ກຳລັງ ປກສ ແຂວງຫົວພັນ ໄດ້ລົງພື້ນທີ່ເຂົ້າຊ່ວຍເຫຼືອພໍ່-ແມ່ ປະຊາຊົນ ອະນາໄມບັນດາສະຖານທີ່ຕ່າງໆ ທີ່ໄດ້ຮັບຜົນກະທົບຈາກໄພນໍ້າຖ້ວມ ແຕ່ວັນທີ 22-29 ກັນຍາ 2024, ໂດຍໄດ້ນຳເອົາລົງດັບເພີງ ແລະ ກຳລັງ ຈຳນວນ 80 ກວ່າສະຫາຍ ຊ່ວຍລ້າງຫ້ອງການບັນດາພະແນກການ ໂຮງຮຽນ, ຕະຫຼາດ ແລະ ເຮືອນພໍ່-ແມ່ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ພາຍໃນບ້ານທີ່ໄດ້ຮັບຜົນກະທົບຄື: ບ້ານນາລີວ, ບ້ານຊຳເໜືອ, ບ້ານມີສຸກ, ບ້ານນາທອງ, ບ້ານນາໜອງບົວ, ບ້ານນາ ວຽງ, ບ້ານນາສະກາງ, ບ້ານນາທົ່ງຈອງ, ບ້ານທາດເມືອງ ແລະ ບ້ານໂພໄຊ.
ແຂວງຫົວພັນ ເປັນອີກແຂວງໜຶ່ງທີ່ໄດ້ຮັບຜົນກະທົບຈາກໄພນ້ຳຖ້ວມ ໂດຍສະເພາະແມ່ນຂອບເຂດຕົວເມືອງຊຳເໜືອ; ກຳລັງກອງບັນຊາການ ປກສ ແຂວງຫົວພັນ ໄດ້ປະຈໍາການ ແລະ ກຽມພ້ອມເຫດສຸກເສີນຕະຫຼອດ 24 ຊົ່ວໂມງ ເພື່ອກຽມພ້ອມແກ້ໄຂ ແລະ ກອບກູ້ໄພພິບັດທໍາມະຊາດທີ່ອາດຈະເກີດຂຶ້ນຢູ່ເຂດທີ່ຕົນຮັບຜິດຊອບ, ໂດຍເອົາໃຈໃສ່ຕິດຕາມ ກໍາແໜ້ນສະພາບຮອບດ້ານຢ່າງໃກ້ຊິດ ມີມາດຕະການ ວິທີການແກ້ໄຂຢ່າງລະອຽດ ຖ້າເຫດການເກີດຂຶ້ນຢູ່ຂອບເຂດຮັບຜິດຊອບ, ເປັນເຈົ້າການສົມທົບກັບແຕ່ລະພາກສ່ວນເພື່ອຕອບຕ້ານ ແລະ ກອບກູ້ຊ່ວຍເຫຼືອໃຫ້ທັນເວລາ. ໃນນີ້, ໄດ້ເພີ່ມທະວີຄວາມເປັນເຈົ້າການໃນການປະສານສົມທົບກັບພາກສ່ວນທີ່ກ່ຽວຂ້ອງປຸກລະດົມກໍາລັງເຂົ້າຮ່ວມເຮັດໜ້າທີ່ກຽມພ້ອມຊ່ວຍເຫຼືອ ແລະ ກອບກູ້ ຍົກຍ້າຍເອົາພາກສ່ວນທີ່ຖືກຜົນກະທົບໄປສູ່ເຂດປອດໄພ ແລະ ເອົາໃຈໃສ່ການປ້ອງກັນເວນຍາມໃຫ້ມີຄວາມປອດໄພ.
ປັດຈຸບັນກຳລັງ ປກສ ແຂວງຫົວພັນ ຍັງສືບຕໍ່ເຮັດໜ້າທີ່ລົງພື້ນທີ່ແຕ່ລະຈຸດ ຊ່ວຍເຫຼືອອະນາໄມສະຖານທີ່ຕ່າງໆ ດ້ວຍຄວາມຮັບຜິດຊອບສູງ. ນອກຈາກນັ້ນ, ຍັງມີບັດດາບໍລິສັດ ແລະ ຮ້າງຮ້ານ, ພະແນກການ ນິຕິບຸກຄົນ ໄດ້ໃຫ້ການຊຸກຍູ້ ອຸປະຖຳ ອາຫານ ແລະ ເຄື່ອງດື່ມ ຈຳນວນໜຶ່ງ ໃຫ້ແກ່ກຳລັງ ທີ່ລົງປະຕິບັດໜ້າທີ່.
ພາບ-ຂ່າວ: ປກສ ແຂວງຫົວພັນ