ໃນວັນທີ 10–11 ຕຸລາ 2024 ທີ່ຜ່ານມາຂະແໜງລ້ຽງສັດ ແລະ ການປະມົງໃນນາມຂະແໜງການທີ່ຕິດພັນຈິ່ງໄດ້ລົງຕິດຕາມ-ກວດກາການນໍາເຂົ້າ ແລະ ຈໍາໜ່າຍສັດນໍ້າ , ຜະລິດຕະພັນສັດນໍ້າ , ອາຫານແຊ່ແຂງ , ອາຫານທະເລຢູ່ 2 ເມືອງຂອງແຂວງຄື : ເມືອງທ່າແຂກ ແລະ ເມືອງໜອງບົກ.
ສຳລັບເມືອງທ່າແຂກແມ່ນໄດ້ລົງຕິດຕາມ-ກວດກາໃນວັນທີ 10 ຕຸລາ 2024 ເຊິ່ງສະຖານທີ່ກວດກາມີທັງໝົດ 3 ແຫ່ງຄື : ຕະຫຼາດຫຼັກ 3 , ຕະຫຼາດຫຼັກ 2 ແລະ ຕະຫຼາດນາໂບ . ສໍາລັບຕະຫຼາດຫຼັກ 3 ແມ່ນມີ 6 ຈຸດ ແລະ ສິ່ງທີ່ນໍາມາກວດແມ່ນປາມຶກ , ກຸ້ງ , ໄກ່ແຊ່ແຂງ , ມ້າມ , ໄຂ່ຫຼັງ, ເຊິ່ງມີ 1 ຈຸດທີ່ພົບເຫັນຄື : ຮ້ານນາງ ຮວາ ແລະ ຊະນິດທີ່ພົບແມ່ນປາມຶກ ໂດຍຜົນກວດກາພົບວ່າ: ມີສານຕົກຄ້າງຟອມມາລິນຫຼາຍເກີນກໍານົດ ແລະ ກຸ້ງທະເລຈໍານວນ 11.5 ກິໂລກຼາມ. ສ່ວນຕະຫຼາດຫຼັກ 2 ໄດ້ຕິດຕາມ-ກວດກາຢູ່ 4 ຈຸດໂດຍມີຜູ້ມາຂາຍຕົວຈິງ 2 ຈຸດ ແລະ ອີກ 2 ຈຸດບໍ່ພົບເຫັນຜູ້ມາຂາຍເລີຍ ແລະ ແຫ່ງທີ 3 ຕະຫຼາດນາໂບ ມີ 2 ຈຸດບໍ່ພົບເຫັນຜູ້ມາຂາຍ.
ສໍາລັບຮ້ານທີ່ຂາຍຕາມແຄມທາງລວມມີ 5 ຈຸດ ແລະ ສິ່ງທີ່ນໍາມາກວດຄື : ແມ່ນປາມຶກ , ກຸ້ງ , ໄກ່ແຊ່ແຂງ , ມ້າມ , ໄຂ່ຫຼັງ ແລະ ມີ 1 ຈຸດກວດ ໄດ້ກວດພົບສານຟອມມາລິນຕົກຄ້າງໃນກຸ້ງທະເລຢູ່ 3 ຮ້ານຄື : ຮ້ານ ນາງ ມຸກດາກວດພົບ 11 ກິໂລກຼາມ , ຮ້ານທ້າວ ພອນວິໄລ ກວດພົບ 1 ກິໂລກຼາມ ແລະ ຮ້ານ ທ້າວ ວິໄລພອນກວດພົບ 6.5 ກິໂລກຼາມ.
ສຳລັບເມືອງໜອງບົກແມ່ນໄດ້ລົງຕິດຕາມ-ກວດກາໃນວັນທີ 11 ຕຸລາ 2024 ເຊິ່ງສະຖານທີ່ກວດກາລວມມີທັງໝົດ 2 ແຫ່ງຄື : ຕະຫຼາດດົງຂວາງ ແລະ ຕະຫຼາດຕົ້ນໂພ . ສໍາລັບຕະຫຼາດດົງຂວາງລວມມີ 2 ຈຸດກວດ ແລະ ສິ່ງນໍາມາກວດຄື : ປາມຶກ , ໄກ່ແຊ່ແຂງ , ຫົວໃຈ ແຕ່ບໍ່ພົບສານຕົກຄ້າງ . ສ່ວນຢູ່ຕະຫຼາດຕົ້ນໂພມີ 2 ຈຸດກວດ ແລະ ສິ່ງນໍາມາກວດຄື : ປາມຶກ , ໄກ່ແຊ່ແຂງ , ຫົວໃຈ ແລະ ໄດ້ກວດພົບເຫັນມີສານຟອມມາລິນຕົກຄ້າງເກີນກໍານົດໃນອາຫານທະເລທັງ 2 ຈຸດດັ່ງກ່າວຄື : ຮ້ານຂອງນາງ ໂສລະຍາ ກວດພົບໃນກຸ້ງ 6.5 ກິໂລກຼາມ ແລະ ຮ້ານ ນາງ ເລ໋ວ ກວດພົບໃນກຸ້ງ 1.8 ກິໂລກຼາມ.
ສຳລັບເຈົ້າຂອງຮ້ານທີ່ໄດ້ກະທຳຜິດ ເຈົ້າໜ້າທີ່ໄດ້ເຮັດບົດບັນທຶກ ພ້ອມທັງໄດ້ຍຶດສິນຄ້າດັ່ງກ່າວເພື່ອນໍາໄປທໍາລາຍ, ຈຸດປະສົງການລົງເຄື່ອນໄຫວ ກໍ່ເພື່ອແນໃສ່ໃຫ້ຜູ້ບໍລິໂພກໄດ້ຮັບປະທານອາຫານທີ່ມີຄວາມປອດໄພ, ຖືກຫຼັກອະນາໄມ, ບໍ່ມີສານຕົກຄ້າງ, ສະນັ້ນ, ຜູ້ຂາຍກໍ່ຕ້ອງໄດ້ຄໍານຶງເຖິງສຸຂະພາບຂອງຜູ້ຊື້ເຊັ່ນດຽວກັນ ບໍ່ຄວນເຫັນແກ່ຜົນກໍາໄລພຽງຢ່າງດຽວແຕ່ຄວນຄໍານຶງເຖິງສຸຂະພາບຂອງຜູ້ບໍລິໂພກນໍາອີກດ້ວຍໂດຍສະເພາະແມ່ນການໃສ່ສານຟອມມາລິນ ແລະ ສານອື່ນໆທີ່ຜົນຂ້າງຄຽງຕໍ່ຮ່າງກາຍ (ສານກັນບູດ).
ຂ່າວ: Khammouane News