ພະແນກ ໂຍທາທິການ ແລະ ຂົນສົ່ງອອກແຈ້ງການເລື່ອງ: ເປີດການສັນຈອນ ເສັ້ນທາງ ເລກທີ 11 ເຫນືອ, ເລກທີ 13 ໃຕ້ ແລະ ເລກທີ 11 ໃຕ້ ຂອງລົດບັນທຸກຫນັກ.
ອີງຕາມ ຂໍ້ຕົກລົງ ຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 444/ຈນວ, ລົງວັນທີ 07 ເມສາ 2023 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ພະແນກ ໂຍທາທິການ ແລະ ຂົນສົ່ງ ນະຄອນຫຼວງວຽງຈັນ; ອີງຕາມ ແຈ້ງການ ຂອງພະແນກ ໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ສະບັບເລກທີ 9345/ ຍທຂ.ນວ, ລົງວັນທີ 03 ກັນຍາ 2024 ແລະ ສະບັບເລກທີ 9370/ຍທຂ.ນວ, ລົງວັນທີ 15 ກັນຍາ 2024. – ອີງຕາມ ສະພາບລະດັບແມ່ນໍ້າຂອງ ທີ່ມີການຫຼຸດລົງ.
ພະແນກ ໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ຂໍຖືເປັນກຽດ ແຈ້ງມາຍັງ ອໍານາດການປົກຄອງ ບ້ານ, ຫ້ອງການ ຍທຂ ເມືອງ, ພະແນກຈະລາຈອນ ນະຄອນຫຼວງວຽງຈັນ ແລະ ຜູ້ປະກອບການຂົນສົ່ງ ຊາບວ່າ: ຈາກສະພາບລະດັບນໍ້າຂອງທີ່ຫຼຸດລົງ ໃນຂອບເຂດເສັ້ນທາງ ເລກທີ 11 ເຫນືອ, ເລກທີ 13 ໃຕ້ ແລະ ເລກທີ 11 ໃຕ້ ແມ່ນໃຫ້ເປີດການສັນຈອນເປັນປົກກະຕິ ເພື່ອອໍານວຍຄວາມສະດວກ ໃຫ້ແກ່ວຽກງານຂົນສົ່ງສິນຄ້າ ແລະ ການຂົນ ສົ່ງຂອງລົດບັນທຸກຫນັກ ຖ້າຫາກລະດັບນໍ້າຂອງ ຫາກເພີ່ມຂຶ້ນສູງອີກ ແມ່ນຈະໄດ້ແຈ້ງການ ໃຫ້ຢຸດຕິການສັນຈອນ ຊົ່ວຄາວ ຕື່ມພາຍຫຼັງ.
ດັ່ງນັ້ນ, ຈຶ່ງແຈ້ງມາຍັງບັນດາທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດ ຕາມແຈ້ງການສະບັບນີ້ດ້ວຍ.