ໃນວັນທີ 11 ຕຸລາ 2024 , ພະນະທ່ານ ອິຊິບະ ຊິເງະຣຸ, ນາຍົກລັດຖະມົນຕີຍີ່ປຸ່ນທີ່ເດີນທາງມາຢ້ຽມຢາມສາທາລະນະລັດ ປະຊາທິປະໄຕ ປະຊາຊົນລາວຢ່າງເປັນທາງການເພື່ອເຂົ້າຮ່ວມກອງປະຊຸມສຸດຍອດອາຊຽນທີ່ກ່ຽວຂ້ອງ ໄດ້ເຂົ້າຮ່ວມພິທີຕ້ອນຮັບທີ່ຈັດໂດຍພະນະທ່ານ ສອນໄຊ ສີພັນດອນ, ນາຍົກລັດຖະມົນຕີແຫ່ງ ສ.ປ.ປ ລາວ ແລະ ໄດ້ເປີດກອງປະຊຸມສຸດຍອດລາວ-ຍີ່ປຸ່ນ, ເນື້ອໃນຂອງກອງປະຊຸມມີດັ່ງຕໍ່ໄປນີ້
ທ່ານ ສອນໄຊ ໄດ້ກ່າວຕ້ອນຮັບທ່ານ ອິຊິບະ ທີ່ມາຢ້ຽມຢາມປະເທດລາວຢ່າງເປັນທາງການໂດຍເປັນປະເທດທຳອິດທີ່ໄປຢ້ຽມຢາມຫຼັງຈາກເຂົ້າຮັບຕຳແໜ່ງນາຍົກລັດຖະມົນຕີ, ໄດ້ກ່າວວ່າຢາກຮ່ວມມືກັບທ່ານ ອິຊິບະ ເພື່ອເສີມຂະຫຍາຍສາຍພົວພັນມິດຕະພາບລະຫວ່າງສອງປະເທດໃຫ້ແໜ້ນແຟ້ນຍິ່ງຂຶ້ນ. ພ້ອມກັນນັ້ນກໍໄດ້ສະແດງຄວາມເສົ້າສະຫຼົດໃຈກ່ຽວກັບເຫດການແຜ່ນດິນໄຫວທີ່ແຫຼມໂນໂຕະ.
ຕໍ່ຄຳເຫັນດັ່ງກ່າວ, ທ່ານ ອິຊິບະ ໄດ້ກ່າວວ່າຮູ້ສຶກປິຕິຍິນດີເປັນຢ່າງຍິ່ງທີ່ໄດ້ມາຢ້ຽມຢາມປະເທດລາວໃນທັນທີຫຼັງຈາກເຂົ້າຮັບຕຳແໜ່ງນາຍົກລັດຖະມົນຕີ ແລະ ໄດ້ສະແດງຄວາມເສຍໃຈຕໍ່ກັບຜູ້ທີ່ປະສົບໄພຈາກພາຍຸໄຕ້ຝຸ່ນຢາກິທີ່ຜ່ານມາບໍ່ດົນນີ້. ຍີ່ປຸ່ນຈະສືບຕໍ່ສະໜັບສະໜູນພ້ອມການປະກັນໄພພິບັດ ແລະ ການສຳຮອງເຂົ້າສານເວລາສຸກເສີນ. ພ້ອມກັນນັ້ນ, ຍັງໄດ້ສະແດງຄວາມຂອບໃຈຕໍ່ພະນະທ່ານ ສອນໄຊ ທີ່ໄດ້ສຸມເຫື່ອແຮງຢ່າງເຕັມທີ່ໃນການເປັນເຈົ້າພາບຈັດກອງປະຊຸມອາຊຽນ.
ທ່ານ ອິຊິບະ ໄດ້ສະແດງຄວາມປະສົງທີ່ຈະຈັດຕັ້ງປະຕິບັດການຮ່ວມມືເພື່ອເພີ່ມທະວີການເຊື່ອມຈອດລະຫວ່າງປະເທດລາວກັບເສດຖະກິດໃນພາກພື້ນ ແລະ ເພີ່ມທະວີຄວາມເຂັ້ມແຂງຂອງປະເທດລາວເປັນຕົ້ນຕໍ ເພື່ອປະກອບສ່ວນໃນການພັດທະນາເສດຖະກິດລາວໃຫ້ເປັນແບບກຸ້ມຕົນເອງ ແລະ ມີຄຸນະພາບສູງ ແລະ ການສ້າງສະຖຽນລະພາບທາງດ້ານການເງິນ ໂດຍຜ່ານການຮ່ວມມືຄື: (1) ການຮ່ວມມືເພື່ອສົ່ງເສີມການປ່ອຍກາສກາກບອນດີອົກຊິດເປັນສູນຈາກການເພີ່ມທະວີການເຊື່ອມຈອດດ້ານໄຟຟ້າກັບປະເທດອ້ອມຂ້າງ ແລະ ພະລັງງານໄຟຟ້າສະອາດຂອງລາວ ລວມທັງພິຈາລະນາການຮ່ວມມືແບບສ້າງຮ່ວມກັນ (ການເຊື່ອມຈອດດ້ານໄຟຟ້າ), (2) ການເສີມຂະຫຍາຍສະໜາມບິນສາກົນວັດໄຕ ແລະ ສ້ອມແປງທາງແວ່ (taxiway) (ການເຊື່ອມຈອດດ້ານວັດຖຸ), (3) ການຈັດຕັ້ງປະຕິບັດການເກັບກູ້ລະເບີດບໍ່ທັນແຕກ ແລະ ການຮ່ວມມືເພື່ອປ້ອງກັນໄພພິບັດ (ຄວາມເຂັ້ມແຂງທາງເສດຖະກິດ-ສັງຄົມ).