ສະພາບນໍ້າຖ້ວມທີ່ເກີດຂື້ນຢູ່ເເຂວງຫລວງນໍ້າທາ ໃນລະຫວ່າງວັນທີ 9 ຫາ11ກັນຍາທີ່ຜ່ານມາ ໄດ້ສ້າງຄວາມເສຍຫາຍຢ່າງໜັກໜ່ວງໃຫ້ເເກ່ພື້ນຖານໂຄງລ່າງ, ໂດຍສະເພາະຖະໜົນຫົນທາງໃນເຂດເທດສະບານເເຂວງຫຼາຍເສັ້ນ, ຂົວບາງເເຫ່ງ, ລະບົບນໍ້າປະປາຖືກຕັດຂາດ, ລວມເຖິງເຮືອນຊານປະຊາຊົນຈໍານວນໜຶ່ງ. ປັດຈຸບັນພະເເນກໂຍທາທິການ ເເລະ ຂົນສົ່ງເເຂວງຫຼວງນໍ້າທາກຳລັງເລັ່ງປະເມີນຜົນເສຍຫາຍ, ເພື່ອກະກຽມສະເໜີອົງການປົກຄອງເເຂວງ ເເລະ ຫາທາງປັບປຸງປົວເເປງຄືນໃໝ່ໃນຂັ້ນຕໍ່ໄປ ເນື່ອງຈາກວ່າປັດຈຸບັນນີ້ສະພາບນໍ້າຖ້ວມໄດ້ບົກເເຫ້ງເປັນປົກກະຕິເເລ້ວ.
ທ່ານ ພູນເເກ້ວ ເຫລົາອີນ ຫົວໜ້າພະເເນກໂຍທາທິການ ເເລະ ຂົນສົ່ງເເຂວງຫຼວງນໍ້າທາໃຫ້ສໍາພາດວ່າ: ສະພາບນໍ້າຖ້ວມທີ່ເກີດຂື້ນໄດ້ສ້າງຜົນກະທົບໜັກສົມຄວນ ໃຫ້ເເກ່ພື້ນຖານໂຄງລ່າງເປັນຈໍານວນຫຼາຍ, ໂດຍສະເພາະໃນວັນທີ 9 ກັນຍາທີ່ຜ່ານມາ, ສະພາບເສັ້ນທາງຖືກຕັດຂາດທຸກດ້ານ ບາງໄລຍະທາງເເມ່ນເກີດຈາກສະພາບດິນເຈື່ອນ, ນໍ້າຖ້ວມເສັ້ນທາງເຮັດໃຫ້ເທດສະບານແຂວງຖືກຕັດຂາດການສັນຈອນກັບບັນດາເມືອງ, ພາຍຫຼັງນໍ້າບົກແຫ້ງໄດ້ສຸມກໍາລັງເຂົ້າແກ້ໄຂ ຈິ່ງສາມາດເປີດທາງໄດ້ຢູ່ຈຸດເສັ້ນທາງນໍ້າ ຫາ ນາເຕີຍ, ສໍາລັບ ເສັ້ນທາງ 13N ຊາຍແດນແຂວງອຸດົມໄຊ-ບໍ່ເຕ່ນ ໄດ້ລະດົມກໍາລັງບັນດາຜູ້ປະກອບການຕ່າງໆ ນໍາໃຊ້ລົດຈົກເຂົ້າມາຊ່ວຍ ສົບທົບກັບບໍລິສັດຜູ້ຮັບເໝົາທາງຫຼວງແຫ່ງຊາດເລັ່ງແກ້ໄຂ, ມາຮອດວັນທີ 14 ກັນຍາ2024 ສາມາດແກ້ໄຂການສັນຈອນໄປມາຊົ່ວຄາວໄດ້, ເສັ້ນທາງ R3 ຈຸດຂົວບວມພຽງ ສົ້ນຂົວນໍ້າທຸງມີການຊຸດຕົວ ເສົາເພ່ເປຫນັກສົມຄວນ, ເຊິ່ງມີຄວາມສ່ຽງຕໍ່ການສັນຈອນໄປມາ, ເສັ້ນທາງ 17A ຫຼວງນ້ຳທາ-ເມືອງສິງ-ຊາຍແດນປົ່ງໄຮ ໄດ້ລະດົມກໍາລັງທະລຸເສັ້ນທາງຈາກເມືອງສິງ ແລະ ນໍ້າທາລັດໃສ່ກັນ.
ມາຮອດວັນທີ 13 ກັນຍາ 2024 ສາມາດແກ້ໄຂການສັນຈອນໄປມາໄດ້, ເນື່ອງຈາກນໍ້າຈຽນຖ້ວມຂົວ ເປັນເວລາຫຼາຍວັນໄດ້ບົກເເຫ້ງລົງ; ເສັ້ນທາງ 17B ຕອນທາງເມືອງສິງ-ເມືອງລອງ-ຊຽງກົກ-ຊາຍແດນລາວ-ມຽນມາ ເສັ້ນທາງຖືກນໍ້າເຊາະຄູທາງຂາດ ຢູ່ກິໂລເເມັດທີ 32+200 ໜ້າທາງຍຸບ, ທາງເຊາະເຈື່ອນ, ຫຼາຍຈຸດ ມາຮອດປັດຈຸບັນໄດ້ສ້າງທາງເວັ້ນເພື່ອການສັນຈອນຊົ່ວຄາວໃຫ້ຜ່ານໄປມາໄດ້ແຕ່ໜ້າທາງແມ່ນເປ່ເພເສຍຫາຍເເລະຊຸດໂຊມຫຼາຍໜັກໜ່ວງ; ທາງຫຼວງແຂວງ ເລກທີ 1501 ແຕ່ 3 ແຍກບ້ານໃໝ່ ເມືອງຫຼວງນໍ້າທາ – ເທດສະບານເມືອງນາແລ ເສັ້ນທາງຖືກຕັດຂາດນັບແຕ່ວັນທີ 9 ກັນຍາ 2024, ຮອດປະຈຸບັນ ເນື່ອງຈາກມີດິນເຈື່ອນຂະໜາດໃຫຍ່ທັບຖົມ, ຕົ້ນໄມ້ລົ້ມທັບທາງຈຳນວນຫຼາຍຈຸດ ແລະ ຂ້າງທາງຖືກນ້ຳນອງໄຫລເຊາະ.
ມາຮອດປະຈຸບັນສາມາດໄປມາໄດ້, ນອກຈາກນີ້, ບັນດາທາງຫຼວງແຂວງ, ທາງຫຼວງເມືອງ, ທາງຊົນນະບົດ ແລະ ທາງໃນຕົວເມືອງອີກຈຳນວນຫຼາຍເສັ້ນ, ໂຮງງານຜະລິດນໍ້າປະປາ ເເລະ ສະໜາມບິນຖືກນໍ້າຖ້ວມພົບຄວາມເສຍຫາຍເຊັ່ນກັນ.
ທ່ານ ພູນເເກ້ວ ເຫລົາອີນ ໃຫ້ຮູ້ຕື່ມວ່າ: ສໍາລັບວິທີການແກ້ໄຂຕໍ່ໜ້າ ໂດຍໄດ້ຮັບການຊີ້ນໍາຢ່າງໃກ້ຊິດຈາກເຈົ້າແຂວງ, ການນໍາແຂວງ ແລະ ດ້ວຍຄວາມເປັນຫ່ວງເປັນໃຍຂອງກະຊວງໂຍທາທິການ ເເລະ ຂົນສົ່ງ ໄດ້ຊີ້ນໍາໂດຍກົງໃນການແກ້ໄຂຜົນກະທົບຄັ້ງນີ້, ໂດຍເລັງເປົ້າໝາຍ ເພື່ອການເກັບກໍາຂໍ້ມູນຜົນເສຍຫາຍ, ພ້ອມທັງສຸມກໍາລັງເຂົ້າແກ້ໄຂ ເພື່ອຕອບໂຕ້ໄພພິບັດໂດຍໄວ, ສືບຕໍ່ສໍາຫຼວດເກັບກໍາຂໍ້ມູນເພື່ອຟື້ນຟູຫຼັງໄພພິບັດໃຫ້ເຂົ້າສູ່ສະພາບປົກກະຕິເຮັດໃຫ້ການສັນຈອນສະດວກສະບາຍຂຶ້ນ, ສຸມໃສ່ຟື້ນຟູສະໜາມບິນ ໃຫ້ສາມາດກັບຄືນມານໍາໃຊ້ໄດ້ໂດຍໄວ.
ພ້ອມທັງເລັ່ງໃສ່ແກ້ໄຂນໍ້າປະປາໃຫ້ສາມາດບໍລິການໄດ້ປົກກະຕິພ້ອມທັງຮຽກຮ້ອງໃຫ້ປະຊາຊົນ ສັງຄົມທຸກພາກສ່ວນ ຮັບຮູ້ເຂົ້າໃຈ ໃນຄວາມພະຍາຍາມ ຂອງພາກລັດ ແລະ ຂໍອະໄພໃນຄວາມບໍ່ສະດວກ, ພ້ອມທັງໃຫ້ຄໍາໝັ້ນສັນຍາວ່າ: ຈະສຸມທຸກກໍາລັງເຫື່ອແຮງ ເຂົ້າໃນການແກ້ໄຂວຽກງານທີ່ເປັນອຸປະສັກໃຫ້ຜ່ານພົ້ນໄປ ເເລະ ສະເໜີໃຫ້ການນໍາພັກ-ລັດພາກສ່ວນກ່ຽວຂ້ອງ ອໍານວຍຄວາມສະດວກ ແລະ ອູ້ມຊູຊ່ວຍເຫຼືອຂະແໜງການໂຍທາທິການ ເເລະ ຂົນສົ່ງເເຂວງ ໃນການຟື້ນຟູພື້ນຖານໂຄງລ່າງ ທີ່ຖືກຜົນກະທົບໃນຄັ້ງນີ້ໃຫ້ມີຜົນສໍາເລັດ.
ຂ່າວ: ວສລ