ພາຍຫຼັງເຈົ້າໜ້າທີ່ພະແນກຕຳຫຼວດ ກອງບັນຊາການ ປກສ ເມືອງລອງ ແຂວງຫຼວງນ້ຳທາ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຢູ່ເຮືອນຂອງ ທ້າວ ລີທອນ, ອາຍຸ 45 ປີ, ປະຊາຊົນຢູ່ບ້ານຫ້ວຍຫຼວງ, ເມືອງລອງ ແຂວງຫຼວງນ້ຳທາ ມີການພົວພັນຊື້-ຂາຍ ແລະ ມີຢາເສບຕິດໄວ້ໃນຂອບຄອງ; ຈາກນັ້ນ, ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ລົງຕິດຕາມເປົ້າໝາຍ ແລະ ພິສູດເຫັນວ່າ: ມີມູນຄວາມຈິງ ຈຶ່ງໄດ້ປະສານສົມທົບກັບ ອົງການໄອຍະການ ປະຊາຊົນເຂດ II ປະຈຳເມືອງລອງ ແລະ ການຈັດຕັ້ງພາກສ່ວນທີ່ກ່ຽວຂ້ອງ ລົງກວດຄົ້ນເຮືອນຂອງ ທ້າວ ລີທອນ ພົບເຫັນຢາເສບຕິດ ປະເພດຢາບ້າ ຈຳນວນ 84 ເມັດ ຊຸກເຊືອງໄວ້ຢູ່ເຮືອນຄົວ ແລະ ພົບຢາຝິ່ນ 5 ຫໍ່ ເທົ່າກັບ 2,5 ກິໂລກຼາມ ຢູ່ຫ້ອງນອນ, ຕໍ່ກັບຂອງກາງຄະດີ ເຈົ້າໜ້າທີ່ໄດ້ຢຶດ ພ້ອມທັງກັກເອົາຜູ້ກ່ຽວ ມາດໍາເນີນການສອບສວນ.
ຜ່ານການສືບສວນ-ສອບສວນ, ທ້າວ ລີທອນ ຮັບສາລະພາບວ່າ: ຢາບ້າ 84 ເມັດ ແລະ ຢາຝິ່ນ 5 ຫໍ່ ທີ່ເຈົ້າໜ້າທີ່ກວດພົບນັ້ນ ແມ່ນຂອງຜູ້ກ່ຽວແທ້, ຢາບ້າ ແມ່ນໄດ້ພົວພັນຊື້ນຳຄູ່ຮ່ວມຂະບວນການດຽວກັນຢູ່ ບ້ານຊຽງກົກ, ເມືອງລອງ, ແຂວງຫຼວງນ້ຳທາ ເພື່ອນຳມາເສບ ແລະ ຂາຍຍ່ອຍ; ສ່ວນຢາຝິ່ນ ແມ່ນຜູ້ກ່ຽວໄດ້ລັກລອບປູກເອງ ແລະ ເກັບກູ້ໃນປີຜ່ານມາ ແຕ່ຍັງບໍ່ໄດ້ຂາຍເທື່ອ. ປັດຈຸບັນນີ້, ເຈົ້າໜ້າທີ່ກຳລັງດຳເນີນການສືບສວນ-ສອບສວນ ເພື່ອຄົ້ນຫາຜູ້ຮ່ວມຂະບວນການມາດຳເນີນຄະດີຄາມກົດໝາຍ.
ຂ່າວ: ວາລະສານປ້ອງກັນຄວາມສະຫງົບ