ວັນທີ 11 ຕຸລານີ້ ທີ່ສະໜາມກິລາແຂວງ ອົງການການປົກຄອງແຂວງ ສົມທົບກັບ ປກສແຂວງ, ພາກສ່ວນຕ່າງໆ ພາຍໃນແຂວງອຸດົມໄຊ ໄດ້ຈັດພິທີຈູດທຳລາຍຢາເສບຕິດ, ເນື່ອງໃນໂອກາດວັນແຫ່ງຊາດຕ້ານຢາເສບຕິດ ຄົບຮອບ 23 ປີ (12 ຕຸລາ 2001–12 ຕຸລາ 2024) ໂດຍມີ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ປະທານຄະນະກຳມະການຄວບຄຸມ, ສະກັດກັ້ນ ແລະ ຕ້ານຢາເສບຕິດ ຂັ້ນແຂວງ, ມີ ເຈົ້າໜ້າທີ່ ປກຊ, ປກສ, ພະແນກການ, ອົງການ, ພາກສ່ວນທຸລະກິດ, ນັກສຶກສາ ຕະຫຼອດຮອດມວນຊົນພາຍໃນເທດສະບານແຂວງອຸດົມໄຊ ເຂົ້າຮ່ວມ.
ທ່ານ ພັທ ບຸນຮັກ ໄຊຍະຕິ ຫົວຫນ້າຫ້ອງຕຳຫຼວດ, ກອງບັນຊາການ ປກສ ແຂວງ ລາຍງານວ່າ: ຢາເສບຕິດທີ່ນຳມາຈູດທຳລາຍຄັ້ງນີ້ ແມ່ນຢາເສບຕິດທີ່ສານປະຊາຊົນໄດ້ຕັດສິນສຳເລັດແລ້ວ ໃນນັ້ນ ມີ: ເຮໂຣອິນ ນໍ້າໜັກ 752,3 ກຣາມ; ຢາບ້າ ຈຳນວນ 10,526,853 ເມັດ, ນໍ້າໜັກ 1,190 ກິໂລກຣາມ; ແປ້ງຝຸ່ນ ນ້ຳໜັກ 7,1 ກີໂລກຣາມ; ກາເຟອິນ ນໍ້າໜັກ 5,8 ກິໂລກຣາມ; ຢາຝິ່ນ ນໍ້າໜັກ 354,5 ກຣາມ; ຢາສູບໄຟຟ້າ 25 ກອກ. ເພື່ອນຳມາທຳລາຍຖິ້ມ ຕາມລະບຽບກົດໝາຍ.
ການຈູດທຳລາຍຢາເສບຕິດໄດ້ຍົກໃຫ້ຮູ້ເຖິງ ສະພາບການລະບາດຂອງຢາເສບຕິດທີ່ແຜ່ລາມຢ່າງກ້ວາງຂວາງ ຈາກຕົວເມືອງ ໄປສູ່ຊົນນະບົດ ກາຍເປັນໄພອັນຕະລາຍຄຸກຄາມເຖິງຄວາມໝັ້ນຄົງຂອງຊາດ, ບ້ານ, ເມືອງ ແລະ ສັງຄົມ ທັງເປັນອຸປະສັກ ກົດໜ່ວງຖ່ວງດຶງ ການສ້າງສາພັດທະນາປະເທດຊາດ ນຳຄວາມເສຍຫາຍມາສູ່ຄອບຄົວ, ຄົນຮຸ່ນສືບທອດ ແລະ ປະຊາຊົນລາວບັນດາເຜົ່າ.