ພາຍຫຼັງໄດ້ເກີດສະພາບອາກາດປ່ຽນແປງ ມີພະຍຸລົມແຮງ (ພະຍຸໄຕ້ຝຸ່ນ ຢາກິ) ເຮັດໃຫ້ເກີດມີຝົນຕົກຫຼາຍໃນອາທິດທີ່ຜ່ານມາ ໂດຍສະເພາະແມ່ນໃນແຂວງຫຼວງນໍ້າທາ ຈຶ່ງເຮັດໃຫ້ເກີດຄວາມເສຍຫາຍສົມຄວນຕໍ່ອາຄານໂຮງຮຽນ ທີ່ຕັ້ງຢູ່ພາຍໃນເມືອງຫຼວງນໍ້າທາ ຊຶ່ງມີໂຮງຮຽນ ຈໍານວນ 50 ແຫ່ງ ພ້ອມຄູອາຈານ ແລະ ນັກຮຽນ ເກືອບ 6 ພັນຄົນ ໄດ້ຜົນກະທົບຈາກໄພພິບັດນໍ້າຖ້ວມໃນຄັ້ງນີ້.
ຕາມບົດລາຍງານຜົນກະທົບຈາກໄພພິບັດນໍ້າຖ້ວມຂອງຂະແໜງການສຶກສາ ແລະ ກິລາ ແຂວງຫຼວງນໍ້າທາ ໃນວັນທີ 12 ກັນຍາ 2024 ໃຫ້ຮູ້ວ່າ: ໃນວັນທີ 9 ກັນຍາ 2024 ໄດ້ເກີດສະພາບອາກາດປ່ຽນແປງ ມີພະຍຸລົມແຮງເຮັດໃຫ້ເກີດມີຝົນຕົກຫຼາຍຈົນເກີດຄວາມເສຍຫາຍພໍສົມຄວນຕໍ່ອາຄານໂຮງຮຽນ ທີ່ຕັ້ງຢູ່ພາຍໃນເມືອງຫຼວງນໍ້າທາ ແຂວງຫຼວງນໍ້າທາ.
ຜ່ານການເກັບກຳຂໍ້ມູນຕົວຈິງໃນເບິ່ງຕົ້ນຂອງພະແນກສຶກສາທິການ ແລະ ກິລາແຂວງ ໂດຍສົມທົບກັບຫ້ອງການສຶກສາທິການ ແລະ ກິລາ ເມືອງຫຼວງນໍ້າທາ ສັງລວມບັນດາໂຮງຮຽນທີ່ຖືກຜົນກະທົບໄພພິບັດນໍ້າຖ້ວມ ມີຈຳນວນ 50 ແຫ່ງ ໃນນີ້ປະກອບມີ ໂຮງຮຽນມັດທະຍົມສົມບູນ 3 ແຫ່ງ, ໂຮງຮຽນມັດທະຍົມຕອນຕົ້ນ 7 ແຫ່ງ, ໂຮງຮຽນປະຖົມ 23 ແຫ່ງ ແລະ ໂຮງຮຽນອະນຸບານ 17 ແຫ່ງ.
ຜົນຂອງການເສຍຫາຍໃນເບື້ອງຕົ້ນຂອງແຕ່ລະໂຮງຮຽນ ປະກອບມີ ອຸປະກອນການຮຽນການສອນໃນໂຮງຮຽນ ເປັນຕົ້ນແມ່ນ ປຶ້ມແບບຮຽນ, ປຶ້ມຄູ່ມືຄູ ແລະ ອຸປະກອນອື່ນໆ; ປະເພດເຟີນີເຈີພາຍໃນໂຮງຮຽນ ແລະ ອາຄານຮຽນບາງໂຮງຮຽນເປ່ເພ.
ຂ່າວ: ໜັງສືພິມສຶກສາ, ຄວາມສະຫງົບ