ພັທ ສັງຄົມ ພົມມະລາດ ຫົວໜ້າພະແນກຕໍາຫຼວດຈາລະຈອນ ນະຄອນຫລວງວຽງຈັນ ໃຫ້ສໍາພາດຕໍ່ສື່ມວນຊົນໃນວັນທີ 3 ຕຸລາ 2024 ວ່າ: ມາຮອດປັດຈຸບັນ, ເຈົ້າໜ້າທີ່ຕໍາຫລວດຈະລາຈອນ ນະຄອນຫລວງວຽງຈັນ ພ້ອມແລ້ວຈະອໍານວຍຄວາມສະດວກໃນການສັນຈອນຕາມທ້ອງຖະໜົນໃນໄລຍະທີ່ ສປປ ລາວ ເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມປິ່ນອ້ອມ ຢ່າງເປັນທາງການ ໂດຍຈະນໍາໃຊ້ກໍາລັງ 700 ກວ່າຄົນ.
ໃນນີ້, ໄດ້ກໍານົດຈຸດຕ່າງໆ ລວມມີ 200 ກວ່າຈຸດ ເພື່ອເອົາກໍາລັງໄປປະຈໍາການ ເຊິ່ງມີທັງໝົດ 700 ກວ່າຄົນ ເພື່ອອໍານວຍຄວາມສະດວກໃຫ້ຂະບວນຂອງບັນດາການນໍາ ກໍຄື ແຂກທີ່ຈະເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະ ຊຸມປິ່ນອ້ອມ, ລວມເຖິງການສັນຈອນໄປ-ມາ ຂອງບັນດາພາຫະນະຕາມເສັ້ນທາງສາຍຫລັກ ແລະ ທາງຮ່ອມຕ່າງໆ, ມີທັງເຂດວົງໃນ, ເຂດວົງນອກ ແລະ ເຂດຮອບນອກ, ລວມເຖີງບັນດາປ້ອມເຂົ້າ-ອອກເມືອງທີ່ຕິດກັບບັນດາແຂວງອ້ອມຂ້າງ ແລະ ອື່ນໆ ເພື່ອໃຫ້ມີຄວາມສະດວກ ແລະ ເປັນລະບຽບຮ້ອຍດີ.
ເພື່ອເຮັດໃຫ້ການກະກຽມວຽກງານຕ່າງໆ ມີຄວາມພ້ອມ ແລະ ລົງຕົວທີ່ດີ, ໄລຍະຜ່ານມາ ນອກຈາກໄດ້ກະກຽມເຈົ້າໜ້າທີ່ຕໍາຫລວດຈະລາຈອນ, ພາຫະນະ ແລະ ອຸປະກອນຮັບໃຊ້ຈໍາເປັນໃຫ້ພຽງພໍ ຍັງໄດ້ມີການຝຶກຊ້ອມໜ້າວຽກຕ່າງໆ ຢ່າງຕໍ່ເນື່ອງ ເຊັ່ນ: ການແກ້ໄຂບັນຫາອຸບັດເຫດຢູ່ຕາມເສັ້ນທາງແບບສຸກເສີນ, ການຄຸ້ມຄອງການສັນຈອນ, ການເປີດທາງ, ການຄຸມຂະບວນແຫ່ ແລະ ອື່ນໆ ເຮັດໃຫ້ມາຮອດປັດຈຸບັນ ການກະກຽມວຽກງານຕ່າງໆ ຂອງເຈົ້າໜ້າທີ່ຕໍາຫລວດຈະລາຈອນ ນະຄອນຫລວງວຽງຈັນ ເພື່ອຮັບໃຊ້ກອງປະຊຸມສຸດຍອດອາຊຽນຄັ້ງນີ້ແມ່ນມີຄວາພ້ອມແລ້ວຮ້ອຍສ່ວນຮ້ອຍ.
ໃນໂອກາດນີ້, ທ່ານຍັງໄດ້ຮຽກຮ້ອງໃຫ້ຜູ້ໃຊ້ລົດໃຊ້ຖະໜົນ ໃນໄລຍະກອງປະຊຸມດັ່ງກ່າວ ຈົ່ງເອົາໃຈໃສ່ປະຕິບັດຕາມແຈ້ງການຂອງພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ທີ່ໄດ້ປະກາດອອກໄປ, ລວມເຖິງ ປະຕິບັດຕາມຄໍາແນະນຳຂອງເຈົ້າໜ້າທີ່ກ່ຽວຂ້ອງທີ່ປະຈໍາຢູ່ຕາມແຕ່ລະເສັ້ນທາງຢ່າງເຂັ້ມງວດ ເພື່ອຮັບປະກັນໃຫ້ການສັນຈອນໄປ-ມາ ມີຄວາມສະດວກສະບາຍ ແລະ ຮັບປະກັນບໍ່ໃຫ້ມີອຸບັດຕິເຫດເກີດຂຶ້ນ.
ແຫຼ່ງຂ່າວ: ຄວາມສະຫງົບ