ໃນວັນທີ 15 ຕຸລາ 2024 ນີ້ ພະແນກ ຖະແຫຼງ ຂ່າວ, ວັດທະນະທຳ ແລະ ທ່ອງທ່ຽວ ໃນນາມທີ່ເປັນຜູ້ຄຸ້ມຄອງ ບໍລິຫານສະຖານທີ່ທ່ອງທ່ຽວນໍ້າຕົກຕາດກາງຊີ ໄດ້ຈັດກອງປະ ຊຸມປຶກສາຫາລື ເພື່ອແກ້ໄຂປະກົດການຫຍໍ້ທໍ້ທີ່ເກີດໃນຕົ້ນເດືອນທີ່ຜ່ານ, ໂດຍການເປັນປະທານ ຂອງ ທ່ານ ນາງ ສຸດາພອນ ຄົມທະວົງ ຫົວໜ້າພະແນກ ພະແນກ ຖະແຫຼງຂ່າວ, ວັດທະນະທຳ ແລະທ່ອງທ່ຽວ, ມີຜູ້ປະກອບການລົດໄຟຟ້າ, ຕາງໜ້າພະແນກການເງິນ ແລະພະແນກໂຍທາທິການ ແລະຂົນສົ່ງ ພ້ອມດ້ວຍຂະແໜງການທ່ອງທ່ຽວເຂົ້າຮ່ວມ.
ຈາກເຫດການທີ່ສື່ອອນໄລລົງຂ່າວຕາມໂຊຊ່ຽວມີເດຍຕ່າງໆໃນຕົ້ນເດືອນນີ້ ທີ່ເຫັນນັກທ່ອງທ່ຽວຍາດກັນຂຶ້ນໄຟຟ້າເພື່ອຂຶ້ນ-ລົງຕາດກວາງຊີ, ເຊິ່ງເກີດເປັນພາບພົດທີ່ບໍ່ດີຕໍ່ການທ່ອງ ທ່ຽວຂອງຫຼວງພະບາງ, ຕໍ່ເຫດການດັ່ງກ່າວຜູ້ປະກອບການລົດໄຟຟ້າໄດ້ຊີ້ແຈງໃຫ້ຮູ້ວ່າ: ປັດຈຸບັນ ບໍລິສັດມີລົດຮັບ-ສົ່ງທັງໝົດ 25 ຄັນ, ຄັນໜຶ່ງສາມາດບັນຈຸນັກທ່ອງທ່ຽວໄດ້ 10 ຄົນ, ໃຊ້ເວລາຂຶ້ນ-ລົງ 5-10 ນາທີ ຕໍ່ຄັ້ງ. ຊ່ວງນັ້ນເປັນໄລຍະທີ່ແຂກເຂົ້າມາຫຼາຍ, ມາພ້ອມກັນຫຼາຍກຣູບທົວ, ເຮັດໃຫ້ລົດຮັບ-ສົ່ງບໍ່ພຽງພໍກັບຄວາມຕ້ອງການ, ຈິ່ງໄດ້ລໍຖ້າລົດທີ່ໄປສົ່ງຢູ່ເທິງຕາດກັບມາຮັບອີກ, ຈິ່ງເກີດມີປະກົດການນັກທ່ອງທ່ຽວຍາດກັນຂຶ້ນລົດ. ຕາມປົກກະຕິຖ້າເປັນນັກທ່ອງທ່ຽວທົ່ວໄປກໍ່ບໍ່ມາບັນຫາຫຍັງ.
ດັ່ງນັ້ນ, ເພື່ອຮັບຮອງນັກທ່ອງທ່ຽວ ໃຫ້ພຽງພໍກັບຄວາມຕ້ອງການ ທາງບໍລິສັດມີແຜນຈະປະກອບລົດເຂົ້າຕື່ມອີກ 5 ຄັນ, ມີ 2 ປະເພດ ຄື: ປະເພດ 1 ສາມາດ ບັນຈູໄດ້ 13 ຄົນ ຈຳນວນ 3 ຄັນ ແລະປະເພດທີ 2 ສາມາດບັນຈຸໄດ້ 23-25 ຄົນ ຈໍານວນ 2 ຄັນ. ເພື່ອແກ້ໄຂບັນຫາດັ່ງກ່າວ ຫົວໜ້າພະແນກ ຖວທ ໄດ້ມີຄຳເຫັນຊີ້ນໍາ ເປັນຕົ້ນແມ່ນໃຫ້ຈັດສັນຄວາມເປັນລະບຽບຮຽບຮ້ອຍ ບ່ອນຂຶ້ນລົດ-ລົງລົດໃຫ້ເປັນລະບົບ, ເຮັດເປັນຮ່ອງ, ເປັນຊ່ອງ ເປັນແຖວລໍຕາມຄີວ, ສະເໜີໃຫ້ພະແນກການເງິນແຂວງຮີບຮ້ອນປັບປຸງ ລະບົບການຂາຍປີ້, ອອກແບບປີ້ຄືນໃໝ່, ໃຫ້ມີບາໂຄດ, ມີຮູບພາບສະຖານທີ່ທ່ອງທ່ຽວ ທີ່ກົມກືນ, ເຊິ່ງນັກທ່ອງທ່ຽວສາມາດເອົາໄປເປັນທີລະນຶກໄດ້, ພ້ອມນັ້ນກໍ່ຕ້ອງມີການປັບປຸງບຸກຄະລາກອນພາຍໃນທັງໝົດ, ຖ້າບໍ່ພຽງພໍກໍ່ເພີ່ມເຂົ້າໃໝ່, ຕ້ອງມີເຄື່ອງແບບທີ່ເປັນເອກະລັກໃຫ້ພະນັກງານ ເພື່ອເຮັດໃຫ້ມີຄວາມເປັນລະບຽບຮຽບຮ້ອຍ ແລະສະອາດງາມຕາ.
ຂ່າວ: ວສລ