ຄວາມກົດດັນສູງຂອງອາກາດເຢັນທີ່ປະເທດຈີນ ຍັງແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ດ້ວຍກໍາລັງປານກາງ, ສົມທົບກັບກະແສລົມຕາເວັນອອກສ່ຽງເໜືອພັດປົກຄຸມ. ຊື່ງຈະເຮັດໃຫ້ອາກາດເຢັນໃນຕອນເຊົ້າຢູ່ເຂດພາກເໜືອ, ແຂວງໄຊສົມບູນ, ເຂດພູພຽງບໍລະເວນ ສ່ວນຕອນບ່າຍອາກາດຮ້ອນໂດຍສະເພາະຢູ່ແຂວງພາກກາງ ລົງຫາ ພາກໃຕ້ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ພ້ອມມີລົມພັດແຮງເປັນບາງໂອກາດຢູບາງທ້ອງຖິ່ນ.

ຂໍ້ມູນອຸຕຸກະເສດ ປະຈໍາອາທິດສໍາລັບເຂົ້ານາປີ ແລະ ພືດຜັກ ວັນທີ 07-13 ຕຸລາ 2024. ໃນໄລຍະໜຶ່ງອາທິດຂ້າງໜ້າແມ່ນມີຄວາມສ່ຽງຕໍ່າ ສໍາລັບຝົນຢູ່ໃນເຂດ ເມືອງອາດສະພັງທອງ, ແຂວງສະຫວັນະເຂດ. ເຂົ້ານາປີ ຫລື ເຂົ້ານານໍ້າຝົນ ແມ່ນຢູ່ໃນໄລຍະຈະເລີນເຕີບໂຕຂອງຕົ້ນເຂົ້າ ຫລື ແຕກກໍ, ໃຫ້ປະຊາຊົນຕິດຕາມພະຍາກອນອາກາດ ຮັບປະກັນການລະບາຍນໍ້າໃນທົ່ງນາໃຫ້ດີ, ເພື່ອປ້ອງກັນແມງໄມ້, ພະຍາດຈາກເຊື້ອລາ, ໃຫ້ໃຊ້ສະໝຸນໄພ, ຢາປາບສັດຕູພືດ ແລະ ຢາຂ້າເຊື້ອລາປະສົມກັນເພື່ອຫລຸດຜ່ອນການທໍາລາຍ ໃຊ້ຝຸ່ນເພື່ອຄວາມແຂງແຮງຂອງເຂົ້າ ແລະ ນໍາໃຊ້ມາດຕະການທີ່ເໜາະສົມສໍາລັບພະຍາດກາບໃບແຫ້ງ ທີ່ມີຄວາມສ່ຽງສູງ, ເພ້ຍຈັກຈັ່ນສີນໍ້າຕານ, ທີ່ມີຄວາມສ່ຽງປານກາງ ປະຊາຊົນຄວນໃຊ້ມາດຕະການທີ່ເໜາະສົມຕາມການແນະນໍາຈາກຂະແໜງກະສິກຳ ເພື່ອຫລຸດຜ່ອນຄວາມເສຍຫາຍ.