ວັນທີ 14 ຕຸລາ 2024 ຜ່ານມາ, ເຈົ້າໜ້າທີ່ກວດກາ ການຄ້າເມືອງໄຊຍະບູລີ ສົມທົບກັບອະນຸກຳມະການເສດຖະກິດ ເທສະການບຸນອອກພັນສາປະວໍລະນາ ແລະ ບຸນຊ່ວງເຮືອ ປະຈຳປີ 2024 ລົງກວດກາສິນຄ້າໝົດອາຍຸຢູ່ຕະຫຼາດນັດ ໃນເທສະການດັ່ງກ່າວໂດຍມີ ທ່ານ ສົມຈິດ ຮັງເຊັງຊົວ ຮອງເຈົ້າເມືອງໄຊຍະບູລີ, ມີຫົວໜ້າ-ຮອງຫົວໜ້າຫ້ອງການ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນການລົງກວດກາໃນຄັ້ງນີ້, ເຈົ້າໜ້າທີ່ການຄ້າ ເມືອງໄຊຍະບູລີ ໄດ້ລົງກວດກາສິນຄ້າທີ່ໝົດອາຍຸ ຢູ່ຕາມ ຮ້ານທີ່ຂາຍໃນບຸນອອກພັນສາ, ຜ່ານການກວດກາສິນຄ້າ ໄດ້ພົບເຫັນສິນຄ້າໝົດອາຍຸ ເປັນຕົ້ນ ເຂົ້າໜົມ ແລະ ເຄື່ອງດື່ມ ໂດຍເຈົ້າໜ້າທີ່ກໍໄດ້ເກັບມາທຳລາຍຖິ້ມ. ພ້ອມນີ້, ທີມງານອະນຸກຳມະການເສດຖະກິດ ແລະ ເຈົ້າໜ້າທີ່ ການຄ້າເມືອງ ຍັງໄດ້ເຮັດບົດບັນທຶກກັບເຈົ້າຂອງຮ້ານທີ່ຂາຍເຄື່ອງ.
ນອກນີ້, ຍັງໄດ້ກຳນົດສະຖານທີ່ຂາຍເຄື່ອງເພິ່ມເຕີມຄື: ເລີ່ມແຕ່ຫຼັກມ້າລາຍລົງຮອດນ້ຳຮຸ່ງ ແມ່ນບໍ່ອານຸຍາດໃຫ້ເຈົ້າຂອງຮ້ານປູສາດ, ຈັດໂຕະ, ຕັ່ງໄວ້ ເດັດຂາດ ເພາະບໍລິເວນດັ່ງກ່າວ ແມ່ນໄດ້ສະຫງວນໄວ້ໃຫ້ມວນຊົນນັ່ງຊົມ, ນັ່ງເຊຍໃນການແຂ່ງຂັນເຮືອຊ່ວງ; ໃນລະຫວ່າງວັນທີ 17-18 ຕຸລາ 2024 ເປັນມື້ແຂ່ງຂັນເຮືອຊ່ວງເພດຍິງ ແລະ ເພດຊາຍ.
ຖ້າຫາກເຫັນເຈົ້າຂອງຮ້ານ ເອົາສາດໄປປູ ແລະ ຈັດໂຕະຕັ່ງ ເພື່ອເອົາອາຫານ ແລະ ເຄື່ອງດື່ມ ໄປວາງຂາຍຢູ່ໃນພື້ນທີ່ສະຫງວນໃຫ້ຜູ້ຊົມ ຜູ້ເຊຍຕາມແຄມນ້ຳ 2 ຟາກຟັ່ງ ແມ່ນຈະໄດ້ຢຶດເອົາອຸປະກອນຕ່າງໆ, ພ້ອມທັງອາຫານ ແລະ ເຄື່ອງດື່ມທັງໝົດທີ່ ວາງຂາຍຢູ່ສະຖານທີ່ດັ່ງກ່າວ ແລະ ຈະຖືກປັບໃໝ ແຕ່ 2.000.000 ຫາ 5.000.000 ກີບ, ຖ້າຫາກເຈົ້າ ຂອງຮ້ານຍັງລະເມີດຄັ້ງຕໍ່ໄປແມ່ນຈະໃຫ້ຢຸດເຊົາຂາຍເຄື່ອງທັນທີ ແລະ ມອບໃຫ້ເຈົ້າໜ້າທີ່ ປກສ ເມືອງດຳເນີນ ຕາມກົດໝາຍ.
ຂ່າວ: ປະເທດລາວ