ພິທີຈູດທຳລາຍຢາເສບຕິດໄດ້ຈັດຂຶ້ນວັນທີ 11 ຕຸລາ 2024 ຢູ່ທີ່ສະໜາມກິລາ ແຂວງຄຳມ່ວນ, ເນື່ອງໃນໂອກາດວັນແຫ່ງຊາດຕ້ານຢາເສບຕິດຄົບຮອບ 23 ປີ (12 ຕຸລາ 2001 – 12 ຕຸລາ 2024) ສະເພາະຈໍານວນຢາເສບຕິດທີ່ໄດ້ນໍາມາທໍາລາຍໃນມື້ນີ້ ປະກອບມີ: ປະເພດຢາບ້າ 2,530,777 ເມັດ, ລວມນໍ້າໜັກ 557,229.49 ກຣາມ, ປະເພດຄັນຊາ 38 ເປົາ, ນໍ້າໜັກ 1,676 ກິໂລກຣາມ, ຢາໄອສ 02 ຖົງໃຫຍ່ ແລະ 04 ຖົງນ້ອຍ, ນໍ້າໜັກ 2,006.88 ກຣາມ ແລະ ປະເພດຢາເຄ ຈຳນວນ 01 ຖົງນ້ອຍ, ນໍ້າໜັກ 1.75 ກຣາມ.
ໃນພິທີ ທ່ານ ພົຈວ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງຄໍາມ່ວນ ກໍ່ໄດ້ຂຶ້ນຜ່ານບົດລາຍງານສະພາບການກ່ຽວກັບບັນຫາຢາເສບຕິດຢູ່ພາຍໃນແຂວງໃນໄລຍະ 01 ປີຜ່ານມາ ເຊິ່ງແຂວງຄຳມ່ວນ ແມ່ນໄດ້ເອົາໃຈໃສ່ ຕ້ານ ແລະ ສະກັດກັ້ນ ທັງໃຊ້ມາດຕະການທາງດ້ານກົດໝາຍ ກ່ຽວກັບບັນຫາຢາເສບຕິດທຸກປະເພດ ແຕ່ເບິ່ງລວມແລ້ວທ່າອ່ຽງການແຜ່ຂະຫຍາຍ ຂອງຢາເສບຕິດບາງປະເພດກໍຍັງໜ້າເປັນຫ່ວງ ໂດຍສະເພາະແມ່ນກຸ່ມໄວໜຸ່ມ, ນັກຮຽນ, ນັກສຶກສາ ເຊິ່ງໄດ້ສ້າງຜົນກະທົບຕໍ່ການດຳລົງຊີວິດ ກໍຄືປະກົດການຫຍໍ້ທໍ້ຕ່າງໆໃນສັງຄົມ ທັງເປັນການຝ່າຝືນຕໍ່ລະບຽບກົດໝາຍເຊັ່ນ: ຂີ້ລັກງັດແງະ, ກໍ່ອາລະວາດຕີກັນ, ຄາດຕະກຳ, ທຳລາຍຊັບສິນຂອງລັດ, ການຊີງຊັບພົນລະເມືອງ, ການມົ່ວສຸມໂສເພນີອື່ນໆ, ຍິ່ງຮ້າຍແຮງໄປກວ່ານັ້ນ ບັນຫາຢາເສບຕິດເປັນເງື່ອນໄຂໜຶ່ງທີ່ພວກສັດຕູອິດທິກຳລັງປໍລະປັກນຳໃຊ້ເປັນເຄື່ອງມື ໃນການເຄື່ອນໄຫວຕ້ານການປະຕິວັດ, ຢາເສບຕິດເປັນໄພອັນຕະລາຍຕໍ່ຄວາມໝັ້ນຄົງຂອງຊາດ.
ຂ່າວ: Khammouane News