ເມືອງຊະນະຄາມ ແຂວງວຽງຈັນ ເປັນເມືອງໜຶ່ງທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ເນື່ອງຈາກມີຝົນຕົກໜັກຕິດຕໍ່ກັນຫຼາຍວັນ ເລີ່ມແຕ່ວັນທີ 21-24 ກັນຍາ 2024 ເຮັດໃຫ້ປະລິມານນ້ຳໃນແມ່ນ້ຳຕ່າງໆເພີ່ມຂຶ້ນ ໂດຍສະເພາະແມ່ນ້ຳມີ້ ແລະ ເໝືອງຝາຍຫຼາຍແຫ່ງ ໄດ້ລົ້ນຝັ່ງກາຍເປັນມວນນ້ຳໃຫຍ່ໄຫຼລົງສູ່ບ່ອນຕ່ຳ ເກີດມີໄພນ້ຳຖ້ວມໜັກຢູ່ 2 ບ້ານຄື: ບ້ານນາສັກ ແລະ ບ້ານນາປາຝາ ທີ່ໄດ້ຮັບຜົນກະທົບໜັກກວ່າບ້ານອື່ນ.
ນັບແຕ່ວັນທີ 24-26 ກັນຍາ 2024 ນ້ຳໄດ້ໄປເຂົ້າຖ້ວມເຮືອນ, ເລົ້າເຂົ້າ, ໜອງປາ ແລະ ທົ່ງນາຂອງປະຊາຊົນເປັນຈຳນວນຫຼວງຫຼາຍ, ນອກຈາກນັ້ນຍັງມີຊົນລະປະທານ ແລະ ເສັ້ນທາງໄດ້ຮັບຜົນເສຍຫາຍໂດຍສະເພາະແມ່ນເສັ້ນທາງເຂດບ້ານປົ່ງ ຖືກນ້ຳຖ້ວມລະດັບນ້ຳສູງປະມານ 1 ກວ່າແມັດ ຫຼື ພຽງແອວ ເຮັດໃຫ້ການສັນຈອນໄປມາຂອງປະຊາຊົນພົບຄວາມຫຍຸ້ງຍາກ.
ຕໍ່ກັບສະພາບການດັ່ງກ່າວ ທາງກອງເລຂາຄະນະກຳມະການຄຸ້ມຄອງໄພພິບັດຂັ້ນແຂວງ ສົມທົບກັບຂັ້ນເມືອງ ໄດ້ລົງຕິດຕາມສະພາບນ້ຳຖ້ວມ ເພຶ່ອເກັບກຳຂໍ້ມູນຜົນເສຍຫາຍ, ນຳພາໂດຍ ທ່ານ ບຸນຊ່ວງ ວັນສີ ຮອງເຈົ້າເມືອງ, ທັງເປັນປະທານຄະນະກຳມະການຄຸ້ມຄອງໄພພິບັດເມືອງຊະນະຄາມ ພ້ອມທັງໄດ້ໃຫ້ສໍາພາດຕໍ່ສື່ມວນຊົນວ່າ: ຕໍ່ກັບສະພາບໄພພິບັດນ້ຳຖ້ວມຄັ້ງນີ້ ທາງການນຳຂອງເມືອງກໍ່ຄືຄະນະຄຸ້ມຄອງໄພພິບັດຂັ້ນເມືອງ ໄດ້ໃຫ້ການຊ່ວຍເຫຼືອແກ້ໄຂໃນໄລຍະນ້ຳຖ້ວມ ໂດຍໄດ້ຈັດສົ່ງກຳລັງຕຳຫຼວດ, ທະຫານ ລົງຊ່ວຍປະຊາຊົນຍົກຍ້າຍວັດຖຸເຄື່ອງຂອງ, ຊັບສິນທີ່ມີຄ່າ ແລະ ສັດລ້ຽງຂຶ້ນໄປໄວ້ບ່ອນສູງ ແລະ ບ່ອນທີ່ປອດໄພ.
ທ່ານກ່າວຕື່ມອີກວ່າ: ມາຮອດວັນທີ 26 ກັນຍາ 2024 ເຫັນວ່າລະດັບນ້ຳເລີ່ມຫຼຸດລົງຫຼາຍແລ້ວ ປະຊາຊົນຈຳນວນໜຶ່ງເລີ່ມອານາໄມເຮືອນຂອງຕົນເອງ ຄາດວ່າອີກ 2-3 ວັນທາງໜ້າ, ຖ້າຫາກວ່າຝົນບໍ່ຕົກໜັກ ລະດັບນ້ຳຈະຢູ່ລະດັບປົກກະຕິ. ສຳລັບຜົນເສຍຫາຍຍັງບໍ່ທັນສາມາດປະເມີນໄດ້ ທາງຄະນະກຳມະການຄຸ້ມຄອງໄພພິບັດຂັ້ນເມືອງ ຈະສົມທົບກັບພາກສ່ວນທີ່ກ່ຽວຂ້ອງ ແລະ ອຳນາດການປົກຄອງບ້ານ ລົງເກັບກຳຂໍ້ມູນຜົນເສຍຫາຍແລ້ວຈະແຈ້ງໃຫ້ຮັບຮູ້ຕາມພາຍຫຼັງ.
ຂ່າວ: ວສລ