ໃນວັນທີ 17 ກັນຍາ 2024 ເຈົ້າໜ້າທີ່ກອງບັນຊາການ ປກສ ແຂວງຊຽງຂວາງ ໄດ້ນໍາຕົວຜູ້ກໍ່ເຫດງັດເຮືອນຊອງປະຊາຊົນຈຳນວນ 2 ຫຼັງ ຢູ່ບ້ານລາດຮ້ວງ ເມືອງແປກ ແລະ ບ້ານພູວຽງ ເມືອງພູກູດ ແຂວງຊຽງຂວາງ ມາທົດສະກຳເຫດການຄືນ.
ຕາມການລາຍງານຂອງເຈົ້າໜ້າທີ່ໃຫ້ຮູ້ວ່າ: ໃນກາງເດືອນທັນວາ 2023 ຜ່ານມາ ໄດ້ຮັບແຈ້ງຄວາມຈາກຜູ້ເສຍຫາຍວ່າມີຄົນຮ້າຍມາງັດແງະເຮືອນຂອງຕົນ ເພື່ອເຂົ້າໄປລັກເອົາວັດຖຸມີຄ່າ, ພາຍຫຼັງໄດ້ຮັບແຈ້ງຄວາມເຈົ້າໜ້າທີ່ໄດ້ລົງກວດກາສະຖານທີ່ເກີດເຫດເຫັນວ່າມີມູນຄວາມຈິງ ແລະ ຕິດຕາມຫາເປົ້າໝາຍ, ຈົນມາຮອດວັນທີ 27 ມັງກອນ 2024 ສາມາດພົບເຫັນ ແລະກັກຕົວໄດ້ຄົນຮ້າຍໄດ້ 1 ຄົນ ຊື່ທ້າວ ຫັດສະດົງ ອາຍຸ ຊາວປີ ຢູ່ບ້ານພູວຽງເມືອງພູກູດ ແຂວງຊຽງຂວາງ.
ຜ່ານການສືບສວນຂອງເຈົ້າໜ້າທີ່ໃຫ້ຮູ້ວ່າ: ຜູ້ກ່ຽວຮັບສາລະພາບໄດ້ລົງມືກໍ່ເຫດງັດເຮືອນ 2 ຫຼັງດັ່ງກ່າວແທ້, ເຊິ່ງໃນວັນທີ 1 ທັນວາ 2023 ທີ່ຜ່ານມາ ຕົນເອງໄດ້ຂີ່ລົດມຸ່ງໜ້າຈາກໂພນສະຫວັນ ໄປຍັງເມືອງພະໄຊ ເພື່ອຈະໄປຮັບເງິນນໍາພີ່ນ້ອງ, ພໍມາຮອດລາດຮ້ວງຈຶ່ງເຫັນເຮືອນຫຼັງ 1 ບໍ່ມີຄົນຢູ່ ຈຶ່ງປີນກຳແພງເຂົ້າໄປ ເພື່ອຊອກລັກຊັບສິນ ໂດຍໃຊ້ສຽມງັດເຂົ້າປະຕູປ່ອງຢ້ຽມ ແຕ່ເຂົ້າບໍ່ໄດ້, ຈຶ່ງງັດທາງຊ່ອງລົມ ແລ້ວເຂົ້າທາງຫ້ອງນໍ້າ, ເມື່ອເຂົ້າໄປໃນເຮືອນກໍພົບເຫັນຕູ້ເຊັບ ແລະ ໄດ້ເອົາສຽມ ແລະ ພ້າແຫຼມງັດ ພາຍໃນຕູ້ເຊັບ, ພົບເຫັນສາຍຄໍ 1 ເສັ້ນ ໜັກ 1 ບາດ, ຕຸ້ມຫູ 2 ຄູ່ ໜັກ 1 ບາດກັບ 2 ສະຫຼຶງ ພ້ອມໄດ້ຄົ້ນເອົາເງິນໃນຖົງພາຍໃນເຮືອນໄດ້ປະມານ 9 ລ້ານກວ່າກີບ ແລ້ວໄດ້ປີນອອກທາງກຳແພງໄປ.
ຫຼັງຈາກໄດ້ວັດຖຸມີຄ່າໄປແລ້ວກໍນໍາໄປຂາຍຢູ່ນະຄອນຫຼວງວຽງຈັນ ເພື່ອເອົາເງິນໄປຈ່າຍຫຼິ້ນກິນຟຸມເຟືອຍ ແລະ ຫຼິ້ນເກມອອນລາຍຈົນໝົດ, ພໍຈ່າຍເງິນໝົດຈຶ່ງໄດ້ກັບມາຊຽງຂວາງ ເພື່ອມາຊອກລັກຕໍ່, ວັນທີ 21 ທັນວາ 2023 ໄດ້ໄປປີນເຂົ້າກຳແພງເຮືອນອີກຫຼັງ 1 ໄດ້ໃຊ້ຂວານ ແລະ ພ້າອີໂຕ້ ງັດປະຕູເຂົ້າໄປຊອກຫາວັດຖຸ ແລ້ວຄົ້ນເອົາຊັບສິນພາຍໃນຫ້ອງນອນ ພົບເຫັນຄຳຮູບປະພັນຢູ່ໃນກ່ອງ 2 ກ່ອງ ລວມມີສາຍເເຂນຄຳ 1 ເສັ້ນ 2 ບາດ, ຕົນຈຶ່ງໄດ້ເກັບເອົາເຄື່ອງດັ່ງກ່າວ ແລ້ວປີນອອກຈາກກຳແພງໄປ.
ຫຼັງຈາກນັ້ນໄດ້ຂີ່ລົດຈັກເຂົ້າມາໂພນສະຫວັນ ມາຄິວລົດເມ ແລ້ວຂຶ້ນລົດເມມາຂາຍຄໍາຢູ່ນະຄອນຫຼວງວຽງຈັນ ພໍໄດ້ເງິນແລ້ວກໍເດີນທາງໄປບໍ່ແກ້ວ ແລະ ໄດ້ຫຼິ້ນເກມພະນັນອອນລາຍຈົນໝົດເງິນແລ້ວກັບມາຊຽງຂວາງ, ຈົນຮອດ 27 ມັງກອນ 2024 ຈຶ່ງຖືກເຈົ້າໜ້າທີ່ກັກຕົວ ເພື່ອມາດຳເນີນຄະດີຕາມລະບຽບກົດໝາຍ.
ຂ່າວ: ປກສ ຊຽງຂວາງ