ວັນທີ 15 ຕຸລາ 2024, ແຂວງຫົວພັນ ໄດ້ຈັດພິທີ ຈູດທໍາລາຍຢາເສບຕິດ ຂຶ້ນຢູ່ເດີ່ນພະແນກສະກັດກັ້ນ ແລະ ຕ້ານອັກຄີໄຟ ປກສ ແຂວງຫົວພັນ ເພື່ອເປັນການສະເຫຼີມສະຫຼອງ ວັນແຫ່ງຊາດ ຕ້ານຢາເສບຕິດ ຄົບຮອບ 23 ປີ ( 12 ຕຸລາ 2001–12 ຕຸລາ 2024 ), ເຂົ້າຮ່ວມມີທ່ານ ພຸດພັນ ແກ້ວວົງໄຊ ຮອງເຈົ້າແຂວງຫົວພັນ, ປະທານຄະນະກຳມະການຄວບຄຸມ, ສະກັດກັ້ນ ແລະ ຕ້ານຢາເສບຕິດ ຂັ້ນແຂວງ, ມີ ພົຈວ ເພັດສອນ ອິນສຸພັນ ຫົວໜ້າກອງບັນຊາການ ປກສ ແຂວງຫົວພັນ ພ້ອມດ້ວຍພະແນກການກ່ຽວຂ້ອງ, ປະຊາຊົນອ້ອມຂ້າງເທດສະບານເມືອງ ຕະຫຼອດຮອດຄູ-ອາຈານ ແລະ ນ້ອງນັກຮຽນ ເຂົ້າຮ່ວມ.
ຢາເສບຕິດທີ່ນໍາມາຈູດທໍາລາຍໃນຄັ້ງນີ້ ເປັນຢາເສບຕິດທີ່ສານຕັດສິນສໍາເລັດແລ້ວມີ: ເຮໂລອິນ ມີນ້ໍາໜັກ 49.802 ກຼາມ (ສີ່ສິບເກົ້າຈຸດ ແປດຮ້ອຍສອງກຣາມ ), ຝຸ່ນຂາວ 33.7 ກຼາມ, ຢາບ້າ 162,558 ເມັດ ມີນ້ຳໜັກ 11.7 ກິໂລກຼາມ, ຝິ່ນ ມີນ້ຳໜັກ 4.405 ກິໂລກຼາມ, ຄາເຟອິນ ມີນ້ຳໜັກ 1.8 ກິໂລກຼາມ ແລະ ອິນຕີໄຟລິນ 16.1 ກຼາມ.
ຂ່າວ: ວາລະສານປ້ອງກັນຄວາມສະຫງົບ