສະໜູນບັນດາເປົ້າໝາຍອາຊຽນ ແນໃສ່ຮັບປະກັນການເຊື່ອມໂຍງ ແລະ ການເຕີບໂຕແບບກວມລວມ.
ຂ່າວ: ປະເທດລາວ