ອີງຕາມສຳນັກຂ່າວບີບີຊີ ລາຍງານວ່າ: ລຽມ ເພນ (Liam Payne) ອະດີດສະມາຊິກວົງ ວັນໄດເຣກຊັ່ນ (One Direction) ວົງດົນຕີຊື່ດັງຈາກ ອັງກິດ-ໄອແລນ ໄດ້ເສຍຊີວິດດ້ວຍອາຍຸ 31 ປີຫຼັງເກີດອຸບັດເຫດຕົກລົງຈາກຊັ້ນ 3 ໃນໂຮງແຮມແຫ່ງໜຶ່ງໃນນະຄອນບູໂນສໄອເຣສ ໃນປະເທດອາເຈນຕີນ່າ ໃນຕອນແລງ ວັນທີ 16 ຕຸລາ 2024 ຜ່ານມາ.
ເພນ ເລີ່ມເຂົ້າສູ່ວົງການດົນຕີ ໃນປີ 2008 ຫຼັງຈາກເຂົ້າຮ່ວມການປະກວດຮ້ອງເພງ ໃນລາຍການ (The X Factor) ແຕ່ບໍ່ຜ່ານການຕັດສິນ, ຈາກນັ້ນ ເພນໄດ້ກັບມາເປີດຕົວອີກຄັ້ງ ກັບອະດີດເພື່ອນຮ່ວມວົງເຊັ່ນ: Niall Horan, Harry Styles, Louis Tomlinson ແລະ Zayn Malik ໂດຍໃຊ້ຊື່ວ່າ: ‘One Direction’ ໃນປີ 2010 ຈົນມີຊື່ສຽງໄປທົ່ວໂລກ.
ສຳລັບວົງ One Direction ໄດ້ຢຸດຕິການເຄື່ອນໄຫວໃນປີ 2016 ແລະ ໄດ້ແຍກຍ້າຍກັນເຮັດຕາມຄວາມຝັນຂອງໃຜລາວ ສ່ວນ ເພນ ໄດ້ປ່ອຍເພງທຳອິດອອກມາໃນປີ 2017 ຊື່ວ່າ: ‘Strip That Down’ ເຊິ່ງຂຶ້ນຕິດອັນດັບ 3 ຂອງອັງກິດ.
One Direction ຖືວ່າເປັນໜຶ່ງໃນວົງດົນຕີທີ່ປະສົບຜົນສຳເລັດຫຼາຍທີ່ສຸດ ມີອາລະບຳອັນດັບໜຶ່ງຂອງອັງກິດ 4 ອະລາບຳ ແລະ ເພງອັນດັບໜຶ່ງຂອງອັງກິດອີກ 4 ເພງ ລວມເຖິງການຕິດອັນດັບໜຶ່ງໃນທົ່ວໂລກ. ທັງມີຍອດຈຳໜ່າຍກວ່າ 70 ລ້ານແຜ່ນສຽງ ແລະ ຂາຍບັດຄອນເສີດໝົດໃນການສະແດງທົ່ວໂລກ.